Pages

Wednesday, November 30, 2016

மரண அறிவிப்பு ( சபீனா அம்மாள் அவர்கள் )

அதிராம்பட்டினம், கடற்கரைத் தெருவை சேர்ந்த மர்ஹூம் முஹம்மது சேக்காதி அவர்களின் மகளும், புக் ஹாஜா அலாவுதீன் அவர்களின் மனைவியும், அகமது முஸ்தபா அலி அவர்களின் தாயாரும், சேக்தாவூது அவர்களின் சகோதரியும், சாகுல் ஹமீது, முஹம்மது காசிம், முஹம்மது மொய்தீன், மீரா மொய்தீன் ஆகியோரின் மாமியாரும், தமீம் அன்சாரி, நெய்னாம்ஷா, சேக் ஆகியோரின் பெரிய தாயாரும், மசூதுகான், மர்சூக் அகமது, மஹ்ரூப் ஆகியோரின் பாட்டியுமாகிய சபீனா அம்மாள் அவர்கள் இன்று வஃபாத்தாகிவிட்டார்கள்.

"இன்னாலில்லாஹி வ இன்ன இலைஹி ராஜிஹூன்"

அன்னாரின் ஜனாஸா நாளை ( 01-12-2016 ) காலை 10 மணியளவில் கடற்கரைத்தெரு ஜும்மா பள்ளி மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துஆ செய்வோம்.

அதிரை அருகே மின்சாரம் பாய்ந்து எலெக்ட்ரீசியன் மரணம் !

அதிராம்பட்டினம், நவ. 30:
தஞ்சாவூர் மாவட்டம், அதிராம்பட்டினம் அருகே பழவேரிக்காடு கிராமத்தைச் சேர்ந்த எலெக்ட்ரீசியன் சே. வைரப்ப தவமணி (46). ஒப்பந்த அடிப்படையில் மின் வாரியத்தில் ஊழியராகப் பணியாற்றி வந்துள்ளார்.

இந்நிலையில், இவர் புதன்கிழமை முற்பகல் தம்பிக்கோட்டை மேலக்காடு கிராமத்திலுள்ள டிரான்ஸ்பார்மரில் ஏறி பழுது நீக்கம் செய்து கொண்டிருந்தாராம். அப்போது எதிர்பாராமல் மின்சாரம் பாய்ந்ததில் உடல் கருகி உயிரிழந்தார். இது குறித்து அதிராம்பட்டினம் போலீஸார் வழக்குப் பதிந்து விசாரிக்கின்றனர்.

காதிர் முகைதீன் கல்லூரியில் ரூ. 55 லட்சம் மதிப்பீட்டில் புதிய நூலக கட்டிடம் திறப்பு ( படங்கள் )

அதிராம்பட்டினம், நவ-30
தஞ்சாவூர் மாவட்டம், அதிராம்பட்டினம் காதிர் முகைதீன் கல்லூரியின் புதிய நூலகக் கட்டிடத்தை இன்று ( 30-11-2016 ) புதன்கிழமை காலை கல்லூரி நிர்வாகி நீதிபதி கே.சம்பத் திறந்து வைத்து வாழ்த்துரை வழங்கினார்.

இந்நிகழ்வில் காதிர் முகைதீன் கல்வி நிறுவன அதிகாரப்பூர்வ கையொப்பமாளர் முனைவர் ஏ.ஜலால், கல்லூரி முதல்வர் முனைவர் ஏ.எம். உதுமான் முகையதீன், கல்லூரி நூலகர் தினகரன் பொன்னையா மற்றும் அனைத்து துறைகளின் தலைவர்கள், பேராசிரியர்கள், கல்லூரி அலுவலக, ஆய்வகப் பணியாளர்கள், மாணவ, மாணவிகள் கலந்து கொண்டனர்.

இந்த புதிய நூலக கட்டிடம் சுமார் ரூ. 55 லட்சம் மதிப்பீட்டில் கட்டப்பட்டுள்ளது. இந்நூலகத்தில் 30 ஆயிரத்திற்கும் மேற்பட்ட புத்தகங்கள், 50க்கும் மேற்பட்ட பருவ இதழ்கள், மாணவ, மாணவிகளுக்கு படிப்பதற்கு தேவையான அனைத்து புத்தகங்கள், 10 ஆயிரத்திற்கும் மேற்பட்ட மின் நூல்கள், மின் இதழ்கள் தவிர இணையதள வசதி ஆகியன நூலகத்தில் இடம்பெற்றுள்ளன.

இந்நூலகத்தில் படிப்பதற்காக மாணவ, மாணவிகளுக்கு தனித்தனியாக இடவசதியும், பேராசிரியர்களுக்கு தனியாகவும் அமைக்கப்பட்டு உள்ளன. இந்த புதிய நூலகம் எவர்டெக் பில்டர் நிறுவன கான்டிராக்டர் ஏ. சாகுல் ஹமீது மூலம் கட்டப்பட்டுள்ளது.
 

 


வங்கியில் பணம் வழங்காததால் அதிரையில் 2 வது முறையாக சாலை மறியல் !

அதிராம்பட்டினம், நவ-30
தஞ்சாவூர் மாவட்டம், அதிராம்பட்டினம் ஈசிஆர் சாலையில் உள்ள தேசியமயமாக்கப்பட்ட வங்கியில் பணம் வழங்காததால் ஆத்திரமடைந்த வாடிக்கையாளர்கள் 2 வது முறையாக புதன்கிழமை சாலை மறியலில் ஈடுபட்டனர்.

500, 1,000 ரூபாய் நோட்டுகள் செல்லாது என்று அறிவிக்கப்பட்ட பிறகு,
நாளுக்கு நாள் வங்கிகளிலும், ஏடிஎம் மையங்களிலும் பணம் எடுக்க மக்கள் கூட்டம் அலைமோதுகிறது. வங்கிகளிலும் பணம் தட்டுப்பாடு நீடிப்பதால், பெரும்பாலான வங்கிகள் பணம் எடுக்க வரும் வாடிக்கையாளர்களை சமாளிக்க முடியாமல் திணறி வருகின்றன.

கடந்த வெள்ளிக்கிழமை காலை அதிராம்பட்டினம் ஈசிஆர் சாலையில் உள்ள தேசியமயமாக்கப்பட்ட வங்கிக்கிளை வாசலில் வரிசையில் காத்திருந்த வாடிக்கையாளர்களிடம் பணப்பட்டுவாடா செய்ய வங்கியில் போதிய அளவு பணம் இல்லை என அந்த வங்கி அறிவித்தது. இதனால் ஆத்திரமடைந்த வாடிக்கையாளர்கள் வங்கி அருகே சாலை மறியலில் ஈடுபட்டனர்.

இந்நிலையில், இன்று புதன்கிழமை காலை வங்கி முன் வரிசையில் காத்திருந்த வாடிக்கையாளர்கள் சிலருக்கு பணப்பட்டுவாடா செய்ய போதிய அளவு பணம் இல்லை என கூறியதால் அதிருப்தியடைந்த வாடிக்கையாளர்கள் 100 பேர் வங்கி முன் சாலையில் அமர்ந்து மறியலில் ஈடுபட்டனர். இதனால் 20 நிமிடங்கள் ஈசிஆர் சாலையில் வாகன போக்குவரத்து தடை ஏற்பட்டது.

தகவலறிந்த அதிராம்பட்டினம் போலீசார் சம்பவ இடத்துக்குச் சென்று மறியலில் ஈடுபட்டவர்களிடமும், வங்கி அதிகாரிகளிடமும் பேச்சு நடத்தினார். இதையடுத்து, தஞ்சாவூரிலிருந்து பணம் வந்தபின் வாடிக்கையாளர்களுக்கு வழங்கப்படும் என வங்கி தரப்பில் கூறியதை அடுத்து போராட்டத்தை கைவிட்டு அனைவரும் கலைந்து சென்றனர்.
 
 
 
 
 

நாடா புயல் - பள்ளிகளுக்கு 2 நாள் விடுமுறை!

'நாடா' புயல் எச்சரிக்கையை அடுத்து சென்னை உள்ளிட்ட 5 மாவட்டங்களில் உள்ள பள்ளிகளுக்கு இரண்டு நாட்கள் விடுமுறை அறிவிக்கப்பட்டுள்ளது.

சென்னை, காஞ்சிபுரம், திருவள்ளூர், நாகை, கடலூர் பள்ளிகளுக்கு டிசம்பர் 1 மற்றும் டிசம்பர் 2 ஆகிய இரு நாட்களுக்கு விடுமுறை அறிவிக்கப்பட்டுள்ளது.

விழுப்புரம் மாவட்டத்தில் வானூர், மரக்காணம் ஆகிய இரு வட்டங்களில் உள்ள பள்ளிகளுக்கு மட்டும் விடுமுறை அறிவிக்கப்பட்டுள்ளது.

தமிழக அரசின் பள்ளிக் கல்வித்துறை இந்த விடுமுறையை அறிவித்துள்ளது குறிப்பிடத்தக்கது.

வங்கக்கடலில் நிலை கொண்டிருந்த காற்றழுத்த தாழ்வு மண்டலம் மேலும் வலுப்பெற்று புயலாக உருவானதாக சென்னை வானிலை ஆய்வு மையம் அறிவித்துள்ளது. இந்தப் புயலுக்கு 'நாடா' எனப் பெயரிடப்பட்டுள்ளது.

இது தொடர்பாக சென்னை வானிலை ஆய்வு மைய இயக்குநர் எஸ்.பாலச்சந்திரன் செய்தியாளர்கள் சந்திப்பில் கூறும்போது, "வங்கக்கடலில் நிலை கொண்டிருந்த காற்றழுத்த தாழ்வு மண்டலமானது இன்று (புதன்கிழமை) காலை 8.30 மணிக்கு மேலும் வலுப்பெற்று புயலாக உருவானது. இந்தப் புயலுக்கு 'நாடா' எனப் பெயர் சூட்டப்பட்டுள்ளது.

தற்போதைய நிலவரப்படி 'நாடா' புயல் புதுச்சேரிக்கு தென் கிழக்கே 830 கி.மீ. தொலைவில் நிலை கொண்டுள்ளது. இது மேலும் வலுப்பெற்று வடமேற்கு திசை நோக்கி நகர்ந்து நாளை மறுநாள் டிசம்பர் 2-ம் தேதியன்று வேதாரண்யம் - புதுச்சேரிக்கு இடையே கடலூர் அருகே கரையைக் கடக்கும் என எதிர்பார்க்கப்படுகிறது" என்றார்.

அவர் மேலும் கூறும்போது, 'நாடா' புயல் காரணமாக சென்னையில் நாளை அதிகாலை முதல் மழை பெய்யும் என எதிர்பார்க்கப்படுகிறது. கடலோர மாவட்டங்களில் கனமழைக்கு வாய்ப்பிருக்கிறது. மீனவர்கள் கடலுக்குச் செல்ல வேண்டாம் என எச்சரிக்கப்பட்டுள்ளது எனத் தெரிவித்தார்.

இந்நிலையில் முன்னெச்சரிக்கை நடவடிக்கையாக சென்னை உள்ளிட்ட 5 மாவட்டங்களில் உள்ள அனைத்துப் பள்ளிகளுக்கும் விடுமுறை அறிவிக்கப்பட்டுள்ளது.

3 நூற்றாண்டுகளை கண்ட 117 வயது மூதாட்டி !

அதிரை நியூஸ்: நவ-30
எம்மா மொரானோ (Emma Morano) என்கிற இந்த 18 ஆம் நூற்றாண்டை சேர்ந்த மூதாட்டி இத்தாலி நாட்டின் வடபகுதியிலுள்ள மக்கியொரி ஏரி (Lake Maggiore) அருகில் அமைந்துள்ள வெர்பானியா (Verbania) எனும் நகரில் 1899 ஆம் ஆண்டு நவம்பர் 29 ஆம் நாள் பிறந்தவர்.

1938 ஆம் ஆண்டு தனது ஒரே மகன் குழந்தை பருவத்திலேயே இறந்ததை தொடர்ந்து கணவருடன் ஏற்பட்ட கருத்து வேறுபாட்டால் பிரிந்தவர் இன்று வரை தனித்தே வாழ்கிறார். 8 சகோதர, சகோதரிகளில் மூத்தவரான இவரைத்தவிர உயிருடன் யாருமில்லை, கணவர் உட்பட.

கடந்த 20 வருடங்களாக தனது அறையோடு நடமாட்டத்தை குறைத்துக் கொண்டவர். தற்போது கடந்த ஒரு வருடமாக பெரும்பாலான நேரம் படுக்கையே கதி என்றுள்ளார் என்றாலும் முன்பு தனது சுய தேவைகளுக்காக சாக்கு கம்பெனி ஒன்றில் வேலை பார்த்தவர்.

நவ.29 அன்று பிறந்த நாள் கொண்டாடும், வாழும் உலகில் அதிக வயதுடையவராக கின்னஸ் சாதனைக்குழு அங்கீகரித்துள்ள நிலையில் இவரை வாழ்த்துவதற்காக வெர்பானியா நகர மேயர் சில்வியா மர்சியொனினி, உறவினர்கள் பத்திரிக்கையாளர்கள் உடன் அமெரிக்கா, சுவிட்சர்லாந்து, ஆஸ்திரியா, டூரின், மிலன் என உலகின் பல பகுதியிலிருந்தும் வருகை தந்துள்ள முகம் தெரிய ஆர்வலர்கள் பலரும் கலந்து சிறப்பான ஏற்பாடுகளை செய்து வருகின்றனர்.

தனக்கு செய்யப்பட்டு வரும் பிறந்த நாள் ஏற்பாடுகளை பார்த்து புன்னகைக்கும் இவருக்கு பிறந்த நாள் கேக்கை சாப்பிட முடியாதாம், காரணம் ஒவ்வாமை. இவருடைய தினசரி உணவு 2 முட்டைகள் மற்றும் சில பிஸ்கட்கள் மட்டுமே. முதுமையின் காரணமாக கேட்கும் சக்தி, கண் பார்வை குறைபாடு, பற்களையும் முழுமையாக இழந்துவிட்டவர் மெல்லிய அளவில் ஓரளவு பேசுகிறார் என்றாலும் அவருடைய ஞாபக சக்தி அப்படியே இன்னும் உற்சாகமாக உள்ளது.

Source: Gulf News
தமிழில்: நம்ம ஊரான்

அதிரையில் மின்தடை ரத்து !

அதிராம்பட்டினம், நவ-28:
அதிராம்பட்டினம் பகுதிகளில் இன்று புதன்கிழமை  (நவ. 30) மின்சார விநியோகம் இருக்காது என அறிவிக்கப்பட்டு இருந்தது. இந்நிலையில் மின்தடை ரத்து செய்யப்பட்டுள்ளதாக தெரிவிக்கப்பட்டுள்ளது.

Tuesday, November 29, 2016

அதிரை ஈசிஆர் சாலை ஆக்கிரமிப்பு அகற்றம்: நேரடி ரிப்போர்ட் ! ( படங்கள் )

அதிராம்பட்டினம், நவ-29
தஞ்சாவூர் மாவட்டம், அதிராம்பட்டினம், ஏரிபுறக்கரை, நரசிங்கபுரம் ஆகிய பகுதிகளில் (ஈசிஆர் சாலை) 10 அடி அகலத்தில் பொதுப்பணித்துறைக்குச் சொந்தமான வாய்க்கால் பகுதியிலுள்ள நீர் நிலை புறம்போக்கு நிலத்தை ஆக்கிரமித்து 66 பேர் வீடு, கடைகள் கட்டியுள்ளனர். இந்த ஆக்கிரமிப்புகளை அகற்றுமாறு பட்டுக்கோட்டை வருவாய்த்துறைக்கு சென்னை உயர்நீதி மன்ற மதுரை கிளை உத்தரவிட்டிருந்தது.

அதன்பேரில் கடந்த செப். 27-ம் தேதி பட்டுக்கோட்டை வருவாய்க் கோட்டாட்சியர் இரா. கோவிந்தராசு தலைமையில் வட்டாட்சியர் ரவிச்சந்திரன், பொதுப்பணித்துறை உதவி செயற்பொறியாளர் (கல்லணைக் கால்வாய்) செல்வராஜ் உள்ளிட்ட அதிகாரிகள் போலீஸ் பாதுகாப்புடன் ஆக்கிரமிப்புகளை அகற்றச் சென்றனர். அப்போது நில ஆக்கிரமிப்பாளர்கள் அதிகாரிகளை சூழ்ந்து கொண்டு, அரசு நிலம் ஆக்கிரமிக்கப்பட்டிருந்தால், அதை அளந்து குறியீடு செய்து, கால அவகாசம் தாருங்கள். நாங்களே ஆக்கிரமிப்புகளை அகற்றிக் கொள்கிறோம் என வாதிட்டனர்.

இதையடுத்து, அவர்களின் கோரிக்கையை ஏற்று ஆக்கிரமிப்புகளை நவ. 28-ம் தேதிக்குள் அகற்றிக் கொள்ள வேண்டுமென அதிகாரிகள் அறிவுறுத்திச் சென்றனர்.

இந்நிலையில், ஆக்கிரமிப்பாளர்கள் அனைவருக்கும் அண்மையில் நினைவூட்டல் கடிதம் அனுப்பப்பட்டது. இதையடுத்து ஆக்கிரமிப்பாளர்களில் சிலர் தாமாகவே முன்வந்து ஆக்கிரமிப்பு செய்து கட்டியுள்ள கட்டிடங்களை ஊழியர்களை கொண்டு இடித்து அப்புறப்படுத்தும் பணியில் நேற்று திங்கள்கிழமை ஈடுபட்டனர்.

இந்நிலையில் அகற்றப்படாமல் இருந்த கடைகள், வீடுகள் உள்ளிட்ட ஆக்கிரமிப்புகளை இன்று செவ்வாய்க்கிழமை பலத்த போலீஸ் பாதுகாப்புடன் அகற்றும் பணிகளில் வருவாய்த்துறை, பொதுப்பணித்துறை அதிகாரிகள் ஈடுபட்டனர். பின்னர் சாலையின் பிரதான பகுதிகளில் எல்லைக்கல் நூண்டப்பட்டு அதில் அடையாள குறியீடு செய்யப்பட்டது.

எக்ஸ்ட்ரா பிட்ஸ்:
1. ஆக்கிரமிப்புகள் அகற்றும் பணி காலை 11 மணி முதல் மாலை 6.30 மணி வரை தொடர்ந்து நடைபெற்றது.

2. 2 ஜேசிபி வாகனங்கள் பயன்படுத்தப்பட்டன.

3. இதில் ஏரிப்புறக்கரை கிராம நிர்வாக எல்லையில் இருந்த 11 வீடுகள், 16 கடைகள், 2 ரைஸ் மில் உள்ளிட்டவையும், அதிராம்பட்டினம் கிராம நிர்வாக எல்லையில் உள்ள 40 வீடுகள் ஆகியன அகற்றப்பட்டன.

4. அதிரை பேருந்து நிலையம் ஈசிஆர் சாலையோரத்தில் இருந்த அரசியல் கட்சிகளின் கொடிக்கம்பங்கள், வர்த்தக நிறுவனங்களின் விளம்பர பதாகைகள் ஆகியன அகற்றப்பட்டன.

5. பட்டுக்கோட்டை ஏ.எஸ்.பி அரவிந்த்மேனன் தலைமையில் அதிராம்பட்டினம் இன்ஸ்பெக்டர் ஜெயக்குமார், மதுக்கூர் இன்ஸ்பெக்டர் தியாகராஜன், திருச்சிற்றம்பலம் சப்இன்ஸ்பெக்டர் ஞானசுமதி உட்பட 120 போலீசார் பாதுகாப்புடன் ஆக்கிரமிப்புகள் அகற்றப்பட்டன.

6. உள்ளூர் அதிகாரிகள் ராஜகுமாரி (வருவாய் ஆய்வாளர்), கிராம நிர்வாக அலுவலர்கள் மகர ஜோதி, ஆனந்த ஜோதி, அருள்மொழி ஆகியோர் இடம்பெற்றனர்.

7. பட்டுக்கோட்டை தீத்தடுப்பு-மீட்புக்குழு நிலைய அலுவலர் மெல்கியூராஜா தலைமையில் தீயணைப்பு வாகனம் மற்றும் வீரர்கள் இடம்பெற்றனர்.

8. ஆக்கிரமிப்பு அகற்றிய போது சுமார் 4 மணி நேரத்திற்கும் மேலாக இப்பகுதியில் மின்சாரம் துண்டிப்பு செய்யப்பட்டன.
 
 
 
 
 
 
 
 
 
 
 
 
 
 

செய்திகளை உடனுக்குடன் மின்னஞ்சலில் பெற...