Pages

Friday, November 24, 2017

அதிராம்பட்டினத்தை தலைமை இடமாகக் கொண்டு தாலுகா அமைக்க சமூக ஆர்வலர்கள் வலியுறுத்தல்!

அதிராம்பட்டினம், நவ.24:
தஞ்சை எம்ஜிஆர் நூற்றாண்டு விழாவில் தமிழக முதல்வர் அறிவிக்கக் கோரிக்கை:

அதிராம்பட்டினத்தை தலைமை இடமாகக் கொண்டு தாலுகா அமைக்க சமூக ஆர்வலர்கள் வலியுறுத்தல்

தஞ்சாவூர் மாவட்டம், அதிராம்பட்டினத்தை தலைமை இடமாகக் கொண்டு தாலுகா அமைக்க வேண்டுமென அரசுக்குக் கோரிக்கை விடுக்கப்பட்டுள்ளது. தஞ்சையில் நவ. 29ம் தேதி நடைபெறவுள்ள எம்ஜிஆர் நூற்றாண்டு விழாவில் பங்கேற்கும் தமிழக முதல்வர் எடப்பாடி கே.பழனிசாமி அதிராம்பட்டினத்தை தலைமையிடமாகக் கொண்டு  புதிய தாலுகா உருவாக்கப்படும் என்று அறிவிக்க வேண்டுமென இப்பகுதி சமூக ஆர்வலர்கள் வலியுறுத்தியுள்ளனர்.

இதுகுறித்து சமூக ஆர்வலர் அதிரை புகாரி கூறியது:
கடந்த 1981 ஆம் ஆண்டு அதிரையில் நடந்த மேல்நிலை குடிநீர்த்தேக்க தொட்டி திறப்பு விழாவில் பங்கேற்ற அன்றைய  தமிழக முதல்வர் எம்ஜிஆர் பேசுகையில், விரைவில் அதிராம்பட்டினத்தை தலைமையிடமாகக் கொண்டு  தாலுகா அலுவலகம் அமைக்கப்படும் என வாக்குறுதி அளித்தார். அவர் அளித்த வாக்குறுதியை இன்றைய தமிழக முதல்வர் எடப்பாடி கே. பழனிசாமி நிறைவேற்ற வேண்டும் என்றார்.

இதுகுறித்து மேலும் சில சமூக ஆர்வலர்கள் கூறியது:

மாணிக்க.முத்துசாமி: 
பட்டுக்கோட்டை வட்டத்தை நிர்வாக வசதிக்காக பட்டுக்கோட்டை கிழக்கு, மேற்கு என இரண்டாகப் பிரித்து, அந்த 2 வட்டங்களும் பட்டுக்கோட்டையை தலைமை இடமாகக் கொண்டு இயங்கச் செய்வது என்று அரசுக்குப் பரிந்துரைக்கப்பட்டு, தற்போது அத்திட்டம் அரசு பரிசீலனையில் உள்ளது. இதில், பட்டுக்கோட்டை கிழக்கு வட்டத்துக்கு மக்கள் தொகை அதிகமுள்ள அதிராம்பட்டினத்தை தலைமை இடமாக  அறிவிக்க வேண்டும்.

அதிரை மைதீன்: 
அதிராம்பட்டினத்தை தலைமை இடமாகக் கொண்டு தாலுகா அமைக்க வேண்டும் என்பது இப்பகுதி மக்களின் நீண்ட நாள் கோரிக்கை. ஒரு காலத்தில் அதிரை மிகப்பெரும் வாணிபப் பகுதியாகவும், சட்டப்பேரவைத்  தொகுதியாகவும் இருந்துள்ளது. இப்பகுதியில் விவசாயிகள், மீனவர்கள் அதிகளவில் உள்ளனர். இவர்கள் தங்களுடைய பல்வேறு தேவைகளுக்காக பட்டுக்கோட்டையிலுள்ள தாலுகா அலுவலகம் செல்ல வேண்டியிருக்கிறது. இதற்காக அதிக நேரத்தை செலவிட வேண்டியுள்ளது. எனவே, அதிரை பகுதி மக்கள் நலன் கருதி, அதிராம்பட்டினத்தை தலைமையிடமாகக் கொண்டு புதிதாக தாலுகா அலுவலகம் அமைப்பதுதான் சரியாக இருக்கும் என்பதை அனைத்து அரசியல் கட்சிகளும், சமூக, தன்னார்வத் தொண்டு அமைப்புகளும் தமிழக அரசிடம் தொடர்ந்து வலியுறுத்த வேண்டும்.

கே.எம்.ஏ. ஜமால் முகமது:
அதிரை பகுதி மக்கள் பட்டா, பல்வேறு சான்றிதழ், நலத்திட்ட உதவிகள் பெற சுமார் 15 கி.மீ. தொலைவில் உள்ள பட்டுக்கோட்டை தாலுகா அலுவலகம் செல்ல வேண்டியுள்ளது. மேலும், இந்த பணிகளுக்காக ஒரு  நாள் முழுவதையும் செலவிட வேண்டி உள்ளது. எனவே, இப்பகுதி மக்களின் நியாமான கோரிக்கையை அரசு கவனத்தில் எடுத்துக்கெண்டு, தஞ்சை மாவட்டத்தின் கடைக்கோடி பகுதியான அதிராம்பட்டினத்தில் தாலுகா அலுவலகம் அமைக்க தமிழக அரசு ஆணை பிறப்பிக்க வேண்டும்.

சார்லஸ்:
அதிராம்பட்டினம் அதன் சுற்றுப் புற பகுதிகளில் அதிக கல்வி நிறுவனங்கள் அமைந்துள்ளன. மிகப்பெரும் பரப்பளவை கொண்டுள்ள இப்பகுதியில் தாலுகா அலுவலகம் அமைந்தால், அதிராம்பட்டினம், அருகிலுள்ள மகிழங்கோட்டை, தொக்காலிக்காடு, ராஜாமடம், புதுப்பட்டினம், மல்லிப்பட்டினம், ஆண்டிக்காடு, கொள்ளுக்காடு, மருதங்காவயல், கூடலிவயல், ஏரிப்புறக்கரை, கீழத்தோட்டம், பழஞ்சூர், மழவேனிற்காடு, ராசியங்காடு, முடிச்சிக்காடு, மஞ்சவயல், நடுவிக்காடு, மிலாரிக்காடு, புதுக்கோட்டை உள்ளூர் உள்ளிட்ட பல கிராமங்களைச் சேர்ந்த மக்கள் மிகவும் பயன் பெறுவர் என்றார்.

அதிராம்பட்டினத்தில் TNTJ சார்பில் தெருமுனைப் பிரசாராக் கூட்டம் !

அதிராம்பட்டினம், நவ.24
தமிழ்நாடு தவ்ஹீத் ஜமாத், அதிராம்பட்டினம் கிளை 1 சார்பில், இஸ்லாமிய மார்க்க விளக்க தெருமுனைப் பிரசாரக் கூட்டம், மேலத்தெரு எம்.எம்.எஸ் வாடி அருகில் வியாழக்கிழமை இரவு நடைபெற்றது.

கூட்டத்திற்கு, கிளைச் செயலாளர் ஹைதர் அலி தலைமை வகித்தார். கூட்டத்தில், அவ்வமைப்பின் மாநில மேலாண்மைக் குழு உறுப்பினர் அஸ்ரப்தீன் பிர்தெளஸி கலந்துகொண்டு, 'சுபஹான மவ்லீது' என்ற தலைப்பிலும், தாவூது கைசர் மிஸ்க், 'நவீன கலாச்சாரத்தால் சீரழியும் இளைஞர்கள்' என்ற தலைப்பிலும் உரை நிகழ்த்தினார்கள். கூட்டத்தில் கிளை பொருளாளர் அல்லா பிச்சை, துணைத் தலைவர் அ.மு அப்துல் வஹாப் உள்ளிட்ட  பலர் கலந்துகொண்டனர்.
 
 
 
 
 
 

Thursday, November 23, 2017

பட்டுக்கோட்டையில் எம்.எல்.ஏ சி.வி சேகர் தலைமையில் அதிமுகவினர் வெடி வெடித்து உற்சாகக் கொண்டாட்டம் (படங்கள்)

பட்டுக்கோட்டை, நவ.23
தமிழக முதல்வர் எடப்பாடி கே. பழனிச்சாமி, துணை முதல்வர் ஓ.பன்னீர் செல்வம் ஆகியோர் அணிக்கே இரட்டை இலை சின்னம் என தேர்தல் ஆணையம் இன்று வியாழக்கிழமை அதிகாரப்பூர்வமாக அறிவித்தது. இதையடுத்து தமிழகமெங்கும் அதிமுகவினர் உற்சாகமாக் கொண்டாடி வருகின்றனர்.

இந்நிலையில், பட்டுக்கோட்டை சட்டமன்ற தொகுதி உறுப்பினர் சி.வி சேகர் எம்.எல்.ஏ தலைமையில், அதிமுகவினர் பட்டுக்கோட்டை மனிகுண்டு அருகில் வெடி வெடித்து, பொதுமக்களுக்கு இனிப்பு வழங்கி உற்சாகமாகக் கொண்டாடி மகிழ்ந்தனர். இந்நிகழ்ச்சியில், பட்டுக்கோட்டை ஒன்றியச் செயலர் சுப்பிரமணியன், ஆதிராஜாராம் உள்ளிட்ட அதிமுகாவினர் பலர்  கலந்துகொண்டனர்.
 

அதிராம்பட்டினத்தில் மரக்கன்றுகள் நடும் பணியில் தன்னார்வலர்கள் (படங்கள்)

அதிராம்பட்டினம், நவ.23
தஞ்சாவூர் மாவட்டம், அதிராம்பட்டினம் மற்றும் சுற்றுப்புற பகுதியில் பசுமையை வலியுறுத்தி மரக்கன்றுகள் நடும் பணியில், அதிராம்பட்டினம் சுகாதார முன்னேற்றக் கழகம் (சுமுக) அமைப்பின் தன்னார்வலர்கள் கடந்த சில வருடங்களாக மரக்கன்றுகள் நடும் பணிகளில் தீவிரமாக ஈடுபட்டு வருகின்றனர். இவ்வமைப்பின் மூலம் அதிராம்பட்டினம் நடுத்தெரு, புதுமனைத்தெரு, சிஎம்பி லேன், ஆலடித்தெரு, பழைய போஸ்ட் ஆபீஸ் சாலை, ஈசிஆர் சாலை, மெயின் ரோடு உள்ளிட்ட பகுதிகளில் மரக்கன்றுகள் நடப்பட்டுள்ளது.

இந்நிலையில், அதிராம்பட்டினம் பழைய போஸ்ட் ஆபீஸ் - கடைத் தெரு செல்லும் சாலையோரத்தில் 10 இடங்களில் மரக்கன்றுகள் நடும் பணி இன்று வியாழக்கிழமை காலை நடைபெற்றது. இதில், புங்கை, வேம்பு, ஆலமரம், வாகை உள்ளிட்ட மரக்கன்றுகள் நடப்பட்டது. இவற்றை ஆடு, மாடு போன்ற கால்நடைகளிடமிருந்து பாதுகாக்க மரக்கன்றை சுற்றி இரும்பிலான வலைக் கூண்டுகள் அமைக்கப்பட்டது. 

இதுகுறித்து அதிரை சுகாதார முன்னேற்ற கழக அமைப்பினர் எஸ்.எச் அஸ்லம், தமீம் ஆகியோர் கூறியது;
'அதிராம்பட்டினம் மற்றும் சுற்றுவட்டார பகுதிகளில் பசுமையை ஏற்படுத்தும் முயற்சியாக பல்வேறு பகுதிகளில் 1000 மரக்கன்றுகள் நடுதல், நீர் நிலைகளை அதிகப்படுத்துதல், குடியிருப்பு பகுதியில் காணப்படும் கருவேல மரங்களை அகற்றுதல், பிளாஸ்டிக் ஒழிப்பு ஆகியவற்றை இலக்காகக் கொண்டு, இப்பகுதி தன்னார்வலர்களின் கூட்டு முயற்சியாக இப்பணிகளை கடந்த சில வருடங்களாக செயல்படுத்தி வருகிறோம். இதுவரையில் 800 க்கும் மேற்பட்ட மரக்கன்றுகள் நட்டுள்ளோம். நாங்கள் நட்ட பல கன்றுகள் இன்று பெரிய மரங்களாக வளர்ந்து  சுற்றுச்சூழலலுக்கு பாதுகாப்பு அளிக்கின்றன. இப்பணி தொடர்ந்து நடைபெறும்' என்றனர்.
 
 
 
 
 

அதிராம்பட்டினத்தில் அதிமுகவினர் வெடி வெடித்து உற்சாகக் கொண்டாட்டம் (படங்கள்)

அதிராம்பட்டினம், நவ.23
தமிழக முதல்வர் எடப்பாடி கே. பழனிச்சாமி, துணை முதல்வர் ஓ.பன்னீர் செல்வம் ஆகியோர் அணிக்கே இரட்டை இலை சின்னம் என தேர்தல் ஆணையம் இன்று வியாழக்கிழமை அதிகாரப்பூர்வமாக அறிவித்தது. இதையடுத்து தமிழகமெங்கும் அதிமுகவினர் உற்சாகமாக் கொண்டாடி வருகின்றனர்.

இந்நிலையில், அதிமுக அதிராம்பட்டினம் பேரூர் சார்பில், அதன் செயலாளர் ஏ.பிச்சை தலைமையில், பேருந்து நிலையம் அருகே அதிமுகவினர் வெடி வெடித்து உற்சாகமாகக் கொண்டாடி மகிழ்ந்தனர்.
 
   

ஜித்தா வெள்ளத்தில் சிக்கிய சவுதி முதியவரை காப்பாற்றிய ஓட்டுனருக்கு குவியும் பாராட்டு!

அதிரை நியூஸ்: நவ.23
சவுதி அரேபியா, ஜித்தா வெள்ளத்தில் சிக்கிய சவுதி முதியவரை காப்பாற்றிய பிலிப்பைனி டிரைவரருக்கு குவியும் பாராட்டு.

ஜித்தாவில் ஒரு வீட்டில் டிரைவராக பணியாற்றிவரும் தாவூது பலின்தோங் என்ற 37 வயது வீட்டு டிரைவர் காரினுள் வெள்ளத்தில் சிக்கி முழ்கிக் கொண்டிருந்த முதிய சவுதி ஒருவரை துணிச்சலுடன் காப்பாற்றிய செயல் பலரது பாராட்டையும் பெற்றுத் தந்துள்ளது.

ஜித்தாவின் கிழக்குப் பகுதியில் அமைந்துள்ள அப்ருக் அல் ரிகாமா என்ற பகுதியில் ஏற்பட்ட மழை வெள்ளத்தில் முதிய சவுதி ஒருவர் காருடன் சிக்கி முழ்கிக் கொண்டிருந்தார். இச்சம்பவத்தை பார்த்துக் கொண்டிருந்த தாவூது பலின்தோங் உடனடியாக நீந்திச் சென்று அம்முதியவரை காப்பாற்றிக் கரை சேர்த்தார்.

தாவூது காப்பாற்றச் செல்லும் போது பலர் போக வேண்டாம் என தடுத்துள்ளனர், இன்னும் சிலர் சிவில் டிபன்ஸ் (தீயணைப்புத்துறை) வந்து காப்பாற்றும் எனக்கூறியுள்ளனர். இன்னும் சிலர் பொறுப்புடன் இச்சம்பவத்தை வீடியோ எடுத்து சமூக வலைத்தளங்களில் பகிர்ந்து கொண்டுள்ளனர் ஆனால் இதில் எதையுமே கவனத்தில் கொள்ளாத தாவூது தனது கடமையை செய்தார். மேலும், என்னுடைய மனிதாபிமான கடமையை செய்தேன் இதற்காக நான் பாராட்டப்படுவதை விரும்பவில்லை என பொட்டிலடித்தாற் போல் கூறினார்.

இவ்வளவு சம்பவங்கள் நடைபெற்ற நிலையில் அங்கிருந்த 2 தீயணைப்புத் துறை ஊழியர்கள் இருவர் பிறரைப் போல் இச்சம்பவத்தை வேடிக்கை மட்டுமே பார்த்துள்ளனர். அவர்கள் மீது துறைரீதியான நடவடிக்கைகள் பாய்ந்துள்ளது.

Source: Saudi Gazette / Msn
தமிழில்: நம்ம ஊரான் 

குவைத்தில் 2 முறை போக்குவரத்து விதி மீறும் வெளிநாட்டவர்கள் நாடு கடத்தப்படுவர்

அதிரை நியூஸ்: நவ.23
குவைத்தில் 2 முறை போக்குவரத்து சட்டத்தை மீறும் வெளிநாட்டவர்கள் நாடு கடத்தப்படுவர் என தெரிவிக்கப்பட்டுள்ளது.

குவைத்தில் 2 முறை சீட் பெல்ட் அணியாமல் அல்லது மொபைல் போனில் பேசியபடி வாகனம் ஓட்டி பிடிபட்டால் வெளிநாட்டவர்கள் உடனடியாக நாடு கடத்தப்படுவார்கள் என பொது உறவுகள் மற்றும் ஊடகப் பாதுகாப்புகளுக்கான தலைவர் பிரிகேடியர் ஆதில் அல் ஹஷ்ஷாஷ் தெரிவித்துள்ளார்.

குவைத்தியர் மற்றும் வெளிநாட்டவர்கள் என அனைவரும் போக்குவரத்து சட்டத்தை கட்டாயம் பின்பற்ற வேண்டும் எனவும் வலியுறுத்தினார்.

அதேவேளை இதுபோன்ற சிறு தண்டனைக்குரிய தவறுகளுக்கு நாடு கடத்தல் என்பது மிகவும் மிகைப்படுத்தப்பட்ட தண்டனை என சட்ட நிபுணர்களும், பாராளுமன்ற உறுப்பினர்களும் தெரிவித்துள்ளனர். இதுபோல் வெளிநாட்டவர்களை நாடு கடத்தினால் பின்விளைவாக வெளிநாட்டிலுள்ள குவைத்தியர்களும் குறிப்பாக மாணவர்கள் இத்தகைய சட்டங்களை சந்திக்க நேரிடும் எனவும் எச்சரித்துள்ளனர்.

மேலும், சீட் பெல்ட் அணியாதது, மொபைல் போனில் பேசுவது, சாலையில் கண்ட இடங்களிலும் வாகனத்தை நிறுத்துவது மற்றும் பார்க்கிங் இல்லாத பகுதிகளில் பார்க்கிங் செய்வது போன்ற குற்றங்களுக்காக மாதக் கணக்கில் வாகனங்களை பிடித்து வைப்பதற்கும் குவைத்தியர்கள் மத்தியில் பலத்த எதிர்ப்பு எழுந்துள்ளதுடன் இத்தகைய சட்டங்களை மறுபரிசீலணை செய்ய வேண்டும் என்ற குரல்களும் எழும்பத் துவங்கியுள்ளன.

Source: Gulf News
தமிழில்: நம்ம ஊரான் 

அமீரகத்தில் 14 ஆண்டுகள் பிரிவுக்குப் பின் தந்தையுடன் இணைந்த பெண் குழந்தைகள் !

அதிரை நியூஸ்: நவ.23
அமீரக ஷார்ஜாவில் 14 ஆண்டுகள் பிரிவுக்குப் பின் தந்தையுடன் இணைந்த பெண் குழந்தைகள்

ஷார்ஜாவைச் சேர்ந்த இமராத்தி ஒருவர் வெளிநாட்டு பெண் ஒருவரை மணந்திருந்தார், காலப்போக்கில் இருவரும் விவாகரத்து பெற்று பிரிய நேரிட்டது என்றாலும் அவருடைய 2 சிறு பெண் குழந்தைகளையும் தன்னோடு அழைத்துச் சென்றுவிட்டார் அந்தப்பெண்.

தந்தை தனது குழந்தைகளை பார்க்க விரும்பும் போதெல்லாம் ஏதாவது காரணம் சொல்லி முட்டுக்கட்டை போட்டு வந்ததால் கடந்த 14 ஆண்டுகளாக தனது குழந்தைகளை காணாமல் இருந்துள்ளார்.

பெண் குழந்தைகளுடன் சென்ற அந்தப்பெண் சுமார் 2 வருடங்களுக்கு முன் தனது 2 பெண் குழந்தைகளையும் பக்கத்து வீட்டு இமராத்தி குடும்பத்திடம் ஒப்படைத்துவிட்டு சொல்லாமல் கொல்லாமல் முகவரியும் தராமல் தனது நாட்டிற்கு சென்றுவிட்டார், அத்துடன் அவர் தொடர்பு அறுந்தது.

2 குழந்தைகளை வளர்த்த பக்கத்துவீட்டு இமராத்தி குடும்பம் ஷார்ஜா அரசின் குடும்பநல ஆதரவு மையத்திற்கு தெரிவித்ததை தொடர்ந்து 14 வருடங்களுக்குப் பின் 2 பெண் குழந்தைகளும் தனது தந்தையுடன் இணைந்தனர். தற்போது அக்குழந்தைகளின் வயது முறையே 15 மற்றும் 17 ஆகும்.

Source: Gulf News
தமிழில்: நம்ம ஊரான் 

நீரா பானம் தயாரிக்க அனுமதி அளிக்க கோரிக்கை!

பேராவூரணி நவ.23
தென்னை விவசாயிகள் பயன்பெறும் வகையில், அறிவித்தபடி நீரா பானம் தயாரிக்க அனுமதி அளிக்கவும், பயிற்சி அளிக்கவும், விற்பனை செய்யவும் தமிழக அரசு உரிய ஏற்பாடுகளை செய்யவேண்டும் என
சேதுபாவாசத்திரம் ஒன்றிய மாநாட்டில் கோரிக்கை விடுக்கப்பட்டது.

தஞ்சாவூர் மாவட்டம் சேதுபாவாசத்திரம் மார்க்சிஸ்ட் கம்யூனிஸ்ட் கட்சியின் 12 ஆவது ஒன்றிய மாநாடு புதன்கிழமை அன்று ரெட்டவயல் கே.எம்.டி திருமண மண்டபம் மக்கள் எழுத்தாளர் மேலாண்மை பொன்னுசாமி நினைவரங்கில் நடைபெற்றது.

மாவட்டக்குழு உறுப்பினர் வீ.கருப்பையா, ஆ.முருகையன்  மாநாட்டிற்கு தலைமை வகித்தனர். ஒன்றியக்குழு உறுப்பினர் பி.பெரியண்ணன் வரவேற்றார். ஒன்றியச்செயலாளர் ஆர்.எஸ்.வேலுச்சாமி வேலையறிக்கை, வரவு-செலவு அறிக்கை தாக்கல் செய்தார். ஒன்றியக்குழு உறுப்பினர்கள் கே.குத்புதீன், பி.பெரியண்ணன் மற்றும் ஆர்.எம்.வீரப்பெருமாள் தீர்மானங்களை முன்மொழிந்து பேசினர். முன்னதாக  மாநிலக்குழு உறுப்பினர் ஜி.நீலமேகம் மாநாட்டை தொடங்கி வைத்து பேசினார்.
மாவட்ட செயற்குழு உறுப்பினர் எம்.மாலதி வாழ்த்திப் பேசினார்.
நிறைவாக மாவட்ட செயற்குழு உறுப்பினர் ஆர்.சி.பழனிவேலு மாநாட்டு நிறைவுரையாற்றினார்.

இம்மாநாட்டில்  ஒன்றியச் செயலாளராக ஆர்.எஸ்.வேலுச்சாமி மீண்டும் தேர்வு செய்யப்பட்டார். மேலும் ஒன்றியக்குழு உறுப்பினர்களாக வீ.கருப்பையா, பி.பெரியண்ணன், கே.குத்புதீன், ஏ.வெங்கடாசலம், ஆ.இளங்கோ, ஏ.சையது முகமது, எம்.வேலுச்சாமி ஆகியோர்  தேர்வு செய்யப்பட்டனர்.

தீர்மானங்கள்: 
இம்மாநாட்டில், ' தென்னை விவசாயிகள் பயன்பெறும் வகையில், தமிழக அரசு ஏற்கனவே  அறிவித்தபடி நீரா பானம் உற்பத்திக்கு  அனுமதி அளிக்கவும், மதிப்புக்கூட்டப்பட்ட நீரா பானம் தயாரிக்க பயிற்சி அளிக்கவும், விற்பனை செய்யவும் தமிழக அரசு உரிய ஏற்பாடுகளை செய்யவேண்டும்.

கடைமடைப் பகுதிகளுக்கு முறைவைக்காமல் தண்ணீர் விடவும், ஏரி, குளங்களை நிரப்பித்தர உரிய நடவடிக்கை எடுக்க வேண்டும்.

பேராவூரணி அரசு மருத்துவமனையை தரம் உயர்த்த வேண்டும்.

மல்லிப்பட்டினம் துறைமுக சாலையை அமைத்து தரவேண்டும்.

தேங்காய் கொப்பரை விலையை ரூ 61 லிருந்து 122 ரூபாயாக உயர்த்தி வழங்க வேண்டும். கேரள கூட்டுறவு சங்கங்களில் உள்ளது போல உரித்த தேங்காய் கிலோ ரூ 41 என அரசே கொள்முதல் செய்யவேண்டும்.

பள்ளி, கல்லூரி செல்லும் நேரங்களில் பேருந்துகளை இயக்க வேண்டும். நிறுத்தப்பட்ட வழித்தடங்களில் பேருந்துகளை இயக்க வேண்டும்.

தனிநபர் கழிப்பறை கட்ட அரசு வழங்கும் தொகை ரூ 12 ஆயிரத்திற்கு பதிலாக ரூ 36 ஆயிரம் வழங்க வேண்டும்' என்பன உள்ளிட்ட தீர்மானங்கள் நிறைவேற்றப்பட்டது.

முன்னதாக ரெட்டவயல் கடைவீதியில் இருந்து மாநாட்டு மண்டபம் வரை நூற்றுக்கும் மேற்பட்ட கட்சியினர் ஊர்வலமாக சென்றனர். மாவட்ட குழு உறுப்பினர் வீ.கருப்பையா மாநாட்டு கொடியேற்றி வைத்தார்.

Wednesday, November 22, 2017

டின்களில் பதப்படுத்தப்பட்ட உணவுகளின் தீங்கு குறித்து துபை மாநகராட்சி எச்சரிக்கை

அதிரை நியூஸ்: நவ.22
டின்களில் பதப்படுத்தப்பட்ட உணவுகளின் தீங்கு குறித்து துபை மாநகராட்சி எச்சரிக்கை

வளைகுடா நாடுகளில் டின்களில் பதப்படுத்தப்பட்ட பல்வேறு உணவுகள் (canned foods) விற்பனையாவதும், காலத்தின் சூழல் கருதி அதை பயன்படுத்துவோரும் ஏராளமானோர் உள்ளனர். இந்த டின் உணவுகளை குறித்து துபை மாநகராட்சியின் ஒரு அங்கமாக செயல்படும் துபை மத்திய ஆய்வகத்தின் (Dubai Central Lab) 4 நிபுணர்கள் மேற்கொண்ட சோதனையில் அதிர்ச்சிகர உண்மைகள் வெளியாகியுள்ளன. இந்த ஆய்வு முடிவுகள் சமீபத்தில் துபையில் நடைபெற்ற 11வது சர்வதேச உணவு பாதுகாப்பு கருத்தரங்கிலும் சமர்ப்பிக்கப்பட்டன.

மேற்காணும் ஆய்வின்படி, டின்கள் (தகரம்) சிறுகச்சிறுக கரைந்து டின்களில் அடைத்து விற்கப்படும் உணவுகள் மற்றும் பானங்களுடன் ஒன்றோடு ஒன்றாக ஐக்கியமாகி விடுகிறதாம். இதனை உட்கொள்வோருக்கு வயிற்றுப்போக்கு மற்றும் இதர குடல், இரப்பை நோய்களும் வருகிறதாம். மேலும் தோல் எரிச்சல், ஈரல், கல்லீரல், சுற்றோட்ட நரம்பு திசுக்கள் ஆகியவை பழுதடைந்து நாள்பட நீடிக்கும் பலவகையான தொந்தரவுகளை தருகிறதாம்.

துபை முழுவதிலிழுமிருந்து சுமார் 250 மாதிரிகள் பல்வேறு சூப்பர் மார்க்கெட்டுகள் மற்றும் சில்லரை கடைகளிலிருந்து ஆய்வுக்காக சேகரிக்கப்பட்டன. குறிப்பாக அன்னாசி, அவரை, பல்வேறு காய்கறிகள், காளான், தக்காளி, பழச்சாறுகள், கலவையான பழங்கள், மாட்டிறைச்சி, டுனா மீன்கறி, மத்தி மீன் மற்றும் ஆலிவ் போன்றவை சோதனை செய்யப்பட்டதில் மாட்டிறைச்சி, டுனா மீன்கறி, மத்தி மீன் மற்றும் ஆலிவ் அடைக்கப்பட்ட டின்கள் மட்டும் கரையாமல் இருந்தன. அதேவேளை பழச்சாறுகள், பழக்கலவைகள், காளான், தக்காளி மற்றும் அன்னாசியுடன் டின் கரைந்து கலந்திருந்தது உறுதியானது.

ஓவ்வொரு டின் குவளையிலும் 200ppm (parts per million) என்ற அளவே அனுமதிக்கப்பட்டது. இதுவே அமிலத்தன்மையுடைய காய்கறிகளான (acidic content vegetables)  தக்காளி மற்றும் பழங்களில் ppm கூடுதலாக காணப்படும். இந்த கூடுதல் குறைவு அளவுகளை சிலரது உடல்கள் ஏற்றுக்கொள்ளும் அதேவேளையில் பலருக்கு ஒவ்வாமையையும் ஏற்படுத்தும் என்றாலும் தற்போதைய நிலையில் அவற்றை சாப்பிட தடை ஏதுமில்லை.

புதப்படுத்தப்பட்ட டின் குவளை உணவுகளை திறந்தவுடன் அதிலுள்ளவற்றை உடனடியாக ஒரு கண்ணாடி பாத்திரத்திற்கு மாற்றி விடவும். மேலும் திறக்கப்பட்ட டின்னை பகுதியளவு பயன்படுத்திய பின் மீண்டும் குளிர்சாதனப் பெட்டிக்குள்ளோ அல்லது வெளியையோ வைக்க வேண்டாம். மேலும் அந்த டின் குவளையை கொண்டு நீர் அருந்த வேண்டாம். பதப்படுத்தப்பட்ட உணவுகளுடன் வரும் தண்ணீரையும் பயன்படுத்தாதீர் அதில் தான் டின் கரைந்து கலந்திருக்கும்.

நிபுணர்களின் அறிவுறுத்தலுக்குப் பின், கடைகளில் வைக்கப்படும் டின்களின் அனுமதிக்கப்பட்ட கால அளவை குறைக்கவும், டின் உணவு தயாரிப்பாளர்கள் டின்னின் அடிப்பாக தரத்தை உயர்த்தவும் கேட்டுக் கொள்ளப்படுவார்கள் என துபை மநகராட்சி தெரிவித்துள்ளது.

Source: Gulf News
தமிழில்: நம்ம ஊரான்

அமீரக கொர்பக்கான் வெள்ளத்தில் அடித்துச் செல்லபட்ட இந்திய மாணவர் உடல் ஓமன் நாட்டு அணையில் கண்டுபிடிப்பு !

அதிரை நியூஸ்: நவ.22
அமீரகம் கொர்பக்கான் வெள்ளத்தில் அடித்துச் செல்லப்பட்ட இந்திய
மாணவரின் உடல் ஓமன் நாட்டு அணையில் கண்டுபிடிப்பு.

கடந்த நவம்பர் 16 ஆம் தேதி ராஸ் அல் கைமாவிலிருந்து கொர்பக்கானுக்கு சுற்றுலா சென்ற 6 இந்திய மாணவர்களின் வாகனம் திடீர் வெள்ளத்தில் சிக்கியதும் அதிலிருந்து 5 பேர் காப்பற்றப்பட்டதும் அறிந்ததே.

காருடன் காணாமல் போன 18 வயது மாணவன் ஆல்பர்ட் ஜாயை தேடும் பணியில் துபை, ஷார்ஜா, அபுதாபி போலீஸார் ஈடுபட்டதுடன் ஹெலிகாப்டர் மற்றும் மோப்ப நாய்களும் தேடல்களில் பயன்படுத்தப்பட்டு வந்தது.

இந்நிலையில், வெள்ளநீரில் அடித்துச் செல்லப்பட்ட மாணவனின் உடல் ஓமன் நாட்டின் 'மதா அணையில்' இன்று காலை 11.30 மணியளவில் ராயல் ஓமன் போலீஸாரால் கண்டுபிடிக்கப்பட்டு, உடல் மீட்கப்பட்டுள்ளது. மாணவனின் தந்தை உடலை அடையாளம் காண்பதற்காக ஓமன் புறப்பட்டுச் சென்றுள்ளார்.

Source: Gulf News
தமிழில்: நம்ம ஊரான் 

அமீரகத்தில் தனியார் நிறுவனங்கள் விடுமுறை அறிவிப்பு!

அதிரை நியூஸ்: நவ.22
அமீரகத்தில் முன்பே எதிர்பார்த்திருந்தபடியே தனியார் துறை ஊழியர்களுக்கு 3 நாள் தொடர் விடுமுறை அறிவிக்கப்பட்டுள்ளது. மீலாது நபி, தியாகிகள் தினம் மற்றும் அமீரக தேசிய தினம் ஆகியவை கடைபிடிக்கப்படுவதால் எதிர்வரும் நவம்பர் 30 ஆம் தேதி முதல் டிசம்பர் 2 ஆம் தேதி வரை விடுமுறை அறிவிக்கப்பட்டுள்ளது.

அரசுத்துறை ஊழியர்களுக்கு 4 நாட்களுக்கு தொடர் விடுமுறை விடப்பட்டுள்ளது குறித்து முன்பே அதிரை நியூஸில் பதிந்திருந்தோம், அவர்களுடைய வேலைநாள் டிசம்பர் 4 ஆம் தேதியிலிருந்து மீண்டும் துவங்கும்.

Source: Gulf News
தமிழில்: நம்ம ஊரான் 

அமீரகத்தில் கட்டுமானப் பணியில் ஈடுபட்ட தொழிலாளி மண்சரிந்து மரணம்!

அதிரை நியூஸ்: நவ.22
அமீரகம், ராஸ் அல் கைமாவில் நடைபெற்று வந்த ஒரு கட்டுமான தளத்தில் நேற்று செவ்வாய்க்கிழமை ஏற்பட்ட திடீர் மண்சரிவுக்குள் புதைந்து 30 வயது மதிக்கத்தக்க ஒரு ஆசிய நாட்டவர் மரணமடைந்தார் மேலும் 25 மற்றும் 30 வயதுடைய இருவர் காயங்களுடன் மீட்கப்பட்டனர்.

சம்பவ இடத்திற்கு விரைந்து வந்த சிவில் பாதுகாப்புத் துறையினர் பாதுகாப்பு நடவடிக்கைகளை பலப்படுத்தியதுடன் மண்ணில் புதைந்திருந்தவரின் சடலத்தை அதற்குரிய சிறப்பு வாகன உதவியுடன் மீட்டெடுத்தனர்.

Source: Gulf News
தமிழில்: நம்ம ஊரான் 

அதிராம்பட்டினத்தில் ரேஷன் கடைகள் முன்பாக திமுகவினர் ஆர்ப்பாட்டம் (படங்கள்)

அதிராம்பட்டினம், நவ.22
தமிழகத்தில் ரேஷன் கடைகளில் வழங்கப்படும் சர்க்கரையின் விலை கடந்த 1-ம் தேதி முதல் கிலோவுக்கு ரூ.13.50-ல் இருந்து ரூ.25 ஆக உயர்த்தப்பட்டுள்ளது. இதைக் கண்டித்து திமுக சார்பில் தமிழகம் முழுவதும் அனைத்து ரேஷன் கடைகள் முன்பு இன்று புதன்கிழமை காலை ஆர்ப்பாட்டம் நடைபெற்று வருகிறது.

அதன் ஒரு பகுதியாக, தஞ்சாவூர் மாவட்டம், அதிராம்பட்டினத்தில் திமுக சார்பில், ரேஷன் கடைகள் முன்பாக ஆர்ப்பாட்டம் நடைபெற்றது.

திமுக தஞ்சை தெற்கு மாவட்ட சிறுபான்மை நலப்பிரிவு துணை அமைப்பாளர் எஸ்.எச் அஸ்லம் தலைமையில், பட்டுக்கோட்டை ஒன்றிய பிரதிநிதிகள் அப்துல் ஹலீம், மருதையன் ஆகியோர் முன்னிலையில், அதிராம்பட்டினம் செக்கடி மேடு, கடைத்தெரு, மரைக்கா பள்ளிவாசல் வளாகம், மேலத்தெரு, கடற்கரைத் தெரு ஆகிய பகுதிகளில் உள்ள ரேஷன் கடைகள் முன்பாக ஆர்ப்பாட்டம் நடைபெற்றது. இதில், திமுகவினர் 50 க்கும் மேற்பட்டோர் கலந்துகொண்டு, சர்க்கரை விலை உயர்வை கண்டித்து முழக்கமிட்டனர்.

அதே போல், திமுக அதிராம்பட்டினம் பேரூர் செயலர் இராம. குணசேகரன் தலைமையில், தஞ்சை தெற்கு மாவட்ட கலை இலக்கிய பகுத்தறிவுப் பேரவை அமைப்பாளர் பழஞ்சூர் K. செல்வம், அதிரை பேரூர் அவைத் தலைவர் ஜெ.சாகுல் ஹமீது ஆகியோர் முன்னிலையில், அதிராம்பட்டினம் கடைத்தெரு, மரைக்கா பள்ளிவாசல், சி.எம்.பி லேன், மேலத்தெரு, கடற்கரைத்தெரு, தரகர் தெரு, அண்ணா தெரு, பிஎஸ்என்எல் அலுவலகம் அருகில், செக்கடி மேடு ஆகிய பகுதிகளின் ரேஷன் கடைகள் முன்பாக ஆர்ப்பாட்டம் நடைபெற்றது. இதில், திமுகவினர் 50 க்கும் மேற்பட்டோர் கலந்துகொண்டு சர்க்கரை விலை உயர்வை கண்டித்து முழக்கமிட்டனர்.
 
 
 
 
 

செய்திகளை உடனுக்குடன் மின்னஞ்சலில் பெற...