Pages

Saturday, September 30, 2017

அதிராம்பட்டினம் அரசு மருத்துவமனையில் காது, மூக்கு, தொண்டை எண்டோஸ்கோபி பரிசோதனை சேவை தொடக்கம் (படங்கள்)

அதிராம்பட்டினம், செப்.30
அதிராம்பட்டினம் அரசு மருத்துவமனை காது மூக்கு தொண்டை பிரிவில் நவீன கருவி மூலம் பரிசோதனை சேவை தொடக்கம்.

தஞ்சாவூர் மாவட்டம், அதிராம்பட்டினம் அரசு மருத்துவமனை காது மூக்கு தொண்டை பிரிவில் வீடியோ எண்டோஸ்கோபி முறையில் பரிசோதனை சேவையை, மருத்துவமனை தலைமை மருத்துவர் ஏ.அன்பழகன் தலைமை வகித்து, வெள்ளிக்கிழமை தொடங்கி வைத்தார். மருத்துவமனையின் காது மூக்கு தொண்டை சிறப்பு மருத்துவர் எஸ். கார்த்திகேயன் நவீன கருவி மூலம் பரிசோதனையை மேற்கொண்டார். இதில் 50 பேருக்கு மருத்துவ ஆலோசனை மற்றும்  சிகிச்சை அளிக்கப்பட்டது.

இதுகுறித்து அதிரை அரசு மருத்துவமனை தலைமை மருத்துவர் ஏ. அன்பழகன் கூறியது;
'அதிராம்பட்டினம் அரசு மருத்துவமனையில் எண்டோஸ்கோபி பரிசோதனைக் கருவி மூலம் காது, மூக்கு, தொண்டையில் ஏற்பட்டுள்ள  பாதிப்புகளை கண்டறிந்து, அதற்கான மருத்துவ ஆலோசனை மற்றும் சிகிச்சை பிரதி வாரம் புதன்கிழமை தோறும் நடைபெற உள்ளது. இவ்வாய்ப்பினை அதிராம்பட்டினம் மற்றும் சுற்றுப்புற கிராமப் பகுதியினர் பயன்படுத்திக்கொள்ள வேண்டும்' என்றார்.

இந்நிகழ்ச்சியில், அதிராம்பட்டினம் அரசு மருத்தவமனை மகப்பேறு மருத்துவர் கெளசல்யா, செவிலியர்கள் கலந்துகொண்டனர்.
 

அதிராம்பட்டினத்தில் நாய்கள் கடித்து மான் சாவு (படங்கள்)

அதிராம்பட்டினம், செப்.30
அதிராம்பட்டினத்தில் தண்ணீருக்காக ஊருக்குள் வந்த பெண் புள்ளிமானை நாய் விரட்டி கடித்ததில் மான் இறந்தது.

தஞ்சாவூர் மாவட்டம், அதிராம்பட்டினம் செடியன் குளம் மேல்கரை அருகே சுமார் 4 முதல் 5 வயது மதிக்கத்தக்க பெண் புள்ளிமானை, நாய்கள் விரட்டி கடித்ததில் உடலில் காயங்களுடன் சனிக்கிழமை காலை இறந்து கிடந்தது. இதுகுறித்து தகவல் அறிந்த ஏரிப்புறக்கரை கிராம நிர்வாக அலுவலர் பி. ஆனந்த ஜோதி, வனத்துறைக்கு தகவல் தெரிவித்தார்.

அதிராம்பட்டினம் வருவாய் ஆய்வாளர் வி. முத்துலட்சுமி, முத்துப்பேட்டை வனச்சரக வனக்காப்பாளர் பி. மாரிமுத்து, அதிராம்பட்டினம் வனக்காவலர் சிவனேசன், பட்டுக்கோட்டை வனச்சரக வனக்காப்பாளர் எல். பன்னீர்செல்வம், வனக்காவலர் ஆர்.சீனிவாசன் ஆகியோர் முன்னிலையில், அதிராம்பட்டினம் கால்நடை மருத்துவமனை மருத்துவர் சி.தெய்வ விருத்தம் உடற்கூறாய்வு செய்தார். பின்னர் வனச்சரகர்கள் குளக் கரையின் அருகிலேயே பாதுகாப்பாக புதைத்தனர்.

சரணாலயத்தில் நிலவும் தண்ணீர் தட்டுப்பாட்டால் வனப் பகுதியைவிட்டு வெளியே வரும் மான்கள் நாய்களால் கடிக்கப்பட்டு உயிரிழக்கின்றன.

மிரட்டும் டெங்கு ~ மிரளும் அரசு ~ அதிரை பாருக் கூறும் அறிவுரை !

அதிரை பாருக்
அதிரை நியூஸ்: செப். 30
சமீப காலமாக அரசை மட்டுமன்றி மக்களையும் வெகுவாக மிரட்டிக் கொண்டிருக்கும் நோய்களில் டெங்கு காய்ச்சல் (Dengue fever) தமிழகத்தின் பெரும்பான்மையான ஊர்களில் முதலிடத்திற்கு வந்துள்ளது.இந்த நிலையில் சில நாட்களாக எனக்கு உதித்த சில கருத்துக்களை அரசுக்கும் மக்களுக்கும் உடனடியாக தெரிவிக்கவேண்டி இந்த தகவல்களை வெளியிடுகின்றேன்.

இதை ஏற்றுக்கொள்வதும் சரிப்பட்டு வராது என விட்டுவிடுவதும் அவரவர் விருப்பத்தைப் பொறுத்தது. நான் யாரையும் இந்த விஷயத்தில் கட்டாயப்படுத்த விரும்பவில்லை. எந்த ஒரு விஷயத்தையும் ஆராய்ச்சி மனப்பான்மையுடன், ஆன்மீக சிந்தனையுடன் கூர்ந்து கவனிக்கும் போது மட்டும் தான் முடிவு காண முடியும்.

தமிழகத்தில் 7000 பேர்களுக்கு டெங்கு பாதிப்பு எனவும் 8000 பேர்களுக்கு பாதிப்பு எனவும் நிலைமை விரைவில் சீரடையும் எனவும் பல்வேறு தகவல்கள் தொடர்ந்து வந்துகொண்டிருக்கின்றன. அரசு மருத்துவமனைகளில் இதற்கான சரியான சிகிச்சை முறைகள் சிறப்பாக உள்ளதாக அரசு தரப்பில் பரிந்துரைக்கப்படுகின்றது. ஆனால் அரசு மருத்துவமனைகளில் இது போன்ற நோய்களுக்கு சிகிச்சை பெற்றும் பலன் இல்லாமல் மரணம் நிகழ்ந்ததாக தகவல்கள் வருகின்றன. இதே போல் தனியார் மருத்துவமனைகளில் சிகிச்சை செய்து கொண்ட பலர் இறந்துவிட்டதாகவும் அவ்வப்போது தொடர் செய்திகளாக வந்துகொண்டிருப்பது. அரசையும் மக்களையும் கவலைக்குள்ளாக்கியுள்ளது என்பது மறுக்க முடியாத உண்மை.

மர்ம காய்ச்சல்:  
கொசுவால் பரவுகிறது, எலியால் பரவுகிறது,பன்றிகளால் பரவுகிறது என பல்வேறு பொதுவான,புரியாத காரணங்கள் கூறப்பட்டாலும் மர்ம காய்ச்சல் என்பதன் பொருள் என்ன? என்ன காரணம் என்பது தெரியாத காரணத்தால் இதுபோன்ற சில காய்ச்சலுக்கு மர்ம காய்ச்சல் என்று விளக்கம் கூறப்படுகின்றது.

சூரத்தில் (Surat- Gujarat) 1994 ல் பிளேக் (plague) எனும் கொடிய கொள்ளை நோய் பரவி மக்களை அச்சுறுத்தியதை யாராலும் மறக்க முடியாது.அந்த நேரத்தில் பம்பாயில் செயல்பட்ட பல்வேறு வெளிநாட்டு தூதரகங்களும், கான்சுலேட்களும் (Consulates) உடனடியாக மூடப்பட்டதும் யாவரும் அறிந்த ஒன்று. இதனால் பலரது விசாக்கள் காலாவதியானது.இந்த நோய்க்கு எலியே காரணம் எனக்கூறி நாட்டில் பல பகுதிகளிலும் எலிகள் கொல்லப்பட்டன. அப்போது இந்த பிளேக் நோய்க்கும் எலிகளுக்கும் எந்த தொடர்பும் இல்லை என்று நான் பலரிடமும் கூறியது எனக்கு ஞாபகம் உள்ளது.அந்த நோய் கிருமி தனியாக அடைக்கப்பட்டு பரிசோதனைக்காக அமெரிக்காவுக்கு அனுப்பப்பட்டது அப்போது நான் சொன்னது இந்த நோய்க்கும் எலிகளுக்கும் சம்பந்தம் இல்லை என்ற செய்தி அங்கிருந்து ரிசல்ட்டாக வரும் என்பதுதான். சில வாரங்கள் கழித்து இந்த செய்திதான் அமெரிக்காவிலிருந்து இந்தியாவிற்கு பதிலாக தெரிவிக்கப்பட்டது. அதாவது சூரத்தில் பரவிய பிளேக் நோய்க்கும் எலிகளுக்கும் தொடர்பில்லை என்றும் என்ன காரணம் என்று தெரியவில்லை என்பதுதான் அந்த பதிலாக இருந்தது.அந்த நோய் இறைவனின் கோபப்பார்வையால் மனிதர்கள் மீது ஏவப்பட்ட ஒன்று.அது போல் தற்போது தமிழகத்தை மிரட்டிக்கொண்டிருக்கும் பல்வேறு காய்ச்சலுக்கும் அதுபோன்ற கோபப்பார்வையே பிரதான காரணம் என்பதை அரசும் மக்களும் விளங்கிக்கொள்ள வேண்டும். என்னென்ன காரணங்கள் என்பதெல்லாம்  மக்களுக்கும் அரசுக்கும் தெரியத்தான் செய்யும்.

சவூதி அரேபியா (Saudi Arabia) போன்ற நாடுகளின் இது போன்ற நோய்களை நாம் கேள்விப்பட்டதே கிடையாது. அங்கேயும் குப்பை கூளங்கள் இல்லாமல் இல்லை ஆனால் அங்கே சட்டம் சட்டமாக உள்ளது.எந்த ஒரு குற்றவாளியும் எந்த காரணத்திற்காகவும் எந்த காலத்திலும் தப்பிக்க முடியாது. மன்னர் குடும்பத்தவர்கள் குற்றம் புரிந்தாலும் அவர்களுக்கும் மற்றவர்களுக்கு உண்டான அதே தண்டனைகளே வழங்கப்படுகின்றது.

1980 முதல் 1986 வரை சவூதி அரேபியாவில் பணியிலிருந்த நான் அங்கே  குற்றவாளிகளுக்கு நிறைவேற்றப்படும் சில தண்டனைகளை நேரில் பார்த்திருக்கின்றேன்.

சில சிறு குற்றங்களுக்கு கசையடி (Caning எனும் பிரம்படி) கொடுப்பதையும் கொடூர குற்றங்களுக்கு தலை வெட்டும் (Beheading) மரண தண்டனையும் நேரில் கண்டதை இங்கே சுருக்கமாக கூற விரும்புகின்றேன்.

ஒரு குற்றவாளிக்கு 100 கசையடி என்ற தண்டனையை ஒரே நேரத்தில் நிறைவேற்றுவதில்லை அதை பிரித்து சில தவணைகளாக  (2 அல்லது 4 முறை) தண்டனையை நிறைவேற்றுவார்கள். வெள்ளிக்கிழமை சிறப்பு தொழுகைக்கு பிறகு அந்த பள்ளியின் வெளியே நீளமான ஒரு மரத்தின் அருகே காவல்துறை வேன் (கருப்பு நிறம்) வந்து நிற்கும் இமாம் வெளியே வந்த பிறகு செய்த குற்றத்திற்கான தண்டனை விவரத்தை அவர் ஒரு சில நிமிடங்கள் வாசிப்பார்.அதன் பின் அந்த மரத்தோடு குற்றவாளியை நிற்க வைத்து ஒரு காவலர் அவரது இருகைகளையும் இறுக பற்றிக்கொள்வார். இன்னொரு காவலாளி அறிவிக்கப்பட்ட தண்டனையில் ஒரு பகுதியை இடைவெளி விடாமல் பிடரிக்கு கீழ் இருந்து குதிகால் வரை அடிப்பதை பார்த்திருக்கிறேன். குற்றவாளி வழக்கமான உடை அணிய தடையில்லை. சிலர் அந்த தண்டனையின் போது சப்தமிடாமல் இருப்பதையும் சிலர் வலியால் அலறுவதையும் காணலாம். மீதியுள்ள பிரம்படியை இன்னொரு வெள்ளிக்கிழமையை கூறி வேறு இடத்தில் அந்த தண்டனையை நிறைவேற்றுவார்கள். இந்த இடைவெளியில் தண்டனை பெற்ற குற்றவாளிக்கு உரிய மருத்துவ சிகிச்சை அளிக்கப்படும்.

கொலை போன்ற கொடுங்குற்றங்களுக்கு தலை வெட்டும் தண்டனையை  பல்வேறு நாடுகளும் நிறுத்தக்கோரியும் முடியாது என சவூதி அரசு திட்டவட்டமாக ஏற்கனவே கூறிவிட்டது. அதில் அவர்கள் எந்த காலத்திலும் எந்த மாறுதலையும் செய்யப்போவதில்லை. காரணம் கடுமையான தண்டனைகளால் தான் சர்வதேச அளவில் குற்றங்கள் குறைந்த நாடுகளின் சவூதி அரேபியா முக்கியத்துவம் வாய்ந்ததாகக் கருதப்படுகின்றது. தமாமில் (Dammam) உள்ள தனியார் வங்கி ஒன்றில் (Al-Rajhi Bank) பணத்தை கொள்ளையடித்துவிட்டு அங்கு பணியிலிருந்த ஊழியர் இருவரை கொடூரமாக கொலை செய்துவிட்டு தப்ப முயன்ற பிலிப்பைன்ஸ் (Philippines) நாட்டுக்காரர் ஒருவரை     ( 30 வயதுக்குகீழ் ) சவூதி போலிஸ் துரிதமாக செயல்பட்டு அவரை கைது செய்து சிறையில் அடைத்தது. அதன் பிறகு காவல் அதிகாரிகள் முன்னிலையில் அந்த குற்றவாளியின் பேட்டி தொலைக்காட்சியில் ஒளிபரப்பப்பட்டது. அவரது மரண தண்டனை தமாம் பெரிய ஜூம்மா பள்ளியில் ஒரு வெள்ளிக்கிழமையன்று நிறைவேற்றப்பட்டது.

வெள்ளிக்கிழமை சிறப்பு தொழுகைக்கு முன் குற்றவாளியுடன் காவல்துறை வேன் (கருப்பு நிறம்) வந்து நின்றது. தவிர சுற்றுவட்டாரத்தில் உள்ள காவல்துறை உயர் அதிகாரிகளின் வாகனங்களும் நாலாபுறமும் வந்து நின்றன.தீயணைப்பு வாகனம் மற்றும் தண்ணீர் வாகனமும் வந்து நின்றன. அன்று பகல் தொழுகை முடிந்ததும் இமாம் வெளியே வந்து நின்று சம்பந்தப்பட்ட குற்றவாளிக்கான மரண தண்டனை பற்றி ஒரு சில நிமிடங்கள் வாசித்தார்.அதன் பிறகு கருப்பு உடை அணிந்த குற்றவாளியை வேனிலிருந்து இறக்கி சாலையில் நடுவில் மண்டியிட்டு அமரவைத்தனர் உடன் தயாராக இருந்த ஒருவர் தன்னுடைய வாளால் குற்றவாளியின் தலையை வெட்ட அது தனியாக கிழே விழுந்தது. அவரது உடலையும் தலையையும் எடுத்து தயாராக இருந்த மருத்துவ வாகனத்தில் எடுத்துக்கொண்டு ஆஸ்பத்திரியை நோக்கி சென்றுவிட்டனர். நான்கு வழிகளிலும் உள்ள ரோட்டிலும், மாடிகளிலும் கூடியிருந்த மக்கள் அதை பார்த்ததுடன் வழக்கம் போல் தண்டனை நிறைவேற்றியதும் அல்லாஹ் அக்பர் (இறைவன் பெரியவன்) என்று உரக்க முழக்கமிட்டனர். ரோட்டில் சிந்தியிருந்த இரத்தத்தை தண்ணீரை பீச்சியடித்து சுத்தம் செய்துவிட்டு அதன் பிறகு அந்த இடத்தில் மணலை கொட்டுவதை காண முடிந்தது. அவரது உடல் அவரது சொந்த நாட்டிற்கே அனுப்பி வைக்கப்பட்டது.

இந்த சம்பவத்தை நான் நேரில் கண்டதால் அதை இங்கே கூறியுள்ளேன்.அதன் பிறகு இது போன்ற தண்டனைகளை நேரில் காண்பதற்கு நான் சென்றது கிடையாது.   

நாள்தோறும் பெருகிவரும் கொலை, கொள்ளைமற்றும் பெண்களுக்கு எதிரான வரம்புமீறிய பாலியல் குற்றங்களை கட்டுப்படுத்த அரபு நாடுகளில் உள்ள கடும் சட்டங்களை இந்தியாவில் அமல் படுத்த வேண்டும் என்பதாக பல்வேறு அரசியல் கட்சி தலைவர்களும் மக்களும் கூறுவதைக் காண முடிகிறது. ஆனால் ஏதோ சில காரணங்களுக்காக அந்த தண்டனைகளை நம்முடைய நிர்வாக தலைவர்கள் அமல்படுத்த தடையாக உள்ளனர்.

டெங்கு போன்ற சில வகை காய்ச்சலால் தமிழகத்தில் 80 பேர் இறந்துவிட்டதாக ஒரு செய்தி வருகிறது. இல்லை 400 பேர் இறத்துவிட்டதாக இன்னொரு செய்தி வருகிறது. அரசு மருத்துவமனை மற்றும் தனியார் மருத்துவமனைகளில் சிகிச்சை பெற்ற சிலரும் சிகிச்சை பலனின்றி மரணித்துவிட்டதாகவும் தினசரி செய்திகள் வருகின்றன. இதை கட்டுப்படுத்த தடுப்பூசி எதுவும் இல்லை என்பதாகவும் அரசு சுகாதாரத்துறை சார்பாக கூறப்படுகின்றது. இந்த நிலையில் காய்ச்சலுக்கு சரியாக சிகிச்சையளிக்கவில்லை அதனால் இறந்துவிட்டார்கள் என்பதெல்லாம் ஏற்றுக்கொள்ள முடியாத ஒன்று. திடீரென பல ஊர்களிலும் பரவிக் கொண்டிரும்க்கும் இந்த காய்ச்சலில் இருந்து குணம் பெற,பாதுகாப்பு பெற மருந்து மாத்திரை இல்லாத ஒன்றை அரசும் மக்களும் வேண்டுதலுடன் இறைநம்பிக்கையுடன் செயல்படுத்த விரும்பினால் அதை உடனடியாக தமிழகம்முழுவதிலோ அல்லது முதலில் சில ஊர்களிலோ செய்யலாம் அதில் நிச்சயம் பலன் இருக்கும் என்று கருதியே இதை சொல்கின்றேன். இதை கட்டாயப்படுத்த நான் விரும்பவில்லை.

காய்ச்சல் நோய் பாதிக்கப்பட்ட தெருக்களில் ஆடு அல்லது மாடு ஒன்றை பலியிட வேண்டும் (உடல் ஊனம் இல்லாத). 50 வீடுகள் உள்ள ஒரு பகுதியில் ஆளுக்கு 50 ரூபாய் கொடுத்தாலே ஒரு ஆடு வாங்கி பலியிட முடியும். மிகக் கூடுதலான விலையில் ஆடு அல்லது மாடுகளை (காளை) வாங்க வேண்டிய அவசியம் இல்லை. சில நேரம் வசதியுள்ள ஒரு தனி நபரே அவர் வசிக்கக்கூடிய தெருவில் இதற்கான செலவை அவரே ஏற்றுக்கொள்ளும் சூழ்நிலை கூட உருவாகும். எனவே மற்றவர்கள் இந்த செலவைப்பற்றி கவலைப்பட வேண்டியத்தில்லை. ஒரு தனி நபரோ அல்லது பலரும் கூட்டாகவோ இந்த செலவை ஏற்றுக்கொண்டாலும் பலன் எல்லோருக்குமானதுதான். ஆடு மாடுகள் பலியிடுவதற்கான செலவுகளை அரசே ஏற்றுக்கொள்ள வேண்டும் என நான் வற்புறுத்த முடியாது. பொதுவாக இது போன்ற சோதனையான காலக்கட்டங்களில் ஆடு மாடுகளை பலியிடுதல் என்பது நாட்டில் ஏராளமான கிராமங்களில் இன்னமும் நடைமுறையில் உள்ளது. இது தவறு என்று அரசோ, அரசியல் கட்சிகளோ அல்லது நீதிமன்றங்களோ கூற முடியாது. காரணம் இது மக்களின் நம்பிக்கை அடிப்படையிலானது. ஏதோ ஒரு சோதனை ஏதோ சில காரணங்களுக்காக மக்கள் மீது இறங்கியுள்ளது. அதிலிருந்து மீளவும் பாதுகாப்பு பெறவும் இப்போதைக்கு இதுதான் சரியான தீர்வாக இருக்கும். எனக்கருதியே இதை நான் எல்லோருக்கும்  தெரிவிக்கின்றேன்.

அதிகாலை 5 மணியிலிருந்து 7 மணிக்குள்ளாக பலிகொடுக்க வேண்டும். சரியான மருந்து மாத்திரைகளும் இல்லை, தடுப்பூசிகளும் இல்லை.இந்த காய்ச்சலால் பல ஊர்களிலும் சிறுவர் முதல் பெரியவர் வரை பலியாகும் செய்தி தொடர்ந்து வந்த வண்ணம் உள்ளது. மரணம் என்பதை விட பலி என்ற வார்த்தையே ஊடகங்களில் அதிகமாக பயன்படுத்தப்படுகின்றன. அந்த பலிகளை தடுக்க வேண்டியே இந்த பலிகொடுக்கும் முறையை நான் தெரிவிக்கின்றேன். இதனுடைய சூட்சுமங்கள் எல்லாம் ஆன்மீக சிந்தனை மற்றும் ஆராய்ச்சி எண்ணம் கொண்டவர்களுக்குத்தான் புரிய வரும். தமிழகத்தில் இதுவரை எவருமே சொல்லாத ஒரு புதிய செய்தியாக இது உள்ளதே என்று விவாதம் செய்வதை விட இதையும் நாம் செய்தால் என்ன என்ற முடிவுக்கு வர வேண்டும்.
 
மக்கள் எல்லாவிதமான நோய்களை விட்டும் குணமடைய பாதுகாப்பு பெற மதங்களை கடந்து ஒட்டு மொத்தமாக நாம் இறைவனை பிரார்த்திப்போம். பலி கொடுத்த பின்பு அதன் மாமிசத்தை கொஞ்சம் கொஞ்சமாக பலருக்கும் பங்கிட்டு கொடுத்துவிடலாம். நாமும் அதை சாப்பிடலாம் அதில் எந்த தவறும் இல்லை.

நன்றி !

ஏ. பாருக்,
'அரசியல் விமர்சகர்' 
68 காலியார் தெரு, 
அதிராம்பட்டினம் - 614 701. 
பட்டுக்கோட்டை தாலுகா, 
தஞ்சாவூர் மாவட்டம், தமிழ்நாடு.

மரண அறிவிப்பு ~ ஆயிஷா அம்மாள் அவர்கள்

அதிரை நியூஸ், செப். 30
அதிராம்பட்டினம், மர்ஹூம் முகமது மீராஷா அவர்களின் மகளும், மர்ஹூம் சேக் அலாவுதீன் அவர்களின் மனைவியும், மர்ஹூம் நூர்தீன், முகமது அபுபக்கர், ஹாஜி முகமது ஆகியோரின் தாயாருமாகிய ஆயிஷா அம்மாள் அவர்கள் நேற்று இரவு பழஞ்செட்டித்தெரு இல்லத்தில் வஃபாத்தாகி விட்டார்கள்.

இன்னா லில்லாஹி வ இன்னா இலைஹி ராஜிவூன்

அன்னாரின் ஜனாசா இன்று (30-09-2017) காலை 11.30 மணியளவில்  தக்வாப் பள்ளி மையவாடியில் நல்லடக்கம் செய்யப்படும்.

அன்னார் மறுமை வாழ்வு சிறக்க துவா செய்வோம்.

மரண அறிவிப்பு ~ NMA அபுல்கலாம் அவர்கள்

அதிரை நியூஸ், செப். 30
அதிராம்பட்டினம், கடற்கரைத் தெருவை சேர்ந்த புதுத்தெரு மர்ஹூம் முகமது உசேன் அவர்களின் மகனும், மர்ஹூம் மு.அ அப்துல் காசிம், புதுத்தெரு மர்ஹூம் எஸ். அபுல் ஹசன் ஆகியோரின் மருமகனும், மர்ஹூம் என்.எம்.ஏ சேக் முகமது அவர்களின் சகோதரரும், மர்ஹூம் எச்.எம் அகமது தம்பி, எச். ஹாஜா அலாவுதீன் , ஏ அலிஅக்பர், ஏ. அகமது ஹாஜா, ஏ அகமது ஜலீல், என். முகமது தாசின், ஏ.முகமது முகைதீன் ஆகியோரின் மச்சானும், எச்.எம்.டி முகமது ரஃபி, எம். அகமது முகைதீன் ஆகியோரின் மாமனாரும், எஸ். அன்வர் உசேன் அவர்களின் பெரிய தகப்பனாரும், ஏ. சாகுல் ஹமீது, ஏ.பிர்தவ்ஸ்கான் ஆகியோரின் தகப்பனாருமாகிய என்.எம்.ஏ அபுல்கலாம் அவர்கள் இன்று காலை 7 மணியளவில் வஃபாத்தாகி விட்டார்கள்.

இன்னா லில்லாஹி வ இன்னா இலைஹி ராஜிவூன்

அன்னாரின் ஜனாசா இன்று (30-09-2017) பகல் லுஹர் தொழுகை முடிந்தவுடன் கடற்கரைத்தெரு ஜும்மா பள்ளி மையவாடியில் நல்லடக்கம் செய்யப்படும்.

அன்னார் மறுமை வாழ்வு சிறக்க துவா செய்வோம்.

Friday, September 29, 2017

செடியன் குளத்தில் மணிக்கணக்கில் உற்சாகக் குளியல் போடும் சிறுவர்கள் (படங்கள்)

அதிராம்பட்டினம், செப். 29
அதிராம்பட்டினம் செடியன் குளத்தில் மணிக்கணக்கில் உற்சாகக் குளியல் போடும் பள்ளிச்சிறுவர்கள்...

தஞ்சாவூர் மாவட்டம், அதிராம்பட்டினம் பகுதியில் பொதுமக்கள் குளித்து மகிழும் குளங்களில் ஒன்று செடியன் குளம். சுமார் 3 ஹெக்டர் 39 ஏர்ஸ் பரப்பளவில் அமைந்துள்ளது. மிகவும் பழமை வாய்ந்தது. வரலாற்றுச் சிறப்பு மிக்கது. இக்குளத்தில் தற்போது போதுமான அளவில் நீர் நிரம்பி பளபளப்பாக காட்சியளிப்பதால், குளிப்பதற்கு பொதுமக்களை சுண்டி இழுத்து வருகிறது.

தினமும் இக்குளத்தில், பொதுமக்கள் குளித்து மகிழ்வது ஒருபுறமிருந்தாலும், தொடர் விடுமுறையில் பொழுதை கழித்து வரும் பள்ளிச்சிறுவர்கள்  உற்சாகமாகக் குளித்து வருவது அப்பகுதி வழியே கடந்து செல்லும் பொதுமக்களை பெரிதும் கவர்ந்து வருகிறது. குளத்தில் டைவ் அடித்தும், நீந்திச் சென்றும், முக்குளித்தும், நேரம் போவது தெரியாமல் கண் சிவக்கும் அளவிற்கு மணிக்கணக்கில் குளித்து மகிழ்கின்றனர்.

குளித்து முடித்துவிட்டு குளத்தின் கரையில் அமைந்துள்ள நூற்றாண்டைக் கடந்து பசுமையாகவும், அதிரையின் அடையாளமாகத் திகழும், மருத்துவ குணமுடைய மருத மரத்தின் நிழலில் ஓய்வு எடுத்துச் செல்கின்றனர்.

எச்சரிக்கை:
குளத்தில் போதுமான அளவில் நீர் நிரம்பிக் காணப்படுவதால், சிறுவர்கள் தனியாகக் குளிக்க வேண்டாம். தங்களது பெற்றோர் அல்லது பாதுகாவலருடன் இணைந்து குளிக்கவும். ஆழப்பகுதிக்கு நீச்சலடித்துச் செல்வது ஆபத்தை ஏற்படுத்தக்கூடும்.  
 

தஞ்சை மாவட்டத்தில் உரிமம் பெறாத உணவகங்கள், தேநீர் கடைகள் மீது நடவடிக்கை !

அரசு உரிமம் பெறாமல் செயல்படும் உணவகங்கள், சுகாதாரமற்ற உணவகங்கள் மீது கடும் நடவடிக்கை எடுக்கப்படும் என்றார் மாவட்ட ஆட்சியர் ஆ. அண்ணாதுரை.

மாவட்ட ஆட்சியரகத்தில் வியாழக்கிழமை நடைபெற்ற தமிழ்நாடு உணவுப் பாதுகாப்பு, மருந்து நிர்வாகத் துறையின் மாவட்ட அளவிலான வழிப்படுத்தும் குழுக் கூட்டத்தில் அவர் பேசியது:
மாட்டத்தில் செயல்படும் உணவகங்கள், தேநீர் நிலையங்கள் அனைத்தும் உரிமம் பெற்று செயல்பட வேண்டும். பேருந்து நிலையம், ரயில் நிலையம், திருக்கோயில்கள், புனித தலங்கள் அருகில் உள்ள உணவகங்கள், இரவு சிற்றுண்டி நிலையங்கள், திரையரங்குகள் மற்றும் அதிகளவில் பொதுமக்கள் கூடுமிடங்களில் செயல்படும் உணவகங்கள், தேநீர் நிலையங்களில் உணவு தயாரிக்கும் கூடங்கள், சமையலறைகள் உள்ளிட்ட இடங்களில் வழிப்படுத்தும் குழு உறுப்பினர்கள் ஆய்வு செய்து சுகாதாரமான முறையில் உணவுகள் தயாரிக்கப்படுகிறதா என்பதை உறுதி செய்ய வேண்டும்.

சுகாதாரமற்ற முறையில் செயல்படும் உணவகங்கள் மீது நிரந்தரமாக மூடும் உத்தரவை பிறப்பிக்க வேண்டும். பிளாஸ்டிக் பைகளில் தேநீர் மற்றும் உணவுகள் வழங்கும் உணவகங்கள், தேநீர் நிலையங்கள் மீது கடும் நடவடிக்கை மேற்கொள்ள வேண்டும். மாவட்டத்தில் உள்ள அனைத்து வகையான உணவகங்களும் அரசிடம் உரிமம் பெற்றுச் செயல்பட வேண்டும்.

அவ்வாறு உரிமம் புதுப்பிக்காத உணவகங்களை மூட உத்தரவிட வேண்டும் என்றார் ஆட்சியர்.

கூட்டத்தில் மாவட்ட உணவுப் பாதுகாப்பு அலுவலர் ரமேஷ்பாபு, தமிழ்நாடு மாநில வாணிபக் கழக மாவட்ட மேலாளர் பூங்கோதை, ஒருங்கிணைந்த குழந்தைகள் வளர்ச்சித் திட்ட அலுவலர் ராஜ்குமார் உள்ளிட்டோர் கலந்து கொண்டனர்.

அதிராம்பட்டினம் பாரத ஸ்டேட் வங்கி மேலாளருக்கு பாராட்டு ~ வழியனுப்பும் விழா (படங்கள்)

அதிராம்பட்டினம், செப். 29
பதவி உயர்வு பெற்று பணியிடம் மாற்றம் செய்யப்பட்ட அதிராம்பட்டினம் பாரத ஸ்டேட் வங்கி கிளை மேலாளர் ஏ. ஹமீத்கானுக்கு பாராட்டு - வழியனுப்பும் விழா.

தஞ்சாவூர் மாவட்டம், அதிராம்பட்டினம் பாரத ஸ்டேட் வங்கி கிளை மேலாளராக கடந்த 2015 ஆம் ஆண்டு முதல் பணியாற்றி வந்தவர் ஏ.ஹமீத்கான். இந்நிலையில், பதவி உயர்வு பெற்று, திருவாரூர் மாவட்டம், கூத்தாநல்லூர் பாரத ஸ்டேட் வங்கிக் கிளைக்கு பணியிட மாற்றம் செய்யப்பட்டதை அடுத்து, சக பணியாளர்கள் மற்றும் வாடிக்கையாளர்கள் சார்பில் பாராட்டு மற்றும் வழியனுப்பும் விழா வியாழக்கிழமை நடைபெற்றது.

விழாவிற்கு, வங்கி கிளை புதிய மேலாளர் பிரவின் குமார் தலைமை வகித்தார். விழாவில், அதிரை பேரூர் வர்த்தக சங்கத் தலைவர் கே.கே ஹாஜா நஜ்முதீன், முன்னாள் தலைமை ஆசிரியர் ஏ.மகபூப் அலி, வங்கி காசாளர் ஜெயா, பிரேம் நாத், பாண்டியன், நகை மதிப்பீட்டாளர் வாசு, ஜாகிர் உசேன் (ஜே.எஸ்), ராமசாமி, ஜமால் முஹம்மது உள்ளிட்டோர் கலந்துகொண்டு வாழ்த்துரை வழங்கினார்கள்.

இதன்பின்னர் மேலாளர் ஏ. ஹமீத்கான் தனது ஏற்புரையில், அதிராம்பட்டினம் மற்றும் சுற்றுப்புற பகுதி வாடிக்கையாளர்களின் ஒத்துழைப்பிற்கும், ஆதரவிற்கும் நன்றி தெரிவித்துக்கொண்டார்.

தொடக்கத்தில், வங்கி வர்த்தகத் தொடர்பாளர் ஏ. ஷேக் அப்துல்லாஹ் வரவேற்றுப்பேசினார், விழா முடிவில் நன்றி கூறினார். இவ்விழாவில் வங்கி பணியாளர்கள், வாடிக்கையாளர்கள் கலந்துகொண்டனர்.

Thursday, September 28, 2017

தஞ்சை ~ பெற்றோரை தேடும் 5 வயது சிறுமி

கடந்த நான்கரை ஆண்டுகளுக்கு முன் 6 மாதப் பெண் குழந்தையாக இருந்த ஒரு பெண் குழந்தை, தஞ்சை பெரிய கோயில் அருகிலிருந்து குழந்தையை கடத்தி விற்பனை செய்யும் பெண் ஒருவரால் கடத்தி கேரளாவுக்கு விற்பனைக்காக கொண்டு செல்லப்பட்டுள்ளார்.

கேரள மாநிலம், மலப்புரம் மாவட்டம், வாண்டூர் காவல் துறையினரால் அந்தப் பெண் குழந்தை 2016-இல் மீட்கப்பட்டது.  பின்னர், மலப்புரம் குழந்தைகள் நலக் குழுமத்தில் ஆஜர்படுத்தப்பட்டு, தற்போது குழந்தைகள் இல்லத்தில் பாதுகாப்பாக தங்க வைக்கப்பட்டுள்ளது. அந்த பெண் குழந்தைக்கு யாழினி என்று காப்பக நிர்வாகிகள் பெயர் சூட்டியுள்ளனர்.

முறைப்படி குழந்தையை வேறு தகுதியான தம்பதியினருக்கு தத்துக் கொடுக்கவோ அல்லது ஆதரவற்றோர் என பிறப்பு சான்றிதல் பதிவேற்றம் செய்ய வேண்டுமானால், அந்த குழந்தை தொலைந்து போன இடத்தில் உள்ள வட்டாட்சியர் மூலமாக சான்று பெறவேண்டும். அதற்காக அந்த குழந்தையை பறிகொடுத்தவர்கள் பற்றிய விபரங்களை பொதுமக்களிடம் தெரிவித்து, அக்குழந்தை குறித்த விபரங்களை பெறக்கோரி கோவை மாவட்ட குழந்தைகள் பாதுகாப்பு அலுவலரிடம் ஒப்படைதுள்ளனர்.

தஞ்சையில் இருந்து கடத்தப்பட்ட யாழினியின் பெற்றோர் அல்லது உறவினர்கள் யாரும் குழந்தையைத் தவறவிட்டு இருந்தால், அதற்கான உரிய ஆவணங்களுடன் கோவை மாவட்ட ஆட்சியர் அலுவலகத்தில் உள்ள மாவட்டக் குழந்தைகள் பாதுகாப்பு அலுவலருக்கு 30 நாள்களுக்குள் தகவல் தெரிவிக்கமாறு கேட்டுக்கொள்ளப்பட்டுள்ளது.

மேலும், விவரங்களுக்கு 0422-2300305 என்ற எண்ணில் தொடர்புகொள்ளலாம். என்றும் அந்த செய்திக்குறிப்பில் தெரிவிக்கப்பட்டுள்ளது.

அமீரகத்தில் போக்குவரத்தை புரட்டிப்போட்ட கடும் பனிமூட்டம் !

அதிரை நியூஸ்: செப். 23
இன்று ( செப்.28 ) அமீரகத்தின் பல பகுதிகளிலும் ஏற்பட்ட கடும் மூடுபனியால் இயல்பான போக்குவரத்து பாதிக்கப்பட்டது. துபை, அபுதாபி, ஷார்ஜா ஆகிய எமிரேட்டுக்களில் இப்பனிமூட்டத்தால் வாகன விபத்துக்கள் ஏற்பட்டதாக முதற்கட்ட தகவல்கள் தெரிவிக்கின்றன.

மூடுபனியை தொடர்ந்து நத்தையாக நகரும் போக்குவரத்தை சீர்படுத்தத் தேவையான நடவடிக்கைகளை துபை போக்குவரத்துத் துறை, துபை போலீஸ், அபுதாபி போக்குவரத்து போலீஸார் உட்பட பலரும் மேற்கொண்டு வருகின்றனர்.

இன்னொரு புறம், இம்மூடுபனியால் ஏற்பட்டுள்ள சீதோஷ்ண நிலை மாற்றத்தால் பொதுமக்கள் அதீத வியர்வையால் சிரமப்பட்டு வருகின்றனர்.

Source: Gulf News
தமிழில்: நம்ம ஊரான்

அதிராம்பட்டினத்தில் 11.20 மி.மீ மழை பதிவு !

செடியன் குளத்தில் குளித்து மகிழும் சிறுவர்கள்
அதிராம்பட்டினம், செப். 28
தஞ்சாவூர் மாவட்டம், அதிராம்பட்டினம் மற்றும் சுற்றுப்புற பகுதிகளில், நேற்று புதன்கிழமை இரவு 7 மணியளவில் பலத்த மழை பெய்தது. இதனால் அதிரையின் பிரதான சாலைகளில் வெள்ளம் ஆறுபோல் பெருக்கெடுத்து ஓடியது. அதிரை மற்றும் சுற்றுப்புற பகுதியில் வெப்பம் தணிந்து குளிர்ச்சி நிலவுகிறது. வானம் மேகக்கூட்டத்துடன் சூழ்ந்து காணப்படுகிறது.

இன்று வியாழக்கிழமை காலை 8.30 மணி நேர நிலவரப்படி அதிராம்பட்டினத்தில் 11.20 மி.மீ மழை பதிவாகியது. தஞ்சை மாவட்டத்தில்
அதிகபட்சமாக நெய்வாசலில் 26.40 மி.மீ, பட்டுக்கோட்டையில் 7 மி.மீ, பேராவூரணி 1 மி.மீ, மதுக்கூரில் 15.60 மி.மீ மழை பதிவாகியது. 

கேரளாவில் ஷார்ஜா டிரைவிங் லைசென்ஸ் வழங்கல் மையம் !

அதிரை நியூஸ்: செப்.29
கேரளாவில் ஷார்ஜா ஆட்சியாளர் டாக்டர். ஷேக் சுல்தான் பின் முஹமது அல் கஸீமி அவர்கள் அரசுமுறை பயணமாக கடந்த ஞாயிறு முதல் சுற்றுப்பயணம் மேற்கொண்டு பல்வேறு நிகழ்ச்சிகளில் பங்கேற்று வருகிறார்.

டாக்டர். ஷேக் சுல்தான் அவர்களிடம் கேரள முதன்மந்திரி கோரிக்கை விடுத்ததை தொடர்ந்து ஷார்ஜாவில் செல்லுபடியாகும் டிரைவிங் லைசென்ஸ் வழங்கும் மையம் ஒன்றையும், அரபி மொழி பயிற்சி மையம் ஒன்றை ஏற்படுத்தவும் ஒப்புதல் வழங்கியுள்ளார். அமீரகத்திற்கு வேலைவாய்ப்பின் நிமித்தம் செல்பவர்கள் இந்த கேரளா - ஷார்ஜா மையத்திலேயே டிரைவிங் லைசென்ஸ் பெற்றுக் கொள்ளலாம்.

தற்போது கேரளாவில் வாடகை கட்டிடத்தில் இயங்கிவரும் அமீரக துணை தூதரகத்திற்கு சொந்தமான கட்டிடம் கட்டத் தேவையான நிலத்தை வழங்கவும் கேரளா அரசு ஒப்புக் கொண்டுள்ளது. அதேபோல், ஷார்ஜாவில் 20 ஏக்கர் நிலத்தில் கேரளா கலாச்சார மையம் ஒன்றை அமைக்க அனுமதி தரும்படியும் கேரள முதல்வர் வேண்டுகோள் விடுத்தார்.

இந்த நிலத்தில் 10 ஏக்கரில் கட்டடப்படும் கட்டுமானத்தில் கேரள மக்கள் குடும்பத்துடன் வசிப்பர், எஞ்சிய 10 ஏக்கர் இடத்தில் உலகத்தரம் வாய்ந்த மருத்துவமனை ஒன்றும், ஆயுர்வேத மருத்துவமனை ஒன்றும், கேரளாவின் காலச்சாரத்தையும், கலை பண்பாடுகளையும் எடுத்துக்கூறும் மையம் ஒன்றை அமைக்கவும், கேரள மக்கள் அந்த மையத்திற்குள் தங்களுடைய சமூக கூட்டங்களையும், கலை நிகழ்ச்சிகளை நடத்திக் கொள்ளவும் அனுமதியளிக்கும்படியும் வேண்டுகோள் விடப்பட்டுள்ளது.

நம்ம தமிழக ஆட்சியாளர்கள் ஒரு வருடத்திற்கு முன் இறந்த தங்கள் தலைவியின் மரணம் குறித்தே இதுவரை ஒரு முடிவுக்கு வர முடியாமல் தவித்துக் கொண்டுள்ள நிலையில் வெளிநாடு வாழ் தமிழர்களை பற்றி அவர்களுக்கு சிந்திக்க எங்கே நேரமிருக்கப் போகிறது?

Source: Msn / Khaleej Times
தமிழில்: நம்ம ஊரான்

ரோஹிங்கிய முஸ்லீம்கள் இனப் படுகொலையைக் கண்டித்து, அதிரையில் கண்டனப் பொதுக்கூட்டம் (படங்கள்)

அதிராம்பட்டினம், செப். 28
தமிழ்நாடு முஸ்லீம் முன்னேற்றக் கழகம் அதிராம்பட்டினம் பேரூர் சார்பில், மியான்மர் ரோஹிங்கிய முஸ்லீம்கள் இன படுகொலை கண்டித்தும், மத்திய அரசு கொண்டு வந்த நீட் தேர்வை நிரந்தரமாக ரத்து செய்யக்கோரியும் கண்டனப் பொதுக்கூட்டம் அதிராம்பட்டினம் பேருந்து நிலையம் அருகில் புதன்கிழமை இரவு நடைபெற்றது.

கூட்டத்திற்கு, அவ்வமைப்பின் அதிரை பேரூர் செயலர் எம்.ஆர் கமாலுதீன் தலைமை வகித்தார். தமுமுக - மமக மாவட்டத் தலைவர் எஸ். அகமது ஹாஜா, மாநில ஊடகப்பிரிவு துணைச்செயலாளர் எம். ஃபவாஸ்கான், மாவட்ட செயலர் எஸ். சேக் முகைதீன், மமக மாவட்ட செயலர் எம். ஜபருல்லா, மாவட்ட துணைச் செயலாளர் எஸ்.எஸ் முகம்மது சேக்காதி, மாவட்ட மருத்துவ அணி செயலாளர் ஏ. சலீம், மாநில செயற்குழு உறுப்பினர் எம்.ஓ செய்யது முகமது புஹாரி, அதிரை பேரூர் துணைத் தலைவர் எச். செய்யது புஹாரி, மமக அதிரை பேரூர் வணிகர் அணிச் செயலர் ஆர்.எம். நெய்னா முகமது, தமுமுக அதிரை பேரூர் பொருளாளர் எஸ். முகமது யூசுப், இஸ்லாமிய பிராசாரப் பேரவை அதிரை பேரூர் பொருளாளர் எஸ். சாகுல்ஹமீது, மமக அதிரை பேரூர் தொழிலாளர் அணிச் செயலாளர் ஜே. அப்துல் ஹக்கீம், மாவட்ட பொருளாளர் இன்ஜினியர் ஏ. முகமது இலியாஸ் ஆகியோர் முன்னிலை வகித்தனர்.

சிறப்பு விருந்தினராக மனிதநேய மக்கள் கட்சி மாநில பொதுச்செயலாளர் ப. அப்துல் சமது கலந்துகொண்டு கண்டன உரை நிகழ்த்தினார். மேலும், அவ்வமைப்பின் மாநில பேச்சாளர் பழனி பாருக், மமக மாநில அமைப்புச் செயலாளர் வழக்குரைஞர் ஐ.எம் பாதுஷா ஆகியோர் கண்டன உரை நிகழ்த்தினார்கள்.

கூட்டத்தில், ரோஹிங்கியா முஸ்லீம்கள் மீது நடத்திவரும் தாக்குதலை தடுக்காத மியான்மர் அரசை வன்மையாக கண்டிப்பது எனவும், இப்பிரச்சனையில் மத்திய அரசு தலையிட்டு, இந்தியாவில் உள்ள மியான்மர் அரசின் தூதரை திருப்பி அனுப்ப வேண்டும் எனவும், மத்திய அரசு கொண்டு வந்த நீட் தேர்வை நிரந்தரமாக ரத்து செய்ய வேண்டும், அதிராம்பட்டினம் பேரூராட்சி பகுதிகளில் சுகாதரச் சீர்கேட்டால் வேகமாக பரவி வரும் காய்ச்சலை கட்டுப்படுத்தி, இப்பகுதியில் சுகாதாரப் பணிகளை துரிதப்படுத்த வேண்டும், அதிராம்பட்டினம் பேருந்து நிலையம், ஈஸ்ட் கோஸ்ட் சாலை ஆகிய பகுதிகளில் உள்ள மதுக்கடைகளில் சட்டவிரோதமாக முழு நேரமும் இயங்கி வரும் மது விற்பனையை தடுத்து நிறுத்தி, சம்பந்தப்பட்டவர்கள் மீது காவல்துறை நடவடிக்கை எடுக்க வேண்டும், அதிராம்பட்டினம் பகுதிகளில் சட்டவிரோதமாக விற்பனையாகும் கஞ்சா, லாட்டரி சீட்டுகள் போன்றவற்றை தடுத்து நிறுத்தவேண்டும், அதிராம்பட்டினம் அருகே உள்ள ஏரிப்புறக்கரை ஊராட்சி பிலால் நகர், ஆதம் நகர் பகுதிகளில் ஏற்பட்டுள்ள சுகாதரச் சீர்கேட்டினை சீர்படுத்தக் கோருவது உள்ளிட்ட தீர்மானங்கள் நிறைவேற்றப்பட்டன. தீர்மானங்களை தமுமுக, மமக மாவட்டத் தலைவர் அகமது ஹாஜா வாசித்தார்.

முன்னதாக, மமக அதிரை பேரூர் செயலாளர் எஸ்.ஏ இத்ரீஸ் அகமது வரவேற்றுப்பேசினார். கூட்ட முடிவில் தமுமுக அமெரிக்கா பொறுப்பாளர் மரைக்கான் என்கிற அப்துல் கபூர் நன்றி கூறினார். இக்கூட்டத்தில் ஏராளமானோர் கலந்துகொண்டனர்.
 

Wednesday, September 27, 2017

எதிஹாத் விமானத்தின் விமானி நடுவானில் மரணம் !

அதிரை நியூஸ்: செப். 27
அபுதாபி எமிரேட்டுக்குச் சொந்தமானது எதிஹாத் விமான நிறுவனம். இந்நிறுவனம் அபுதாபியிலிருந்து உலகின் பல நாடுகளுக்கும் பல்வேறு சொகுசு விமான சேவைகள், சரக்கு விமான சேவைகள் என பலவகையான சேவைகளை வழங்கி வருகிறது.

அபுதாபிலிருந்து ஆம்ஸ்டர்டாம் நகருக்கு புறப்பட்ட எதிஹாத் சரக்கு விமானத்தின்  விமானி ஒருவர் திடீரென நடுவானில் இறந்ததால் குவைத்தில் விமானம் அவசரமாக தரையிறக்கப்பட்டது. எனினும் குவைத் விமான நிலையத்தில் தயாராகயிருந்த மருத்துவ உதவிக்குழு விமானியை சோதித்து அவர் இறந்ததை உறுதி செய்தனர்.

Source: Msn / Khaleej Times
தமிழில்: நம்ம ஊரான்

துபையில் விறுவிறுப்புடன் நடைபெற்று வரும் ஜீடெக்ஸ் ஷாப்பர் 2017 (படங்கள்)

அதிரை நியூஸ்: செப்.27
துபையில் கம்ப்யூட்டர், மொபைல், வீட்டு உபயோக மின்பொருட்கள் போன்ற பல புதிய சாதனங்களின் சில்லரை விற்பனைக்காக ஆண்டில் 2 முறை ஜீடெக்ஸ் எனப்படும் எலக்ட்ரானிக் பொருட்களின் விற்பனை கண்காட்சி நடைபெறும்.

இதில் ஏராளமான முன்னனி நிறுவனங்கள் பங்குபெற்று தங்களுடைய ஸ்டால்களை அமைப்பதுடன் தங்களுடைய ஷோரூம்களிலும் ஜீடெக்ஸ் சிறப்புத் தள்ளுபடி விலைக்கே பொருட்களை விற்பனை செய்வார்கள்.

27வது மற்றும் இந்த வருடத்தின் இலையுதிர்கால ஜீடெக்ஸ் ஷாப்பர்ஸ் (Gitex shopper Autumn) திருவிழா கடந்த 23.09.2017 சனிக்கிழமை முதல் நடைபெற்று வருகிறது அறிந்ததே.

8 நாட்கள் நடைபெறும் இந்த எலக்ட்ரானிக் பொருட்களின் விற்பனைத் திருவிழா எதிர்வரும் 30.09.2017 சனிக்கிழமையுடன் நிறைவுறும். காலை 11 மணிமுதல் இரவு 11 மணிவரை திறந்திருக்கும் இந்த ஜீடெக்ஸ் ஷாப்பர் விற்பனை கண்காட்சி வழமைபோல் துபை டிரேட் சென்டரில் நடைபெற்று வருவதுடன் நுழைவு கட்டணமாக 30 திர்ஹம் நிர்ணயிக்கப்பட்டுள்ளது.

Source: Gulf News
தமிழில்: நம்ம ஊரான்
 

செய்திகளை உடனுக்குடன் மின்னஞ்சலில் பெற...