Pages

Wednesday, November 20, 2019

தஞ்சை சரகத்தில் காவலர் பணியிடங்களுக்கு தேர்வானோர் சான்றிதழ் சரிபார்ப்பு பணி (படங்கள்)

தமிழ்நாடு சீருடைப் பணியாளர் தேர்வாணையம் சார்பில் இரண்டாம் நிலை காவலர், சிறைத் துறை காப்பாளர் (வார்டன்), தீயணைப்பாளர் உள்ளிட்ட 8826 காலிப் பணியிடங்களுக்கு எழுத்துத் தேர்வு நடைபெற்றது.

தஞ்சாவூர் காவல் சரகத்தில் எழுத்து தேர்வில் தேர்ச்சி பெற்ற 1168 ஆண்கள் மற்றும் 586 பெண்களுக்கு மத்திய மண்டல காவல்துறை தலைவர் வரதராஜூ, தஞ்சாவூர் காவல்துரை சரக காவல்துறை துணைத் தலைவர் லோகநாதன், தஞ்சை மாவட்ட காவல் கண்காணிப்பாளர் மகேஸ்வரன் ஆகியோர் மேற்பார்வையில், கடந்த 06-11-2019 முதல் 08-11-2019 வரை, பின்னர் 18-11-2019 முதல் 19-11-2019 ஆம் தேதி வரை உடற் கூறு அளத்தல் மற்றும் உடல் தகுதி தேர்வு நடைபெற்றது.

அத்தேர்வில், தகுதி பெற்ற 589 ஆண்கள் மற்றும் 149 பெண்களுக்கு தஞ்சாவூர் ஆயுதப்படை மைதானத்தில் இன்று (20-11-2019) புதன்கிழமை சான்றிதழ் சரிபார்ப்பு நடைபெற்றது. இதில், தகுதி பெறும் நபர்களுக்கு அடுத்தக் கட்டமாக மருத்துவ பரிசோதனை நடைபெறும். அதற்கான அறிவிப்பு தமிழ்நாடு சீருடைப் பணியாளர் தேர்வாணையத்தின் மூலம் வெளியிடப்படும் என தஞ்சாவூர் மாவட்ட காவல்துறை வெளியிட்டுள்ள செய்தி குறிப்பில் தெரிவிக்கப்பட்டுள்ளது.
 

அதிராம்பட்டினத்தில் தீ விபத்தில் பாதிப்படைந்த குடும்பங்களுக்கு நிவாரணப் பொருட்கள் வழங்கல்!

அதிராம்பட்டினம், நவ.20
தஞ்சாவூர் மாவட்டம், அதிராம்பட்டினம் மன்னப்பன் குளக்கரை பகுதியைச் சேர்ந்தவர் கோபு. இதே பகுதியில் இவருக்கு சொந்தமான வீடுகளில் மரியா (வயது 70), பாப்பாத்தி (வயது 75), மோகன் (வயது 55) ஆகிய மூவரும் தனித்தனியாக குடியிருந்து வருகின்றனர்.

இந்நிலையில், புதன்கிழமை நள்ளிரவு மோகன் என்பர் வீட்டில் திடீரென தீ பற்றியது. பின்னர், அருகில் இருந்த வீடுகளிலும், தீ மளமளவென பரவியது. இதனால், வீட்டில் இருந்த ஆவணங்கள் மற்றும் வீட்டு உபயோகப் பொருட்கள் அனைத்தும் தீயில் கருகியது. இதனால், அப்பகுதி முழுவதும் ஒரே புகை மண்டலமாக காட்சி அளித்தது. பின்னர், அப்பகுதி இளைஞர்கள் திரண்டு வந்து தீயை போராடி அணைத்தனர். இதனால், அருகில் உள்ள குடியிருப்பு பகுதிகளுக்கு தீ மேலும் பரவாமல் தடுக்கப்பட்டது. பின்னர், பட்டுக்கோட்டையில் இருந்து தீயணைப்பு வாகனத்தில் வந்த தீயணைப்பு வீரர்கள் தீயை முழுவதும் கட்டுக்குள் கொண்டு வந்தனர். மின் கசிவு காரணமாக தீ விபத்து ஏற்பட்டதாக கூறப்படுகிறது. தீ விபத்தில் காயமடைந்த மோகன் என்பவர் அதிராம்பட்டினம் அரசு மருத்துவமனையில் சிகிச்சை எடுத்து வருகிறார்.

இந்நிலையில், அதிரை சகோதரர்கள் வாட்ஸ்அப் குழும நண்பர்கள் சார்பில், தீ விபத்தில் பாதிப்படைந்த குடும்பங்களுக்கு, ரூ. 4 ஆயிரம் மதிப்பிலான அரிசி ஒரு மூடை, புடவை, கைலி, சட்டை, பெட் சீட், குடம், பக்கெட் உள்ளிட்ட நிவாரணப் பொருட்களை வழங்கி ஆறுதல் கூறினர்.

மேலும், அதிராம்பட்டினம் அரசு மருத்துவமனையில் சிகிச்சை பெற்றுவரும் மோகனை சந்தித்து ஆறுதல் கூறினர். இதில், அதிரை சகோதரர்கள் வாட்ஸ்அப் குழும பொறுப்பாளர்கள் எம். சாகுல் ஹமீது, இக்பால், ஜெய்னூல், தமீம் அன்சாரி, அரபாத், நாகூர் கனி, காசிம், சைபுதீன், சலீம் மாலிக், நசீர் அஹமத், அப்துல் சமது, குலாப்ஜாமூன் அன்சாரி, சாகுல் ஹமீது ஆகியோர் கலந்துகொண்டனர்.

வாக்காளர்களுக்கு முக்கிய அறிவிப்பு!

ந்திய தேர்தல் ஆணையம் அறிவித்துள்ளவாறு வரைவு வாக்காளர் பட்டியல் மற்றும் இறுதி வாக்காளர் பட்டியல் வெளியிடுவது தொடர்பாக திருந்திய கால அட்டவணை வெளியீடு தொடர்பாக தஞ்சாவூர் மாவட்ட பொது மக்களுக்கு மாவட்ட ஆட்சியரின் அறிவிப்பு...

இந்திய தேர்தல் ஆணையம் அறிவுறுத்தியுள்ளவாறு, தற்போது வாக்காளர் சரிபார்ப்பு பணி நடைபெற்று வருகிறது. இதன்படி, வாக்காளர்கள் தங்கள் பெயர், வயது, பாலினம், புகைப்படம், முகவரி, உறவுமுறை ஆகியவை தவறு ஏதுமின்றி, வாக்காளர் பட்டியலில் சரியாக இடம் பெற்றுள்ளதா என்பதை 1950 என்ற வாக்காளர் உதவி கட்டணமில்லா தொலைபேசி எண்ணில் தொடர்பு கொண்டு அல்லது ஸ்மார்ட் கைப்பேசியின் மொபைல் செயலி (Voters Helpline Mobile App)  மூலமாகவும், www.nvsp.in என்ற இணையதளம் வழியாகவும் மற்றும் மாவட்ட ஆட்சியர் அலுவலகம், வட்ட அலுவலகங்களில் செயல்படும் பொது சேவை மையம் மு்லமாகவும் வாக்காளர் பட்டியலில் இடம் பெற்றுள்ளதை உறுதி செய்து கொள்ளலாம்.

வாக்காளர்கள் சரிபார்ப்பு பணியினை, தேர்தல் ஆணையம் வருகிற 30-11-2019 வரை நீட்டிப்பு செய்துள்ளது.  வாக்காளர்கள் தங்கள் பெயர் சரியாக வாக்காளர் பட்டியலில் இடம் பெற்றுள்ளதை உறுதி செய்து கொள்ள ஏதுவாக கால நீட்டிப்பு செய்யப்பட்டுள்ளது.  இவ்வாய்ப்பினை தஞ்சாவூர் மாவட்ட வாக்காளர்கள் பயன்படுத்தி கொள்ளமாறு கேட்டுக் கொள்ளப்படுகிறது.

மேலும், வாக்காளர் பட்டியல் சிறப்பு சுருக்கமுறை திருத்தம். 2020 பணிகள் தொடர்பாக வரைவு வாக்காளர் பட்டியல் வெளியிடப்படும் தேதி மற்றும் இறுதி வாக்காளர் பட்டியல் வெளியிடப்படும் தேதி ஆகியவை கீழ்க்குறிப்பிட்டவாறு நடைபெறும் என இந்திய தேர்தல் ஆணையத்தால் அறிவிக்கப்பட்டுள்ளது.

(1) வாக்காளர் சரிபார்ப்பு திட்டம் தொடர்பான பணிகள் (Electors' Verification Programme)  வருகிற 30-11-2019 வரை மேற்கொள்ளலாம்.  எனவே, சரிபார்ப்பு செய்யாமல் உள்ள வாக்காளர்கள் சரிபார்த்துக் கொள்ளலாம்.

(2)  வரைவு வாக்காளர் பட்டியல் 16-12-2019 அன்று வெளியிடப்படவுள்ளது.

(3)  தகுதியுடைய வாக்காளரிடமிருந்து கேட்புரிமம் மற்றும் ஆட்சேபனைகள் )(Claims and Objections) குறித்த விண்ணப்பங்கள் (படிவம் எண் 6,7,8,8ஏ ஆகியன மு்லம் பெறப்படும்; காலம் 16-12-2019 முதல் 15-01-2020 வரை நடைபெறும்.

(4 ) பெறப்படும் விண்ணப்பங்கள் (Claims and Objections) மீது உhpய நடவடிக்கை மேற்கொண்டு முடிவு செய்யும் (Disposal) இறுதி நாள்  27-1-2020  ஆகும்.

(5)  துணை வாக்காளர் பட்டியல் தயார் செய்யும் பணி முடிவுறும் நாள்  04-02-2020

(6)  இறுதி வாக்காளர் பட்டியல் வெளியீடு நாள்  07-02-2020  ஆகும்.

இந்திய தேர்தல் ஆணையம் வெளியிட்டுள்ள மேற்கண்ட அறிவிப்பின்படி, தஞ்சாவூர் மாவட்டத்தில் உள்ள 8 சட்டமன்ற தொகுதிகளில் வாக்காளர் சரிபார்ப்பு பணி மற்றும் வாக்காளர் பட்டியல் சிறப்பு சுருக்கமுறை திருத்தம். 2020 தொடர்பான பணிகளை செம்மையாக உரிய காலக் கெடுவிற்குள் மேற்கொண்டு முடித்திடுமாறு தொடர்புடைய தேர்தல் தொடர்பான அலுவலர்கள் கேட்டுக் கொள்ளப்பட்டுள்ளார்கள்.

அதன்படி. தஞ்சாவூர் மாவட்டத்தில் தேர்தல் தொடர்பான அலுவலர்கள் வாக்காளர் சரிபார்ப்பு பணி மற்றும் மேற்குறிப்பிட்ட பணி தொடர்பாக கள ஆய்வு மேற்கொள்ள தங்கள் இல்லம் தேடி வரும்போது, அவர்களுக்கு வாக்காளர்கள் உரிய ஒத்துழைப்பு நல்கிடுமாறும், மேலும், வரைவு வாக்காளர் பட்டியல் மற்றும் இறுதி வாக்காளர் பட்டியல் அப்பழுக்கற்ற நிலையில் தஞ்சாவூர் மாவட்டத்தில் குறிப்பிட்ட காலக் கெடுவிற்குள் வெளியிட  உரிய ஒத்துழைப்பு அளிக்குமாறும் பொது மக்களை அன்புடன்  கேட்டுக் கொள்கிறேன். 

மரண அறிவிப்பு ~ வா.மீ அபூபக்கர் (வயது 69)

அதிரை நியூஸ்: நவ.20
அதிராம்பட்டினம், கிட்டங்கித்தெருவைச் சேர்ந்த மர்ஹூம் வ.மீ வரிசை முகமது அவர்களின் மகனும், மர்ஹூம் மா.மு முகமது இப்ராஹிம் அவர்களின் மருகனும், மா.மு சம்சுதீன், மா.மு அப்துல் லத்திப் ஆகியோரின் மச்சானும், பேராசிரியர் செய்யது அகமது கபீ, அஸ்கர், அப்துல் காதர் ஆகியோரின் மாமனாரும், சேக் மதீனா, நூர் முகமது, ஹபீப் ரஹ்மான் ஆகியோரின் தகப்பனாருமாகிய வா.மீ அபூபக்கர் (வயது 69) அவர்கள் நேற்று சி.எம்.பி லேன் இல்லத்தில் வஃபாத்தாகி விட்டார்கள்.

இன்னாலில்லாஹி வஇன்னா இலைஹி ராஜிஊன்.

அன்னாரின் ஜனாஸா இன்று (20-11-2019) காலை 10.30 மணியளவில் தக்வா பள்ளிவாசல் மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துஆ செய்வோம்.

Tuesday, November 19, 2019

உள்ளாட்சி தேர்தல் நடத்தும் அலுவலர்களுக்குப் பயிற்சி!

நடைபெறவுள்ள உள்ளாட்சி தேர்தல் 2019-ல் பணியாற்றவுள்ள மாவட்ட ஊராட்சி மற்றும் வட்டார ஊராட்சி வார்டுகளின் தேர்தல் நடத்தும் மற்றும் உதவி தேர்தல் நடத்தும் அலுவலர்களுக்கான பயிற்சி தஞ்சாவூர் மாவட்ட ஆட்சியரகத்தில் 19-11-2019 பிற்பகல் 04.00 மணிக்கு மாவட்ட ஆட்சித்தலைவர் ம.கோவிந்தராவ் தலைமையில் நடைபெற்றது.

அனைத்து தொடர்பான அலுவலர்களுக்கும் தஞ்சாவூர் மாவட்ட ஊரக வளர்ச்சி முகமையின் திட்ட இயக்குநர் மற்றும் மாவட்ட வருவாய் அலுவலரால் தேர்தலில் வேட்புமனு பெறுதல், பரிசீலித்தல், வாக்கு எண்ணிக்கை மற்றும் முடிவு அறிவித்தல் உள்ளிட்ட இவர்களது கடமைகளும், பொறுப்புகளும் குறித்த பயிற்சி அளிக்கப்பட்டது.

இப்பயிற்சியில் கூட்டுறவு சங்கங்களின் பதிவாளர், இணை இயக்குநர் (விவசாயம்), துணை ஆட்சியர்கள், உதவி இயக்குநர்கள், வட்டாட்சியர்கள் மற்றும் வட்டார வளர்ச்சி அலுவலர்கள் உள்ளிட்ட அலுவலர்கள் கலந்துக்கொண்டு பயிற்சி பெற்றனர்.

அதிராம்பட்டினம் பேரூராட்சி புதிதாக வரையறுக்கப்பட்டுள்ள வார்டுகள் (முழு விவரம்)

அதிராம்பட்டினம், நவ.19
21 வார்டுகளை உள்ளடக்கிய அதிராம்பட்டினம் தேர்வு நிலை பேரூராட்சியில், 11 வார்டுகளில் பெண்களும் (அதில் ஒரு வார்டில் ஆதி திராவிடர்), 10 வார்டுகளில் ஆண்களும் போட்டியிடும் வகையில் ஒதுக்கீடு செய்து கடந்த ஜூன் மாதம் அரசாணை வெளியிடப்பட்டது.

தமிழகத்தில் ஓரிரு வாரங்களில் உள்ளாட்சித் தேர்தலுக்கான அறிவிப்பு வெளியிடப்பட உள்ளது. இந்நிலையில், தஞ்சாவூர் மாவட்டம், அதிராம்பட்டினம் பேரூராட்சி சேர்மன், வார்டு கவுன்சிலர் ஆகிய பதவிகளுக்கு போட்டியிடும் பிரபல அரசியல் கட்சியினர், சுயேச்சை வேட்பாளர்கள் தீவிர முன்னேற்பாடு பணிகளில் ஈடுபட்டு வருகின்றனர்.

அதிராம்பட்டினம் பேரூராட்சியை பொறுத்தவரை பெண்களுக்கு 50 சதவிகிதத்திற்கும் மேலாக வார்டுகள் ஒதுக்கீடு செய்யப்பட்டுள்ளன. 2011 மக்கள்தொகை கணக்கெடுப்பின்படி வார்டுகள் ஒதுக்கீடு செய்யப்பட்டுள்ளதாக தெரிவிக்கப்பட்டுள்ளது.

பெண்கள் போட்டியிடும் வார்டுகள் குறித்து விவரம் அரசாணையில் வெளியிடப்பட்டுள்ளது. இதில், அதிராம்பட்டினம் பேரூராட்சியில் மொத்தம் 21 வார்டுகளை உள்ளடக்கியது. பெண்கள் (பொது) போட்டியிடும் வார்டுகள் 2, 3, 5, 8, 9, 10, 11, 14, 15, 19 ஆகிய 10 வார்டுகளில் போட்டியிடலாம். அதேபோன்று எஸ்.சி.பிரிவு பெண்கள் போட்டியிடும் வார்டு 1 என அறிவிக்கப்பட்டுள்ளது. மற்ற 10 வார்டுகளில் ஆண்கள் போட்டியிட முடியும்.

பெண்கள் போட்டியிடும் 11 வார்டுகள் விவரங்கள்:
1-வது வார்டு - மிலாரிக்காடு, வள்ளியம்மை நகர், அம்பேத்கர் நகர் (எஸ்.சி-பெண்கள்)

2-வது வார்டு - அம்பேத்கர் நகர், அதிரை நியூஸ்

3-வது வார்டு - மதுக்கூர் ரோடு, மண்ணப்பன்குளம், சால்ட் லேன், பிள்ளையார் கோவில் தெரு, தோப்புக்காடு

5-வது வார்டு - புதுமனைத் தெரு, ஆலடித்தெரு

8-வது வார்டு - மேலத்தெரு (மேல தென்புற கீழ்பக்கம், மேல தென்புற மேல்பக்கம்)

9-வது வார்டு - நடுத்தெரு மேல்புறம், காலியார் தெரு, வெற்றிலைக்காரத்தெரு, கீழத்தெரு

10-வது வார்டு - நடுத்தெரு கீழ்புறம், நடுத்தெரு கடைசி சந்து, நேருஜி தெரு, நேதாஜி தெரு, வ.உ.சி தெரு, செக்கடித்தெரு, அதிரை நியூஸ்

11-வது வார்டு - புதுத்தெரு வடபுறம், ஆஸ்பத்திரி தெரு, ஆஸ்பத்திரி ரோடு, பெருமாள் கோவில் தெரு, செல்லியம்மன் கோவில் தெரு

14-வது வார்டு - புதுத்தெரு தென்புறம், முத்தம்மாள் தெரு, திலகர் தெரு

15-வது வார்டு - கீழத்தெரு, புதுக்கடைத்தெரு, மார்க்கெட், புதுநெயக்காரத்தெரு

19-வது வார்டு - தைக்கால் தெரு, ஆறுமுகக்கிட்டங்கித்தெரு, காந்தி  நகர், பாரதியார் தெரு

ஆண்கள் போட்டியிடும் 10 வார்டுகள் விவரங்கள்:
4-வது வார்டு - பிள்ளையார் கோவில் தெரு, ஹாஜியார் லேன், போலீஸ் லேன், சங்கத்துகொல்லை, வீரனார் கோவில் தெரு, அண்ணா தெரு, சுப்பிரமணியர் கோவில் தெரு, அதிரை நியூஸ்

6-வது வார்டு - மேல நெயக்காரத் தெரு, சின்ன நெயக்காரத் தெரு, புதுமனைத்தெரு

7-வது வார்டு - மேலத்தெரு (மேல வடபுறம், கீழ வடபுறம்), மிலாரிக்காடு

12-வது வார்டு - சுப்ரமணியர் கோவில் தெரு

13-வது வார்டு - சால்ட் லேன், சுப்ரமணியர் கோவில் தெரு, சேதுரோடு

16-வது வார்டு - ஹாஜா நகர்

17-வது வார்டு -  ஆசாத் நகர், கடற்கரைத் தெரு, ஹாஜா நகர்

18-வது வார்டு - சேக் உதுமான் தெரு, கடற்கரைத்தெரு, ரயில்வே ஸ்டேசன் ரோடு

20-வது வார்டு - மாரியம்மன் கோவில் தெரு, சிவன் கோவில் தெரு, பெரியார் தெரு, சேதுரோடு, அதிரை நியூஸ்

21-வது வார்டு - மாரியம்மன் கோவில் தெரு

தொகுப்பு: சேக்கனா நிஜாம்

அதிராம்பட்டினத்தில் குளிரால் வாடும் ஆதரவற்றோருக்கு போர்வை வழங்கிய ரோட்டரி சங்கம்!

அதிராம்பட்டினம், நவ.19
அதிராம்பட்டினம் ரோட்டரி சங்கம் சார்பில், பேருந்து நிலையம் மற்றும் சாலையோரங்களில் இரவில் கொட்டும் பனியில் குளிரில் படுத்து உறங்கிய ஆதரவற்ற 40 நபர்களுக்கு, சங்கத் தலைவர் டி.முகமது நவாஸ்கான் தலைமையில், போர்வை, பிஸ்கட், பாய், மெழுகுவர்த்தி, கொசுவிரட்டி சுருள் உள்ளிட்டவை திங்கட்கிழமை இரவு வழங்கப்பட்டது.

இந்நிகழ்ச்சியில், ரோட்டரி சங்க மாவட்டத் தலைவர் நடராஜன், அதிராம்பட்டினம் ரோட்டரி சங்கச் செயலாளர் எஸ். சாகுல்ஹமீது, பொருளாளர் ஆர்.பிரபு, முன்னாள் தலைவர் எம்.கே சம்சுதீன், முன்னாள் செயளர் இசட். அகமது மன்சூர், சங்க உறுப்பினர் ஜெ.அமீன் நவாஸ்கான், இப்ராஹீம், எஸ்.முகமது யூனுஸ் ஆகியோர் கலந்துகொண்டனர்.
 

Monday, November 18, 2019

சவுதியில் தமிழக மாணவிக்கு இந்திய தூதர் பாராட்டு!

அதிரை நியூஸ்: நவ.18
திருச்சி பீமா நகரை சேர்ந்த பன்னாட்டு தொழிலதிபர் அப்துல் மஜீத் பதுருதீன். இவரது மகள் ஃபாத்திமா (வயது 13) சவுதி அரேபியா ஜூபைலில் இந்திய தூதரக சர்வதேச பள்ளியில் 7 ஆம் வகுப்பு படித்து வருகிறார். துப்பாக்கி சுடுதலில் ஆர்வம் கொண்டவரான இவர், தமிழகத்தில் பெரம்பலூர், கோயம்புத்தூர் ஆகிய பகுதிகளில் நடைபெற்ற மாவட்ட அளவிலான துப்பாக்கிச் சுடும் போட்டிகளில் பங்கேற்று சிறப்பிடம் பெற்றுள்ளார்.

இந்நிலையில், சவுதி ஜூபைல் இந்திய தூதரக சர்வதேச பள்ளியில் (நவ.17) ஞாயிற்றுக்கிழமை நடைபெற்ற பாராட்டு விழாவில், சிறப்பு விருந்தினராக சவுதி அரேபியாவுக்கான இந்தியத் தூதர் அவூசாப் சயீது (Ausaf Sayeed) கலந்துகொண்டு மாணவி ஃபாத்திமாவை பாராட்டி வாழ்த்து தெரிவித்தார்.

பள்ளி விடுமுறையில் இந்தியா திரும்பும் மாணவி ஃபாத்திமா துப்பாக்கி சுடும் வீரர் அதிரை வஜீர் அலி வழிகாட்டுதலின் பேரில், கடந்த ஜூலை மாதம் 21, 22 ஆகிய தேதிகளில் பெரம்பலூர் மாவட்ட ரைபிள் கிளப்பில் நடைபெற்ற INTER DISTRICT OPEN MATCH AIR RIFLE / PISTOL 2019 போட்டியில் 10 M, AIR PISTOL SUB JUNIOR NR & ISSF ஆகிய பிரிவுகளில் பங்குபெற்று மூன்று வெள்ளி மற்றும் ஒரு வெண்கலப் பதக்கங்கள் வென்றார். மேலும், கடந்த ஜூலை, ஆகஸ்ட் மாதங்களில் கோயம்புத்தூர் ரைபிள் கிளப்பில் நடைபெற்ற 45-வது மாநில அளவிலான துப்பாக்கி சுடும் போட்டியில் 10 M, AIR PISTOL பிரிவில் கலந்துகொண்டு சிறப்பிடம் பெற்றுள்ளது குறிப்பிடத்தக்கது.
 

தஞ்சாவூர் மாவட்ட ஆட்சியராக ம.கோவிந்தராவ் பொறுப்பேற்பு!

தஞ்சாவூர் மாவட்ட ஆட்சித் தலைவராக ம.கோவிந்தராவ் இன்று (நவ.18) திங்கட்கிழமை முதல் பொறுப்பேற்றுக்கொண்டார். இவர், இதற்கு முன் சென்னை மாநகராட்சி துணை ஆணையராக பணியாற்றியுள்ளார்.

முன்னதாக, இவர், தமிழக முதல்வர் எடப்பாடி கே.பழனிச்சாமியை கடந்த (16-11-2019) அன்று சந்தித்து வாழ்த்து பெற்றார்.

தஞ்சை மாவட்ட ஆட்சியராக இருந்த ஆ.அண்ணாதுரை தற்போது விழுப்புரம் மாவட்ட ஆட்சியராக இடமாற்றம் செய்யப்பட்டுள்ளார்.

அதிரை பேரூர் சேர்மன் பதவிக்கு அதிமுக வேட்பாளராக போட்டியிட விரும்பும் பிரபலங்கள்!

வலது புறத்தில் அதிரை அப்துல் அஜீஸ், இடது புறத்தில் எம்.ஏ  முகமது தமீம்
அதிராம்பட்டினம், நவ.18
அதிமுக சிறுபான்மை நலப்பிரிவு மாவட்டச் செயலாளராக பொறுப்பில் இருப்பவர் அதிரை அப்துல் அஜீஸ். இவர் கடந்த உள்ளாட்சி தேர்தலில், அதிராம்பட்டினம் பேரூர் சேர்மன் பதவிக்கு போட்டியிட்டு 2-ஆம் இடத்தை பிடித்தார்.

அதேபோல், அதிமுக அதிராம்பட்டினம் பேரூர் துணைச்செயலாளராக பொறுப்பு வகிப்பவர் எம்.ஏ முகமது தமீம். இவர், அதிமுகவில் கடந்த 1998 ஆம் ஆண்டு முதல் இணைந்து தீவிரமாக களப்பணியாற்றி வருபவர்.

இந்நிலையில், உள்ளாட்சி தேர்தலில் அதிமுக சார்பில் போட்டியிடுவோருக்கு விண்ணப்ப மனு விநியோகம் கடந்த (நவ.15) அன்று தொடங்கியதையடுத்து, அதிராம்பட்டினம் பேரூர் சேர்மன் பதவிக்கான விண்ணப்ப படிவத்தை அக்கட்சியின் தஞ்சை தெற்கு மாவட்டச் செயலாளர் ஆர்.வைத்திலிங்கம் எம்.பியிடம், அதிரை அப்துல் அஜீஸும், முன்னாள் சட்டமன்ற உறுப்பினர் பி.என் ராமச்சந்திரன், மாவட்ட துணைச் செயலாளர் ஆர்.காந்தி ஆகியோரிடம் எம்.ஏ முகமது தமீமும் வழங்கினர். இரு பிரபலங்களில் யாருக்கு போட்டியிடும் வாய்ப்பு கிடைக்கும் என்பது அக்கட்சி தலைமையகம் வெளியிடும் அறிவிப்பை பொறுத்து அமையும். 

Thursday, November 14, 2019

ஆணையாங் குளத்துக்கு ஆற்று நீர் !

அதிராம்பட்டினம், நவ.14
அதிராம்பட்டினம் பேரூராட்சிக்கு உட்பட்ட வண்டிப்பேட்டை பகுதியில் அமைந்துள்ளது ஆலடிக்குளம். தற்போது, பம்பிங்  நீர், ஆற்று நீர் வரத்து அதிகரித்ததால் குளத்தில் நீர் நிரம்பிக் காணப்படுகிறது. இக்குளத்தின் வடிகால் தூர்ந்து போனதால் கடந்த சில ஆண்டுகளுக்கு முன்பாக குளத்தில் நிரம்பிய நீர் வெளியேற முடியாமல் அருகில் உள்ள ஆலடித்தெரு குடியிருப்பு பகுதியில் புகுந்துவிடும் அபாயம் நிலவியது.

இந்நிலையில், இப்பகுதி பொதுமக்கள் வைத்த கோரிக்கையின் பேரில், ஆலடிக்குளத்தில் நீர் நிரம்பிய பின், அதன் அருகில் உள்ள ஆணையாங் குளத்துக்கு நீரை கொண்டு செல்லும் வகையில், அதன் வழித்தட பாதையை புனரமைக்கும் பணியில், அதிராம்பட்டினம் பேரூர் முன்னாள் துணைத் தலைவர் ஏ.பிச்சை, அதிராம்பட்டினம் கூட்டுறவு வங்கி துணைத்தலைவர் எம்.ஏ முகமது தமீம், முன்னாள் கவுன்சிலர்கள் சிவக்குமார், உதயகுமார், ஹாஜா பகுருதீன், முருகானந்தம், செல்வம் உள்ளிட்டோர் ஈடுபட்டனர். இதற்காக, ஆணையாங்குளம்  ~ ஆலடிக்குளம் இடையே சுமார் 300 மீட்டர் நீளம் கொண்ட தூர்ந்து போன வடிகால் வாய்க்காலை வருவாய்துறை அதிகாரிகள், அதிராம்பட்டினம் பேரூராட்சி அலுவலர்கள் உதவியோடு அளவீடு செய்து, ஜே.சி.பி வாகனத்தைக் கொண்டு தூர் வாரும் பணியில் ஈடுபட்டனர். 

கடந்த சில நாள்களாக நடந்து வந்த பணிகள் நிறைவடைந்ததை அடுத்து ஆலடிக்குளம் வடிகாலில் இருந்து ஆணையாங்குளத்துக்கு இன்று வியாழக்கிழமை நீர் வரத்தொடங்கியது. 

கடந்த 20 ஆண்டுகளுக்கு முன்பு வரை, மழை காலங்களில் ஆணையங் குளத்தில் தண்ணீர் நிரம்பி காணப்படும். காலப்போக்கில் ஆக்கிரமிப்பாலும், கொட்டப்படும் குப்பைக் கழிவுகளாலும் குளம் இருக்கும் இடமே பலருக்கு தெரியாத நிலை ஏற்பட்டது. இக்குளத்தை சுற்றிக்காணப்படும் ஆக்கிரமிப்புகளை அகற்றி, தூர் வாரி, பொதுமக்கள் நீராடும் வகையில், குளத்தின் பெரும்பகுதியில் படர்ந்துள்ள வெங்காயத் தாமரைகளை அகற்றுவதற்கு உரிய துரித நடவடிக்கை மேற்கொள்ள வேண்டுமென இப்பகுதி பொதுமக்கள் வலியுறுத்திகின்றனர். 
 

உள்ளாட்சி தேர்தலில் போட்டியிட விண்ணப்ப மனுவை எஸ்.எச் அஸ்லம் பெற்றார்!

அதிராம்பட்டினம், நவ.14
உள்ளாட்சி தேர்தலில் திமுக சார்பில் போட்டியிடுவோருக்கு விண்ணப்ப மனு விநியோகம் இன்று (நவ.14) வியாழக்கிழமை தொடங்கியதை அடுத்து,  அதிராம்பட்டினம் பேரூர் சேர்மன் மற்றும் வார்டு கவுன்சிலர் பதவிகளுக்கான விண்ணப்ப படிவத்தை, தஞ்சை நகர் மன்ற முன்னாள் தலைவர் இறைவன், மாவட்ட பொருளாளர் எல்.ஜி.அண்ணா ஆகியோரிடமிருந்து, அதிராம்பட்டினம் பேரூர் முன்னாள் சேர்மன் எஸ்.எச் அஸ்லம் திமுக மாவட்ட அலுவலகத்தில் இன்று வியாழக்கிழமை பெற்றுக்கொண்டார்.

அப்போது, திமுக தஞ்சை தெற்கு மாவட்ட துணைச் செயலாளர் கா.அண்ணாதுரை, திமுக பட்டுக்கோட்டை நகர பொறுப்பாளர் செந்தில் குமார், பட்டுக்கோட்டை நகர் மன்ற முன்னாள் உறுப்பினர் ஸ்ரீதர் ஆகியோர் உடனிருந்தனர்.
 
 

ரோட்டரி சங்கம் சார்பில் குழந்தைகள் தின விழா கொண்டாட்டம்!

அதிராம்பட்டினம், நவ.14
அதிராம்பட்டினம் ரோட்டரி சங்கம் சார்பில், குழந்தைகள் தின விழா கொண்டாட்டம், அதிராம்பட்டினம் அரசு மருத்துவமனையில் இன்று வியாழக்கிழமை காலை நடைபெற்றது.

அதிராம்பட்டினம் அரசு மருத்துவமனை தலைமை மருத்துவர் டாக்டர் எஸ். கார்த்திகேயன் கலந்துகொண்டு, குழந்தைகள் தினா விழா உரை நிகழ்த்தினார். இதில், அதிராம்பட்டினம் அரசு மருத்துவமனையில் பிறந்த குழந்தைகளுக்கு  உடை, ஆயில், பவுடர், சோப் மற்றும் பழங்கள் அடங்கிய பரிசு பெட்டகம் அன்பளிப்பாக வழங்கப்பட்டன.

இந்நிகழ்ச்சியில், அதிராம்பட்டினம் ரோட்டரி சங்கத் தலைவர் டி.முகமது நவாஸ்கான், செயலாளர் எஸ். சாகுல்ஹமீது, பொருளாளர் ஆர்.பிரபு, முன்னாள் செயளர் இசட். அகமது மன்சூர், சங்க உறுப்பினர் ஏ. ஜமால் முகமது உள்ளிட்ட பலர் கலந்து கொண்டனர்.

Wednesday, November 13, 2019

அதிராம்பட்டினத்தில் மீண்டும் பன்றிகள் நடமாட்டம்!

அதிராம்பட்டினம், நவ.13
அதிராம்பட்டினம் பேரூர் பகுதியில் கடந்த 2014 ஆம் ஆண்டு வரை பன்றிகள் தொல்லை அதிகமாக இருந்தது. அதன்பிறகு, அதிராம்பட்டினம் பேரூராட்சி நிர்வாகத்தின் நடவடிக்கை காரணமாக பன்றிகள் நடமாட்டம் படிப்படியாக குறைந்து முற்றிலும் ஒழிந்தது.

இந்நிலையில், தற்போது கடந்த சில நாள்களாக பன்றிகள் நடமாட்டம் காணப்படுகின்றன. அதிராம்பட்டினம் ரயில் நிலையம், பிலால் நகர் உள்ளிட்ட பகுதிகளில் பன்றிகள் சுற்றித்திரிகின்றன.

அதிராம்பட்டினம் பேரூராட்சிக்கு உட்பட்ட பகுதியில் கொட்டப்படும் குப்பைக்கழிவுகள், இறைச்சிக்கழிவுகள், ஆங்காங்கே தேங்கி நிற்கும் கழிவு நீர் ஆகிய இடங்களில் பன்றிகள் காணப்படுகின்றன. இதனால், தொற்று நோய் பரவும் சூழலும், சுகாதாரச் சீர்கேடு ஏற்படும் அபாயமும் எழுந்துள்ளது.

எனவே, அதிராம்பட்டினம் பேரூராட்சி நிர்வாகம் பன்றிகள் நடமாட்டத்தை தடுக்க, துரித நடவடிக்கை மேற்கொள்ள வேண்டுமென பொதுமக்கள் வலியுறுத்தியுள்ளனர்.
 

செய்திகளை உடனுக்குடன் மின்னஞ்சலில் பெற...