Pages

Friday, July 3, 2020

அதிராம்பட்டினத்தில் 17 அம்ச கோரிக்கைகளை வலியுறுத்தி ஆர்ப்பாட்டம்!

அதிராம்பட்டினம், ஜூலை 03
அனைத்து தொழிற் சங்கங்கள் சார்பில், மத்திய, மாநில அரசுகளின் தொழிலாளர் விரோத கொள்கைகளைக் கண்டித்து நாடு தழுவிய போராட்டம் வெள்ளிக்கிழமை நடத்த அறிவுறுத்தப்பட்டதன் பேரில், அதிராம்பட்டினம் பேருந்து நிலையத்தில் கண்டன ஆர்ப்பாட்டம் நடைபெற்றது.

ஆர்ப்பாட்டத்திற்கு, இந்திய கம்னியூனிஸ்ட் கட்சி அதிராம்பட்டினம் பேரூர் செயலாளர் என். காளிதாஸ் தலைமை வகித்தார். இதில், ஏ.ஐ.ஓய்.எப் ஒன்றியச் செயலாளர் கே.ஹாஜா முகைதீன், ஏ.எச் பசீர் அகமது, கே. பிச்சமுத்து, எம்.சுப்பிரமணியம், எம்.முகமது இக்பால், எஸ். முகமது மீராஷாகிப், அப்துல் முனாப் உள்ளிட்ட பலர் கலந்து கொண்டு, அனைத்து குடும்பங்களுக்கும் தலா ரூ.7,500 வீதம் 3 மாதங்களுக்கு ரூ.22,500 நிவாரணம் வழங்கவேண்டும், கட்டுமானம், ஆட்டோ, கைத்தறி, சுமை, மீனவர், அமைப்பு சாரா உள்ளிட்ட அனைத்து தொழிலாளர்களுக்கும் நிபந்தனையின்றி நிவாரணம் வழங்க வேண்டும், பொது முடக்கத்தால் பாதிக்கப்பட்ட 40 கோடி மக்களுக்கும் 6 மாதத்திற்கு தேவையான உணவுப்பொருட்கள் வழங்க வேண்டும், பொதுத்துறை நிறுவனங்களை தனியாருக்கு விற்காதே, மின்சார சட்டதிருத்த மசோதாவை கைவிடு, நாள்தோறும் உயர்ந்து வரும் பெட்ரோல், டீசல் விலை உயர்வை கட்டுப்படுத்த வேண்டும், புலம்பெயர்ந்த தொழிலாளர்களுக்கு பாதுகாப்பும், மறுவாழ்வும் அளிக்க வேண்டும் என்பன உள்ளிட்ட 17 அம்ச கோரிக்கைகளை வலியுறுத்தி சமூக இடைவெளியுடன், முகக்கவசம் அணிந்துகொண்டு முழக்கங்கள் எழுப்பினர்.
 
 
 


Thursday, July 2, 2020

ஜல் ஜீவன் திட்டம்: தஞ்சை மாவட்ட ஊரகப்பகுதிகளில் அனைத்து வீடுகளுக்கு குடிநீர் இணைப்பு!

அதிரை நியூஸ்: ஜூலை 02
தஞ்சாவூர் மாவட்டம், ஒரத்தநாடு ஊராட்சி ஒன்றியம், கோவிலூர் ஊராட்சியில் ஜல்ஜீவன் திட்ட செயல்பாடு குறித்து மாவட்ட ஆட்சித் தலைவர் ம.கோவிந்த ராவ் தலைமையில் இன்று (02.07.2020) விழிப்புணர்வு கூட்டம் நடைபெற்றது.

விழிப்புணர்வு கூட்டத்தில் மாவட்ட ஆட்சித் தலைவர் பேசியதாவது :-
தஞ்சாவூர் மாவட்டத்தில் ஜல்ஜீவன் எனப்படும் அனைத்து வீடுகளுக்கும் குடிநீர் திட்டம் செயல்படுத்தப்பட்டு வருகிறது. ஊரகப் பகுதிகளில் உள்ள அனைத்து வீடுகளுக்கும் குடிநீர் இணைப்பு வழங்குவதே இத்திட்டத்தின் நோக்கமாகும். மத்திய அரசால் அனைத்து மாநிலங்களிலும் இத்திட்டம் செயல்படுத்தப்பட்டு வருகிறது. தஞ்சாவூர் மாவட்டத்தில் ஜல்ஜீவன் திட்டத்தின்கீழ் நடப்பாண்டில் 159  கிராம ஊராட்சிகள் தேர்ந்தெடுக்கப்பட்டுள்ளன.

அடுத்த நான்கு வருடங்களுக்குள் தஞ்சாவூர் மாவட்ட ஊரக பகுதிகளில் உள்ள அனைத்து வீடுகளுக்கும் ஜல் ஜீவன் திட்டத்தின்கீழ் குடிநீர் இணைப்பு வழங்கப்படும். தரமான குடிநீர், தேவையான அளவு குடிநீர், அனைத்து நேரங்களிலும் குடிநீர் வழங்குவதே ஜல்ஜீவன் திட்டத்தின் இலக்காகும். கிராமத்திலுள்ள நீராதாரங்களை கண்டறிந்து அவற்றை சரிசெய்து நீர் வளத்தை பெருக்குவதன் மூலம் அனைத்து வீடுகளுக்கும் குடிநீர் இணைப்பு வழங்கிட முடியும். தடையின்றி தண்ணீர் பெறுவதற்கான பராமரிப்பு பணிகளை மேற்கொள்ள பொதுமக்கள் முழு ஒத்துழைப்பு அளிக்க வேண்டும். பல்வேறு துறைகளில் செயல்படுத்தப்படும் திட்டங்களை ஒருங்கிணைத்து ஜல்ஜீவன் திட்டத்தின் கீழ் அனைத்து வீடுகளுக்கும் குடிநீர் வழங்குவதற்கான நடவடிக்கை எடுக்கப்பட்டு வருகிறது. தஞ்சை மாவட்டத்தில் 6 லட்சத்து 50 ஆயிரம் வீடுகள் உள்ளன. 589 ஊராட்சிகளில், 2260 குக்கிராமங்கள் உள்ளன. மத்திய அரசின் ஜல் ஜீவன் திட்டத்தின் கீழ் 159 ஊராட்சியை தேர்ந்தெடுத்துள்ளாம். வரும்  2024 ஆண்டுக்குள் மீதமுள்ள அனைத்து கிராம ஊராட்சிகளிலுள்ள அனைத்து வீடுகளிலும் குடிநீர் வழங்க உள்ளோம்.

அதற்கு தேவையான ஆழ்குழாய் போர் மூலம் தண்ணீர் எடுப்பதற்குää  நிலத்தடி நீரை பெருக்கவும், குளம், ஏரி, மழை நீர் சேகரிப்பு தொட்டி அமைத்து சேமிக்க வேண்டும்.மழையே இல்லாவிட்டாலும், தண்ணீர் கிடைக்கும் வகையில் இந்த திட்டத்தின் மூலம் அமைக்கப்படும். இந்த திட்டத்தை கிராம சபா கூட்டம் மூலம்,  தண்ணீரை சேமிக்கும் வகையில் மேல்நிலைநீர்த்தேக்கத்தொட்டிக்கு கொண்டு சென்று, அதிலிருந்து வீடுகளுக்கு கொண்டு செல்வது, எப்படி பயன்படுத்துவது பற்றி முடிவு செய்து கொள்ளவேண்டும். ஊராட்சியிலுள்ளவர்கள் நிலத்தடி நீர் மட்டும் பெருக்குவதற்கு உறுதி செய்ய வேண்டும். அதில் தங்களை ஈடுபடுத்திகொள்ள வேண்டும்.   இந்த திட்டத்தின் கீழ் 100 சதவீதம் அனைத்து வீடுகளுக்கு தண்ணீர் வழங்கப்படும்.

இது தொடர்பாக குளம், ஏரி, வாய்க்கால்களில் தண்ணீர் வரத்து, வெளியேற்றம், தோப்புகள் அதற்கு வரும் தண்ணீர் பாதைகள் குறித்து வரைபடம் வரைந்து, ஆலோசனை செய்யப்படும். தண்ணீரை சேமிக்கவும்ää நிலத்தடி நீர் மட்டத்தை உயர்த்தவும் கிராம மக்கள் கூறும் கருத்துகளின் அடிப்படையில் தான் இத்திட்டங்கள் செயல்படுத்த முடியும்.
இவ்வாறு மாவட்ட ஆட்சித் தலைவர் பேசினார்.

இக்கூட்டத்தில் மாவட்ட ஊரக வளர்ச்சி முகமை திட்ட இயக்குனர் பழனி,  கால்நடை பராமரிப்புத்துறை மண்டல இணை இயக்குனர் டாக்டர் தமிழ்ச்செல்வம், வேளாண்மைத்துறை இணை இயக்குனர் ஜஸ்டின், மீன்வளத்துறை உதவி இயக்குனர் சிவகுமார், ஊராட்சிகளின் உதவி இயக்குனர் முருகேசன், வட்டார வளர்ச்சி அலுவலர்கள் முருகன், ரமேஷ், ஒன்றிய குழு தலைவர் பார்வதிசிவசங்கர், ஊராட்சி மன்ற தலைவர் ஜெகதீசன், அரசு அலுவலர்கள் மற்றும் பொதுமக்கள் கலந்து கொண்டனர்.

தொடர்ந்து, கோவிலூர் ஊராட்சிக்குட்பட்ட பகுதிகளில் அமைந்துள்ள நீர்நிலைகளை நேரில் பார்வையிட்ட மாவட்ட ஆட்சித்தலைவர் நீர்நிலைகளுக்குக்கான வரத்து வாய்க்கால்களில் சுமார் 5 கிமீ தூரம் நடந்தே சென்று தலைப்பு பகுதிவரை பார்வையிட்டு, வரத்து வாய்க்கால் முறையாக தூர்வாரப்பட்டுள்ளதா என ஆய்வு செய்தார்.

அதனைத் தொடர்ந்து, கோவிலூர் ஊராட்சிக்குட்பட்ட அம்பலக்கார தெரு, மேலத்தெரு, ஆதிதிராவிடர் தெரு,ä அரசினர் ஆதிதிராவிடர் நல ஆரம்பப்பள்ளி மற்றும் பொதுமக்கள் அதிகம் வசிக்கும் தெருக்களில் தண்ணீர் முறையாக வருகிறதா என நேரில் பார்வையிட்டு ஆய்வு செய்து, ஒரு குடும்பத்திற்கு தேவையான நீரின் அளவு, தற்போது பயன்படுத்தப்படும் தண்ணீர் அளவு ஆகியவை குறித்து பொதுமக்களிடம் கேட்டறிந்து நேரில் பார்வையிட்டு ஆய்வு செய்தார். தொடர்ந்து, மாவட்ட ஆட்சித் தலைவர் தலைமையில் ஜல் ஜீவன் திட்டம் குறித்து கருத்து கேட்பு கூட்டம் நடைபெற்றது.

சவுதியில் அதிராம்பட்டினம் அமீர் முகைதீன் (40) வஃபாத்!

அதிரை நியூஸ்: ஜூலை 02
அதிராம்பட்டினம், மேலத்தெருவைச் சேர்ந்த ஹாஜி ஏ. சரபுதீன் அவர்களின் மகனும், மர்ஹூம் டி.தீன் முகமது அவர்களின் மருமகனும், அகமது முகைதீன், ஜமாலுதீன், பைசல் முகமது, இர்பான், தாரிக் அகமது ஆகியோரின் சகோதரருமாகிய அமீர் முகைதீன் (வயது 40) அவர்கள் இன்று சவுதி ரியாத்தில் வஃபாத்தாகி விட்டார்கள்.

இன்னாலில்லாஹி வஇன்னா இலைஹி ராஜிஊன்.

அன்னாரின் ஜனாஸா சவுதியில் நல்லடக்கம் செய்யப்படும். (நேரம் பின்னர் அறிவிக்கப்படும்)

அன்னாரின் மறுமை வாழ்வு சிறக்க துஆ செய்வோம்.

பட்டுக்கோட்டை ரோட்டரி சங்கம் சார்பில் அன்னதானம் வழங்கல் (படங்கள்)

பட்டுக்கோட்டை, ஜூலை 02
பட்டுக்கோட்டை ரோட்டரி சங்கம் சார்பில் நிகழாண்டின் சிறப்புத் திட்டமான அன்னபூர்ணா திட்டத்தின் கீழ், உதயசூரியபுரம் கிராமத்தில் வசிக்கும் நரிக்குறவர்கள் சமுதாய மக்கள் 200 பேருக்கு புதன்கிழமை அன்னதானம் வழங்கப்பட்டது. மேலும், மருத்துவர்கள் தினத்தை முன்னிட்டு, சங்க உறுப்பினர்களான பட்டுக்கோட்டையில் உள்ள மருத்துவர்களின் மருத்துவமனைகளுக்கு முகக்கவசங்கள், கிருமி நாசினி ஆகியவை வழங்கப்பட்டன.

இந்நிகழ்வில், ரோட்டரி சங்க மண்டல துணை ஆளுநர் ஏ.ஆர் அன்பு, பட்டுக்கோட்டை ரோட்டரி சங்கத் தலைவர் எஸ். பைசல் அகமது, செயலாளர் ஏ. சக்திவேல், பொருளாளர் எஸ் சுல்தான் இப்ராகிம் மற்றும் சங்க உறுப்பினர்கள் பலர் கலந்து கொண்டனர்.
 
 
 
 
 
 
 

அதிராம்பட்டினத்தில் கப சூரக் குடிநீர் வழங்கல்!

அதிராம்பட்டினம், ஜூலை 02
கரோனா வைரஸ் தடுப்பு முன்னெச்சரிக்கை நடவடிக்கையாக, உடலில் நோய் எதிர்ப்பு சக்தியை அதிகரிக்கும் வகையில், முத்தூட் பின்கார்ப் நிறுவனம் சார்பில், அதிராம்பட்டினம் பேருந்து நிலையம் அருகில் பொதுமக்களுக்கு கப சுரக் குடிநீர் வியாழக்கிழமை வழங்கப்பட்டது.

இதில், வர்த்தகர்கள், பயணிகள், வாகன ஓட்டுனர்கள் உள்பட பொதுமக்கள் சமூக இடைவெளியை பின்பற்றி கப சூரக் குடிநீரை வாங்கி அருந்தினர். இந்நிகழ்வில், அந்நிறுவன அலுவலர்கள், பணியாளர்கள் கலந்துகொண்டனர்.
 

தஞ்சை மாவட்டம்: அனுமதி, தளர்வுகள், கட்டுப்பாடுகள் (முழு விவரம்)

அதிரை நியூஸ்: ஜூலை02
தஞ்சாவூர் மாவட்டம், மாவட்ட ஆட்சியர் அலுவலக கூட்டரங்கில் வழிபாட்டுத் தலங்களில் பின்பற்ற வேண்டிய விதிமுறைகள் குறித்து மாவட்ட ஆட்சித் தலைவர் ம.கோவிந்த ராவ் தலைமையில் அனைத்து மத பிரதி நிதிகளுடன் இன்று (01.07.2020) ஆலோசனைக் கூட்டம் நடைபெற்றது.

கூட்டத்தில் மாவட்ட ஆட்சித்தலைவர் தெரிவித்ததாவது:-
தஞ்சாவூர் மாவட்டத்தில் கோட்ட அளவில் வருவாய்க் கோட்ட அலுவலர் அவர்கள் தலைமையிலும், வட்ட அளவில் வட்டாட்சியர் தலைமையிலும் குழுக்கள் அமைக்கப்பட்டு, வழிபாட்டுத் தலங்களில் விதிமுறைகள் பின்பற்றப்படுவது கண்காணிக்கப்படவுள்ளது. நகர்ப் பகுதிகளில் வழிபாட்டுத் தலங்களை திறப்பதற்கு அனுமதி கிடையாது. ஊரகப் பகுதிகளில் ஆண்டு வருமானம் ரூபாய் பத்தாயிரம் வருமானத்திற்கு குறைவாக உள்ள வழிபாட்டு தலங்களை மட்டும் திறப்பதற்கு அனுமதி அளிக்கப்பட்டுள்ளது. வழிபாட்டுத் தலங்களில் நிர்வாக குழு அமைத்து முககவசம் அணிதல், சமூக இடைவெளி கடைப்பிடித்தல், கிருமிநாசினி தெளித்தல் ஆகியவற்றை உறுதி செய்திட வேண்டும். 10 வயதுக்கு குறைவான நபர்களையும், 60 வயதுக்கு மேற்பட்ட நபர்களையும் அனுமதிக்க கூடாது. இவ்வாறு மாவட்ட ஆட்சித் தலைவர் தெரிவித்தார்.

பின்னர், மாவட்ட ஆட்சித் தலைவர் செய்தியாளர்களிடம் தெரிவித்ததாவது:
கொரோனா வைரஸ் நோய்த்தொற்றை தடுப்பதற்காக மத்திய அரசு தேசிய பேரிடர் மேலாண்மைச் சட்டத்தின்கீழ் 25-03-2020 முதல் ஊரடங்கு உத்தரவு அமல்படுத்தியதைத் தொடர்ந்து. தமிழ்நாடு அரசும் தமிழ்நாடு முழுவதும் ஊரடங்கை அமல்படுத்தியது. இதைத் தொடர்ந்து, கொரோனோ தொற்றின் நிலைமையை கருத்திற்கொண்டும். மக்களின் வாழ்வாதாரத்தை கருத்திற்கொண்டும் சில தளர்வுகளுடன் 30-06-2020 வரை ஊரடங்கு நீட்டிக்கப்பட்டது.

தமிழக அரசின் ஆணைப்படி, கொரோனோ வைரஸ் தொற்றை தடுப்பதற்காக பேரிடர் மேலாண்மை சட்டத்தின் கீழும், ஏற்கனவே நடைமுறையில் உள்ள பல்வேறு கட்டுப்பாடுகளுடனும், தளர்வுகளுடனும் தற்போது 30-06-2020 முடிவடைய உள்ள ஊரடங்கு உத்தரவு 31-07-2020 நள்ளிரவு 12,00 மணி வரை தமிழ்நாடு முழுவதும் நீட்டிப்பு செய்யப்பட்டுள்ளது.

மாவட்டத்தில் நோய் கட்டுப்பாட்டு பகுதி தவிர (Except Containment Zone) மற்ற பகுதிகளில் கீழ்க்கண்ட பணிகளுக்கு மட்டும் 06-07-2020 முதல் அனுமதி அளிக்கப்படுகிறது.

i. தகவல் தொழில்நுட்பம் மற்றும் தகவல் தொழில் நுட்பம் சார்ந்த சேவை நிறுவனங்களில். அந்நிர்வாகமே ஏற்பாடு செய்யும் வாகனங்களில் 50 சதவீத பணியாளர்கள் அதிகபட்சம் 80 நபர்களுடன் இயங்க அனுமதிக்கப்படுகிறது.

ii. அனைத்து தனியார் நிறுவனங்களும், தொழில் நிறுவனங்களும் மற்றும் ஏற்றுமதி நிறுவனங்களும் 50 விழுக்காடு பணியாளர்களுடன் செயல்பட அனுமதிக்கப்படுகிறது. எனினும், இயன்றவரை பணியாளர்கள் வீட்டிலிருந்து பணிபுரிவதை தனியார் நிறுவனங்கள் ஊக்குவிக்க வேண்டும்.

iii. வணிக வளாகங்கள் (Malls) தவிர்த்து அனைத்து  ஷோரூகள் மற்றும் பெரிய கடைகள் (நகை, ஜவுளி போன்றவை) 50 விழுக்காடு பணியாளர்களுடன் செயல்படலாம். மேலும், ஒரே நேரத்தில் அதிகபட்சம்  5 வாடிக்கையாளர்கள் மட்டும் கடைக்குள் வருவதை உறுதி செய்து. தகுந்த சமு்க இடைவெளியை கடைபிடிக்கும் வகையில், அனுமதிக்கப்படவேண்டும். கடைகளில், குளிர்சாதன வசதி இருப்பினும் அவை இயக்கப்படக்கூடாது.

iv. உணவகங்களில் அமர்ந்து உணவு அருந்த அனுமதி அளிக்கப்படுவதோடு, உணவகங்களில், சமூக இடைவெளியை கடைபிடிக்கும் நோக்கத்துடன் உணவகங்களில் உள்ள மொத்த இருக்கைகளில் 50 விழுக்காடு இருக்கைகளில் மட்டும் வாடிக்கையாளர்கள் அமர்ந்து உணவு அருந்த அனுமதிக்கப்படுகிறது. எனினும், உணவகங்களில் குளிர்சாதன வசதி இருப்பினும் அவை இயக்கப்படக்கூடாது.

v. தேநீர் கடைகள், உணவு விடுதிகள் மற்றும் காய்கறி கடைகள், மளிகை கடைகள் ஆகியவை காலை 06,00 மணி முதல் இரவு 08,00 மணி வரை அனுமதிக்கப்படுகிறது.

vi. தேநீர் கடைகளில் உள்ள மொத்த இருக்கைகளில் 50 விழுக்காடு அளவு மட்டும் வாடிக்கையாளர்கள் அமர்ந்து உண்பதற்கு அனுமதிக்கப்படுகிறது,

vii. வாடகை மற்றும் டாக்ஸி வாகனங்களை, ஓட்டுநர் தவிர்த்து மு்ன்று பயணிகளை மட்டுமே கொண்டு பயன்படுத்தலாம்.

viii. ஆட்டோக்களில், ஓட்டுநர் தவிர்த்து, இரண்டு பயணிகள் மட்டுமே பயணிக்கலாம், சைக்கிள் ரிக் ஷாவும் அனுமதிக்கப்படுகிறது.

ix. முடி திருத்தும் மற்றும் அழகு நிலையங்கள் குளிர்சாதன வசதியை பயன்படுத்தாமல், அரசு தனியாக வழங்கிய நிலையான செயல்பாட்டு நெறிமுறைகளை பின்பற்றி இயங்க அனுமதிக்கப்படுகிறது.

x. மீன் கடைகள், கோழி இறைச்சி கடைகள், மற்ற இறைச்சி கடைகள் மற்றும் முட்டை விற்பனை கடைகள், சமு்க இடைவெளி நடைமுறைகளுக்கு உட்பட்டு அனுமதிக்கப்படுகிறது.

தமிழ்நாட்டின் பிற பகுதிகளில் (நோய் கட்டுப்பாட்டு பகுதிகள் தவிர மற்ற பகுதிகளில் ( Except Containment Zone) –01-07-2020 முதல் கீழ்க்கண்ட பணிகளுக்கு மட்டும் அனுமதி அளிக்கப்படுகிறது.

கிராமப்புறங்களில் உள்ள சிறிய திருக்கோயில்கள். அதாவது 10,000 ரூபாய்க்கும் குறைவாக ஆண்டு வருமானம் உள்ள திருக்கோயில்களிலும், சிறிய மசூதிகளிலும், தர்காக்களிலும், தேவாலயங்களிலும் மட்டும் பொதுமக்கள் தரிசனம் அனுமதிக்கப்படும்.

வட்ட அளவிலான குழுவினரால் பரிந்துரைக்கப்படும் திருக்கோயில்களுக்கு மட்டும் கோட்ட அளவிலான குழு அனுமதி வழங்கிய பின்னரே பொதுமக்கள் தரிசனத்திற்கு அனுமதிக்கப்படுவர், அனுமதி வழங்கப்பட்ட திருக்கோயில்களுக்கு கிராம அளவில் குழுக்கள் அமைக்கப்பட்டு அரசாணையில் தெரிவிக்கப்பட்டுள்ள வழிகாட்டு நெறிமுறைகள் கடைபிடிக்கப்படுகின்றனவா என்று கண்காணிக்கப்பட வேண்டும். இத்தகு வழிபாட்டுத்தலங்களில் சமூக இடைவெளி மற்றும் பிற நோய் தடுப்பு நடவடிக்கைகளை தவறாமல் கடைபிடிக்க வேண்டும். மாநகராட்சி, நகராட்சி மற்றும் பேரு்ராட்சி பகுதிகளில் உள்ள அனைத்து வழிபாட்டுத் தலங்களுக்கும், கிராமப்பகுதிகளில் உள்ள பெரிய வழிபாட்டுத் தலங்களுக்கும் தற்போதுள்ள நடைமுறைப்படி பொதுமக்கள் தரிசனம் அனுமதிக்கப்பட மாட்டாது.

தொழில் நிறுவனங்கள் மற்றும் ஏற்றுமதி நிறுவனங்கள் 100 விழுக்காடு பணியாளர்களுடன் இயங்க அனுமதிக்கப்படுகிறது.

தகவல் தொழில்நுட்பம் மற்றும் தகவல் தொழில்நுட்பம் சார்ந்த சேவை நிறுவனங்கள் 100 விழுக்காடு பணியாளர்களுடன் இயங்க அனுமதிக்கப்படுகிறது, எனினும் 20 விழுக்காடு பணியாளர்கள் வீட்டிலிருந்து பணிபுரிவதை ஊக்குவிக்க வேண்டும்.

ஏற்கனவே நடைமுறையில் உள்ள கீழ்காணும் செயல்பாடுகளுக்கான தடைகள், மறு உத்தரவு வரும் வரை தொடர்ந்து அமலில் இருக்கும்:

நகர்ப்புற வழிபாட்டுத்தல்களிலும். பெரிய வழிபாட்டு தலங்களிலும் பொதுமக்கள் வழிபாடு

அனைத்து மதம் சார்ந்த கூட்டங்கள்

நீலகிரி மாவட்டத்திற்கும், கொடைக்கானல், ஏற்காடு போன்ற சுற்றுலாத்தலங்களுக்கும். வெளியூர் சுற்றுலா பயணிகள் செல்ல தடை விதிக்கப்படுகிறது.

தங்கும் வசதியுடன் கூடிய ஹோட்டல்கள், ரிசார்ட்டுகள், பிற விருந்தோம்பல் சேவைகள் எனினும் மருத்துவத்துறை, காவல்துறை, அரசு அலுவலர்கள், உள்ளிட்ட வெளி மாநிலத்தவர் மற்றும் தனிமைப்படுத்தப்படும் பணிகளுக்கு மட்டும் விலக்கு அளிக்கப்படுகிறது.

வணிக வளாகங்கள் (Shopping Malls)

பள்ளிகள், கல்லூரிகள், பயிற்சி நிறுவனங்கள், ஆராய்ச்சி நிறுவனம் மற்றும் அனைத்து கல்வி நிறுவனங்கள் எனினும் இந்நிறுவனங்கள் இணைய வழி கல்வி கற்றல் தொடர்வதுடன் அதனை ஊக்கப்படுத்தலாம்.

மத்திய உள்துறை அமைச்சகத்தால் அனுமதிக்கப்பட்ட பணிகளைத் தவிர சர்வதேச விமான போக்குவரத்திற்கான தடை நீடிக்கும்.

மெட்ரோ ரயில் - மின்சார ரயில்

திரையரங்குகள், உடற்பயிற்சி கூடங்கள், நீச்சல் குளங்கள், கேளிக்கைக்கூடங்கள், மதுக்கூடங்கள் (Bயச), பெரிய அரங்குகள், கூட்ட அரங்குகள், கடற்கரை, சுற்றுலாத்தலங்கள், உயிரியல் பூங்காக்கள், அருங்காட்சியகங்கள் போன்ற பொதுமக்கள் அதிகம் கூடும் இடங்கள்,

அனைத்து வகையான சமுதாய அரசியல் விளையாட்டு. பொழுதுபோக்கு. கலாச்சார நிகழ்வுகள், சமய, கல்வி, விழாக்கள், கூட்டங்கள் மற்றும் ஊர்வலங்கள்.

மாநிலங்களுக்கு இடையேயான பேருந்து போக்குவரத்து
மேற்கண்ட கட்டுப்பாடுகள் தொற்றின் தன்மைக்கேற்றவாறு படிப்படியாக தளர்வுகள் அளிக்கப்படும்.

முழு ஊரடங்கு
05-07-2020, 12-07-2020, 19-07-2020 மற்றும் 26-07-2020 ஞாயிற்றுக் கிழமைகளில் எந்தவிதமான தளர்வுகளும் இன்றி தமிழ்நாடு முழுவதும் முழு ஊரடங்கு அமல்படுத்தப்படும்.

முழு ஊரடங்கு நாட்களில் முன்கூட்டிய திட்டமிடப்பட்ட மற்றும் அனுமதி பேற்ற திருமணங்கள் நடைபேறுவதற்கு அனுமதிக்கப்படும். புதிதாக பதிவு செய்வதற்கு அனுமதி கிடையாது.

திருமண நிகழ்ச்சிகள் மற்றும் இறுதி ஊர்வலங்களுக்கான கட்டுப்பாடுகள்:
திருமண நிகழ்ச்சிகளில் 50 நபர்களுக்கு மேல் பங்கேற்க கூடாது,

இறுதி ஊர்வலங்கள் மற்றும் அதைத் சார்ந்த சடங்குகளில் 50 நபர்களுக்கு மேல் பங்கேற்கக்கூடாது,

பொது பேருந்து போக்குவரத்து
மாநிலத்தில் மாவட்டங்களுக்குள் தற்போது அனுமதிக்கப்பட்டுள்ள தனியார் மற்றும் அரசு பொது பேருந்து போக்குவரத்து 01-07-2020 முதல் 15-07-2020 வரை தற்காலிகமாக நிறுத்தப்படுகிறது,

இ-பாஸ் முறை
அந்தந்த மாவட்டத்திற்குள் இ-பாஸ் இல்லாமல் செல்ல அனுமதி அளிக்கப்படும்.

வெளி மாநிலங்களுக்கு சென்று வரவும், வெளி மாநிலங்களிலிருந்து தமிழ்நாட்டுக்குள் வரவும், மாவட்டங்களுக்கிடையே சென்று வரவும் இ-பாஸ் முறை தொடர்ந்து நடைமுறையில் இருக்கும்.

முழு ஊரடங்கு நீட்டிக்கப்படும் இடங்களில் 30-06-2020 வரை வழங்கப்பட்ட இ-பாஸ் 05-07-2020 வரை செல்லும், இதற்கு மீண்டும் புதிய இ-பாஸ் பெறத்தேவையில்லை.

ஒரு மாவட்டத்திலிருந்து வேறொரு மாவட்டத்திற்கு அரசுப் பணிகளுக்கான ஒப்பந்தங்களில் பங்கேற்க விரும்பும் ஒப்பந்தக்காரர்களுக்கும், அப்பணியை மேற்பார்வை செய்யும் ஒப்பந்தக்காரர்களுக்கும் மற்றும் இப்பணிகள் சம்மந்தமாக அரசு அதிகாரிகளை சந்திக்க விரும்பும் ஒப்பந்ததாரர்களுக்கும் சம்மந்தப்பட்ட மாவட்ட ஆட்சியர் அவர்களால் இ-பாஸ் வழங்கப்படும்.

அனைத்து தனியார் நிறுவனங்களும் 100 விழுக்காடு பணியாளர்களுடன் செயல்பட அனுமதிக்கப்படுகிறது, எனினும். இயன்ற வரை பணியாளர்கள் வீட்டிலிருந்து பணிபுரிவதை தனியார் நிறுவனங்கள் ஊக்குவிக்க வேண்டும்.

வணிக வளாகங்கள் (Malls) தவிர்த்து. அனைத்து ஷோரூம்கள் மற்றும் பெரிய கடைகள் (நகை, ஜவுளி போன்றவை) 50 விழுக்காடு பணியாளர்களுடன் செயல்படலாம். மேலும். ஒரே நேரத்தில் அதிகபட்சம் 5 வாடிக்கையாளர்கள் மட்டும் கடைக்குள் இருக்கும் பொருட்டு தகுந்த சமு்க இடைவெளியை கடைபிடிக்கும் வகையில் அனுமதிக்கப்பட வேண்டும், இதுவன்றி, கடைகளில், குளிர் சாதன வசதி இருப்பினும் அவை இயக்கப்படக் கூடாது.

தேநீர் கடைகள், உணவு விடுதிகள் மற்றும் காய்கறி கடைகள், மளிகைக் கடைகள் ஆகியவை காலை 6 மணி முதல் இரவு 8 மணி வரை அனுமதிக்கப்படுகிறது. டாஸ்மாக் உள்ளிட்ட இதர கடைகள் காலை 10 மணி முதல் இரவு 8 மணி வரை இயங்கலாம்.

உணவகங்களில் அமர்ந்து உணவு அருந்த அனுமதி அளிக்கப்படுவதோடு, உணவகங்களில், சமூக இடைவெளியை கடைபிடிக்கும் நோக்கத்துடன், உணவகங்களில் உள்ள மொத்த இருக்கைகளில், 50 விழுக்காடு இருக்கைகளில் மட்டும் வாடிக்கையாளர்கள் அமர்ந்து உணவு அருந்த அனுமதிக்கப்படுகிறது. எனினும் உணவகங்களில் குளிர் சாதன வசதி இருப்பினும், அவை இயக்கப்படக் கூடாது.

தேநீர் கடைகளில் உள்ள மொத்த இருக்கையில் 50 விழுக்காடு அளவு மட்டும் வாடிக்கையாளர்கள் அமர்ந்து உண்பதற்கு அனுமதிக்கப்படுகிறது.

அத்தியாவசியமற்ற பொருட்கள் உட்பட அனைத்து பொருட்களையும். மின் வணிக நிறுவனங்கள் (E-Commerce) வழங்க அனுமதிக்கப்படுகிறது.

வாடகை மற்றும் டாக்ஸி வாகனங்கள் ஓட்டுநர் தவிர்த்து மூன்று பயணிகளுடன் இயங்க அனுமதிக்கப்படுகிறது.

ஆட்டோக்கள் இரண்டு பயணிகளுடன் இயங்க அனுமதிக்கப்படுகிறது. சைக்கிள் ரிக் ஷாவும் அனுமதிக்கப்படுகிறது.

மீன் கடைகள். கோழி இறைச்சி கடைகள், மற்ற இறைச்சி கடைகள் மற்றும் முட்டை விற்பனை கடைகள் சமு்க இடைவெளி நடைமுறைகளுக்கு உட்பட்டு அனுமதிக்கப்படுகிறது.

4) பொது
குற்றவியல் நடைமுறைச் சட்டம் பிரிவு 144-ன் கீழ் பொது இடங்களில் ஐந்து நபர்களுக்கு மேல் கூடாது என்ற நடைமுறை தொடர்ந்து அமலில் இருக்கும்.

தமிழ்நாடு முழுவதும் நோய்க் கட்டுப்பாட்டு பகுதிகளில் (Containment Zone) தற்போதுள்ள நடைமுறைகளின் படி. எந்தவிதமான தளர்வுகளுமின்றி ஊரடங்கு முழுமையாக கடைபிடிக்கப்படும்.

அனைத்து. தொழில் மற்றும் வணிக நிறுவனங்கள் தங்களது ஊழியர்கள் - பணியாளர்களை வீட்டிலிருந்தபடி பணிபுரிய ஊக்குவிப்பதோடு, தொழில் மற்றும் வணிக நிறுவனங்களில் நிலையான வழிகாட்டு நெறிமுறைகளை கண்டிப்பாக கடைபிடிக்க வேண்டும்.

மாநிலத்தில் உள்ள பிற மாவட்டங்களில் உள்ள தொழிற்சாலைகள் - நிறுவனங்களில் பணிபுரியும் தொழிலாளர்கள் - பணியாளர்கள். அருகாமையில், அதாவது. அந்த மாவட்டத்தை ஒட்டியுள்ள மாவட்டத்திலிருந்து வந்து பணிபுரிய, தொழிற்சாலை –நிறுவனம் அந்தந்த மாவட்ட ஆட்சித்தலைவர்களிடமிருந்து அனுமதி பெற்று, தொழிலாளர்களுக்கு அனுமதி அட்டை வழங்கலாம். இந்த அனுமதி அட்டை. தொழிற்சாலை நிறுவனம் அமைந்துள்ள மாவட்டத்தை ஒட்டியுள்ள மாவட்டத்திற்கு மட்டுமே பொருந்தும், பிற மாவட்டங்களுக்கு பயன்படுத்தக்கூடாது.

அரசு ஊரடங்கை அமல்படுத்தினாலும். பல்வேறு கட்டுப்பாடுகளை விதித்தாலும், மக்களின் ஒத்துழைப்பு இல்லையென்றால், இந்த நோய் பரவலை தடுக்க இயலாது, பொது மக்கள் வெளியில் செல்லும்போதும், பொது இடங்களிலும் முகக் கவசம் அணிவது கட்டாயமாக்கப்பட்டுள்ளது.

பொது மக்கள் வீட்டிலும், பணிபுரியும் இடங்களிலும் அடிக்கடி சோப்பை பயன்படுத்தி கை கழுவுவதையும். வெளியிடங்களில் முகக் கவசத்தை அணிந்து செல்வதையும், சமூக இடைவெளியை தவறhமல் கடைபிடித்து அவசிய தேவை இல்லாமல் வெளியில் செல்வதைத் தவிர்க்க வேண்டும் எனவும் அரசாணையில் தெரிவிக்கப்பட்டுள்ளது. இவ்வாறு மாவட்ட ஆட்சித்
தலைவர் செய்தியாளர்களிடம் தெரிவித்தார்.

அதிராம்பட்டினம் அரிமா சங்க 23-வது ஆண்டு புதிய நிர்வாகிகள் பணி ஏற்பு மற்றும் நலத்திட்ட உதவிகள் வழங்கும் விழா (படங்கள்)

அதிராம்பட்டினம், ஜூலை 02
தஞ்சை மாவட்டம், அதிராம்பட்டினம் அரிமா சங்கம் 23-வது ஆண்டு, 2020-2021 ஆம் ஆண்டிற்கான புதிய நிர்வாகிகள் பணியேற்பு மற்றும் நலத்திட்ட உதவிகள் வழங்கும் விழா அதிராம்பட்டினத்தில் புதன்கிழமை நடைபெற்றது.

விழாவிற்கு, அதிராம்பட்டினம் அரிமா சங்கத் தலைவர் எம். அப்துல் ஜலீல் தலைமை வகித்து வரவேற்றுப் பேசினார். செயலாளர் எம்.நிஜாமுதீன் ஆண்டறிக்கை வாசித்தார்.

விழாவில், சிறப்பு விருந்தினராக கலந்து கொண்ட அரிமா சங்க மாவட்ட முன்னாள் ஆளுநர் எஸ். முகமது ரஃபி புதிய நிர்வாகிகளை பதவியில் அமர்த்தி வாழ்த்துரை வழங்கினார். இதில், அரிமா சங்கத் தலைவராக எம்.அப்துல் ஜலீல், செயலாளராக சேக்கனா எம். நிஜாமுதீன், பொருளாளராக எஸ்.எம் முகமது முகைதீன், நிர்வாக அலுவலராக ஹாஜி எம். நெய்னா முகமது மற்றும் நிர்வாகிகள் பொறுப்பேற்றனர்.

விழாவில், சங்கத்தில் புதிய உறுப்பினர்களாக இணைந்த ஏ.முகமது ஆரிப், அபூபக்கர், கஜாலி ஆகியோருக்கு மாவட்ட முன்னாள் ஆளுநர் ஆடிட்டர் சி.ராஜகோபால் பதவி பிரமாணம் செய்து வைத்து, சேவைத் திட்டங்களை தொடங்கி வைத்தார். இதில், தஞ்சை ஆதரவற்ற சிறுவர்கள் காப்பகத்திற்கு ரூ.10 ஆயிரம் நிதி உதவி, டயாலிசிஸ் மருத்துவ உதவிக்காக கே. முகமது அப்துல்லா வழங்கிய ரூ.10 ஆயிரம் நிதி உதவி, ஆதரவற்ற பெண் ஒருவருக்கு வாழ்வாதார உதவியாக மாவு அரவை இயந்திரம் (கிரைண்டர்) என பல்வேறு நலத்திட்ட உதவிகள் வழங்கப்பட்டன.

விழாவில், அரிமா சங்க மண்டலத் தலைவர் இன்ஜினியர் எம்.கனகராஜ், வட்டாரத் தலைவர் ஞானமூர்த்தி, மண்டல ஒருங்கிணைப்பாளர் கலியபெருமாள், மாவட்டத்தலைவர்கள் பேராசிரியர் எஸ்.பி. கணபதி, பேராசிரியர் கே. செய்யது அகமது கபீர் ஆகியோர் வாழ்த்துரை வழங்கினர்

முன்னதாக, நிர்வாக அலுவலர் எம். நெய்னா முகமது சிறப்பு விருந்தினர்கள் அறிமுக உரை நிகழ்த்தினார். மாவட்டத் தலைவர் பேராசிரியர் எம்.ஏ முகமது அப்துல் காதர் இணைப்புரை வழங்கினார்.

நிகழ்வில், சங்க மாவட்டத் தலைவர் பேராசிரியர் கே. செய்யது அகமது கபீர், மாணிக்க முத்துசாமி, எம்.அகமது, எம்.சாகுல் ஹமீது ஆகியோரின் சேவைக்கு அரிமா சங்க பன்னாட்டு இலச்சினை அணிவித்து பாராட்டு தெரிவிக்கப்பட்டன.

நிறைவில், தலைவர் எம். அப்துல் ஜலீல் ஏற்புரை ஆற்றினார். சங்க இயக்குநர் பேராசிரியர் கே. முருகானந்தம் நன்றி கூறினார். இந்நிகழ்வில், அரிமா சங்க மாவட்டத்தலைவர்கள், இயக்குநர்கள், உறுப்பினர்கள் கலந்துகொண்டனர்.
 
 
 
 
 
 
 
 
 
 
 
 
 
 
 
 
 
 
 
 
 
 
 
 

செய்திகளை உடனுக்குடன் மின்னஞ்சலில் பெற...