Pages

Monday, May 25, 2020

கொள்ளிடம் கூட்டுக் குடிநீர் திட்டப் பணிகள்: ஆட்சியர் ஆய்வு (படங்கள்)

அதிரை நியூஸ்: மே.25
தஞ்சாவூர் மாவட்டம், செம்மங்குடி, அணைக்குடி, வீரமாங்குடி மற்றும் கரம்பயம் பகுதிகளில் செயல்பட்டு வரும் கொள்ளிடம் கூட்டுக்குடிநீர் திட்ட பணிகளை மாவட்ட ஆட்சித் தலைவர் ம.கோவிந்த ராவ் இன்று (25.05.2020)  நேரில் பார்வையிட்டு ஆய்வு செய்தார்.

கொள்ளிடம் ஆற்றை நீர் ஆதாரமாக கொண்டு, தஞ்சாவூர் மாவட்டத்திற்குட்பட்ட 9 ஊராட்சி ஒன்றியங்களை சேர்ந்த 1153 ஊரக குடியிருப்புகள் மற்றும் அதிரம்பட்டினம், பேராவூரணி, பெருமகளுர் ஆகிய பேரூராட்சிகளைச் சேர்ந்த குடியிருப்புகள் பயன்பெறும் வகையில் கொள்ளிடம் கூட்டுக் குடிநீர் திட்டம் செயல்படுத்தப்பட்டு வருகிறது.

இத்திட்டத்தின்கீழ் தஞ்சாவூர் மாவட்டம், திருவையாறு வட்டம், அணைக்குடி, வீரமாங்குடி, செம்மங்குடி ஆகிய மூன்று இடங்களில் அமைக்கப்பட்டுள்ள நீர் சேகரிப்பு கிணறுகளிலிருந்து நீர் பெறப்பட்டு, வீரமாங்குடியில் அமைக்கப்பட்டுள்ள 21.20 இலட்சம் கொள்ளளவு கொண்ட பொது நீர் சேகரிப்பு தொட்டிக்கு நீரேற்றம் செய்யப்பட்டு, பின்னர் அங்கிருந்து சூரக்கோட்டை மற்றும் புதூர் பகுதிகளில் உள்ள தரைமட்ட தொட்டிகள் வழியாக கரம்பயம் பகுதியில் உள்ள நீர் உந்து தொட்டிக்கு கொண்டு செல்லப்படுகிறது. கரம்பயம் நீர்த்தேக்க தொட்டியிலிருந்து சுமார் 604.52 கிமீ நீளமுள்ள நீரேற்று குழாய்கள் மூலமாக 3 வழித்தடங்களில் கொண்டு செல்லப்பட்டு, 9 ஊராட்சி ஒன்றியங்களில் அமைக்கப்பட்டுள்ள 180 தரைமட்ட தொட்டிகளுக்கு நீரேற்றம் செய்யப்படுகிறது.

180 தரைமட்ட தொட்டிகளில் சேகரிக்கப்படும் குடிநீர் சுமார் 1049 கிமீ நீளமுள்ள நீரூட்டும் குழாய் மூலம் 1153 ஊரக குடியிருப்புகள் மற்றும் 3 பேரூராட்சி குடியிருப்பு பகுதிகளில் ஏற்கனவே பயனில் உள்ள 1291 மேல்நிலை நீர்த்தேக்க தொட்டிகளுக்கு அனுப்பப்பட்டு பொதுமக்களுக்கு குடிநீர் விநியோகம் செய்யப்படுகிறது.

செம்மங்குடி, அணைக்குடி, வீரமாங்குடி ஆகிய பகுதிகளில் அமைந்துள்ள நீர் சேகரிப்பு கிணறுகள், வீரமாங்குடியில் அமைந்துள்ள பொது நீர் சேகரிப்பு தொட்டி, கரம்பயம் பகுதியில் அமைந்துள்ள நீர் உந்து தொட்டி ஆகியவற்றை பார்வையிட்டு ஆய்வு செய்த மாவட்ட ஆட்சித் தலைவர் மின் இயந்திரங்களை முறையாக பராமரித்திடவும், அவ்வபோது ஏற்படும் பழுதுகளை உடனுக்குடன் சரி செய்திடவும் தொடர்புடைய அலுவலர்களை அறிவுறுத்தினார். நீரேற்று நிலையங்கள், நீர் சேகரிப்பு தொட்டிகள் மற்றும் நீர் செல்லும் பாதைகளை கண்காணித்து பராமரிப்பு பணிகளை மேற்கொள்ளவும் மாவட்ட ஆட்சித் தலைவர் அறிவுறுத்தினார்.

இவ்வாய்வின் போது மாவட்ட ஊரக வளர்ச்சி முகமை திட்ட இயக்குனர் பழனி, தமிழ்நாடு குடிநீர் வடிகால் வாரிய மேற்பார்வை பொறியாளர் செந்தில்குமார், நிர்வாகப் பொறியாளர் சண்முகசுந்தரம், மாவட்ட ஊரக வளர்ச்சி முகமை செயற்பொறியாளர் ராமசாமி, உதவி இயக்குனர் (ஊராட்சிகள்) முருகேசன், தமிழ்நாடு குடிநீர் வடிகால் வாரிய உதவி நிர்வாக பொறியாளர்கள் சேகர், தங்கவேல், உதவி பொறியாளர் விவேகானந்தன், திட்ட இயக்குனர் முரளி மற்றும் அரசு அலுவலர்கள் உடன் இருந்தனர்.
 

No comments:

Post a Comment

வாசகர்களின் கருத்து சுதந்திரத்தை வரவேற்கும் இந்தப் பகுதியை ஆரோக்கியமாக பயன்படுத்திக் கொள்ள அன்புடன் கேட்டுக்கொள்கிறோம்.

1. கருத்து பகுதியில் கருத்துரிமை என்ற அடிப்படையில் வாசகர்கள் இடும் பின்னூட்டங்கள் மட்டுறுத்தலின்றி அனுமதிக்கப்படுகிறது.

2. இங்கு பதிவாகும் கருத்துக்கள் வாசகர்களின் சொந்த கருத்துக்களே. அதிரை நியூஸின் கருத்துகள் அல்ல. வாசகர் பதியும் கருத்துக்கு அவரே முழுப் பொறுப்பு.

3. கருத்து பகுதியில் நாகரிகமற்ற வார்த்தைகள் பயன்படுத்துவதை வாசகர்கள் தவிர்க்க வேண்டுகிறோம். மேலும் வசை மொழிகள் / தகாக் கருத்துக்கள் / Anonymous - முன்னறிவிப்பின்றி நீக்கப்படும்.

4. தனிநபர் தாக்குதல் அடங்கிய கருத்துகளை வாசகர்கள் பதிவு செய்வதை யாரேனும் சுட்டிக் காட்டினால், அத்தகைய கருத்துகள் உடனடியாக நீக்கப்படும்.

5. தங்களின் பெயர் மற்றும் சரியான மின்னஞ்சல் முகவரியை பயன்படுத்தி கருத்து பதிவிட அன்புடன் கேட்டுக்கொள்கிறோம்.

செய்திகளை உடனுக்குடன் மின்னஞ்சலில் பெற...