Pages

Wednesday, September 30, 2020

மரண அறிவிப்பு ~ எச். அப்துல் கபூர் (வயது 45)

அதிரை நியூஸ்: செப்.30
அதிராம்பட்டினம், கடற்கரைத்தெருவைச் சேர்ந்த மர்ஹூம் மு.செ.அ முகமது ஷரீபு, மர்ஹூம் ஹாஜி அ.மு.க உதுமான் மரைக்காயர் ஆகியோரின் பேரனும், மர்ஹூம் ஹாஜி. மு.செ.அ ஹாஜா முகைதீன் அவர்களின் மகனும், மர்ஹூம் வா.அ முகைதீன் அப்துல் காதர் அவர்களின் மருமகனும், எச். அஜ்மல் சரீபு அவர்களின் சகோதரரும், வி.ஏ ரபீக் அகமது, வி.ஏ அக்பர் அலி, வி.ஏ அமீர் ஷரீபு ஆகியோரின் மச்சானும், ஏ.ஜி. ஜுபைர் அவர்களின் தகப்பனாருமாகிய எச். அப்துல் கபூர் (வயது 45) அவர்கள் இன்று மாலை கடற்கரைத்தெரு இல்லத்தில் வஃபாத்தாகி விட்டார்கள். 

இன்னா லில்லாஹி வ இன்னா இலைஹி ராஜி'ஊன்.

அன்னாரின் ஜனாஸா நாளை (01-10-2020) காலை 9 மணியளவில் மரைக்கா பள்ளிவாசல் மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துஆ செய்வோம்.

பாபர் மசூதி இடிப்பு வழக்கு: நீதிமன்ற தீர்ப்பைக் கண்டித்து அதிராம்பட்டினத்தில் ஆர்ப்பாட்டம் (படங்கள்)

அதிராம்பட்டினம், செப்.30
பாபர் மசூதி இடிப்பு வழக்கு தொடர்பாக நீதிமன்றம் அளித்த தீர்ப்பை கண்டித்தும், பாபர் மசூதி இடிப்புக்கு காரணமானவர்களை சிறையிலடைக்க கோரியும் எஸ்டிபிஐ கட்சி தஞ்சை தெற்கு மாவட்டம் சார்பில், அதிராம்பட்டினத்தில் ஆர்ப்பாட்டம் புதன்கிழமை மாலை நடைபெற்றது.

ஆர்ப்பாட்டத்திற்கு, அக்கட்சியின், தஞ்சை தெற்கு மாவட்டச் செயலாளர் எம்.முகமது ரஹீத் தலைமை வகித்தார். அக்கட்சியின் தஞ்சை தெற்கு மாவட்டச் செயலாளர் எல்.முகமது அஸ்கர், பொருளாளர் எம்.இத்ரீஸ்கான் ஆகியோர் முன்னிலை வகித்தனர்.

பாப்புலர் ஃப்ரண்ட் ஆஃப் இந்தியா அமைப்பின் தஞ்சை தெற்கு மற்றும் திருவாரூர் ஒருங்கிணைந்த மாவட்டங்களின் தலைவர் ஏ.ஹாஜா அலாவுதீன், அக்கட்சியின், தஞ்சை தெற்கு மாவட்டத் தலைவர் என்.முகமது புகாரி ஆகியோர் கண்டன உரை நிகழ்த்தினர். அக்கட்சியின் அதிரை பேரூர் இணைச் செயலாளர் சி.அகமது  கண்டன கோஷம் எழுப்பினார்.

இதில், மாவட்ட செயற்குழு உறுப்பினர் ஒளரங்கசீப், சமூக ஊடக அணி மாவட்டத் தலைவர் முகமது அசாருதீன், அதிரை பேரூர் தலைவர் எஸ். அகமது அஸ்லம், மதுக்கூர் பேரூர் தலைவர் மாப்பிள்ளை தம்பி, மல்லிப்பட்டினம் தலைவர் அப்துல் பகத் உள்பட அக்கட்சியினர் திரளாக கலந்துகொண்டு நீதிமன்ற தீர்ப்பை கண்டித்தும், பாபர் மசூதி இடிப்புக்கு காரணமானவர்களை சிறையிலடைக்க கோரியும் முழக்கமிட்டனர். 

முன்னதாக, அக்கட்சியினர் அதிராம்பட்டினம் கடைத்தெரு முக்கத்தில் இருந்து கண்டன முழக்கமிட்டவாறு பேரணியாக சென்று பேருந்து நிலையம் சென்றடைந்தனர்.


நடுத்தெரு அரசுப் பள்ளியில் மாணவர்கள் சேர்க்கை விழிப்புணர்வு முகாம் (படங்கள்)

அதிரை நியூஸ்: செப்.30
அதிராம்பட்டினம், நடுத்தெரு ஊராட்சி ஒன்றிய நடுநிலைப்பள்ளியில் மாணவர் சேர்க்கை விழிப்புணர்வு முகாம் புதன்கிழமை நடைபெற்றது.  

நிகழ்வுக்கு, பள்ளித் தலைமை ஆசிரியை எஸ்.மாலதி தலைமை வகித்தார். முகாமில், ஆசிரியர்கள் ஏ.கிருஷ்ணவேனி, எஸ். உமா ராணி, கே. விஜயலட்சுமி, எஸ். டேவிட் ஆரோக்கிய ராஜ், கே. கலாதேவி, பி.அமுதா, ஏ.கனிமொழி மற்றும் முன்னாள் மாணவர்கள் கலந்துகொண்டனர். 

முகாமில், ஒன்றாம் வகுப்பு முதல் ஐந்தாம் வகுப்பு வரையில் 40 மாணவர்கள் பள்ளியில் புதியதாகச் சேர்க்கப்பட்டனர். இதனால், பள்ளி மாணவர்களின் எண்ணிக்கை 180 ஆக உயர்ந்துள்ளது. புதிதாக இணைந்த மாணவர்களுக்கு புத்தகங்கள், எழுதுகோல், புத்தகப்பை உள்ளிட்டவை வழங்கப்பட்டன. 

2020 - 2021 ம் கல்வியாண்டில் பள்ளியின் மாணவர் சேர்க்கையை அதிகரிக்கும் பொருட்டு, நடுத்தெரு, புதுத்தெரு, முத்தம்மாள் தெரு, பிலால் நகர், காலியார் தெரு, வெற்றிலைக்காரத் தெரு உள்ளிட்ட பகுதிகளுக்கு சென்று பெற்றோர்களைச் சந்தித்து மாணவர்களை அரசுப் பள்ளியில் சேர்க்க வேண்டியதன் அவசியம், பள்ளியில் வழங்கப்படும் செயல் வழிக்கற்றல் பயிற்சி, உடற்கல்வி, விளையாட்டு வகுப்புகள், கணினிப் பயிற்சி, காணொளி வழிக்கல்வி, நீதிபோதனை வகுப்புகள், அரசுப் பள்ளி மாணவர்களுக்கு அரசால் வழங்கப்படும் சலுகைகள் குறித்தும் விரிவாக விளக்கப்பட்டது.

இதுகுறித்து பள்ளித்தலைமை ஆசிரியை எஸ்.மாலதி கூறியது;
அதிராம்பட்டினம், நடுத்தெரு ஊராட்சி ஒன்றிய நடுநிலைப்பள்ளியில் ஒன்றாம் வகுப்பு முதல் எட்டாம் வகுப்பு முடிய சேர்க்கை கடந்த (17-08-2020) முதல் தொடங்கி நடைபெற்று வருகிறது.

கட்டணம் கிடையாது. புத்தகம், பை, நோட், வண்ண பென்சில்கள் மற்றும் கணித வடிவியல் பெட்டி, சீருடை, கல்வி உதவித்தொகை உள்ளிட்ட அனைத்தும் இலவசமாக வழங்கப்படுகிறது.

மேலும், செயல் வழிக்கற்றல் பயிற்சி, உடற்கல்வி, விளையாட்டு வகுப்புகள், கணினிப் பயிற்சி, காணொளி வழிக்கல்வி, நீதிபோதனை வகுப்புகள் ஆகியவை நடத்தப்படுவது குறித்து பெற்றோர்களை வீடு வீடாக சென்று சந்தித்து அவர்களிடம் விழிப்புணர்வு ஏற்படுத்தி வருகிறோம்.

பெற்றோர்கள் தங்கள் குழந்தைகளை அரசுப் பள்ளியில் சேர்த்து பயன்பெற வேண்டுமென பள்ளித் தலைமையாசிரியர் மற்றும் ஆசிரியர்கள் மற்றும் பள்ளி மேலாண்மைக்குழு, கிராமக்கல்விக்குழு, பெற்றோர் ஆசிரியர் கழகம் சார்பில் கேட்டுக்கொள்வதாக தெரிவித்தார்.

Tuesday, September 29, 2020

தஞ்சை மாவட்டத்தில் முகக்கவசம் அணியாதவர்களுக்கு கரோனா பரிசோதனை ~ அபராதம் விதிக்கப்படும்: ஆட்சியர் எச்சரிக்கை!

அதிரை நியூஸ்: செப்.29
தஞ்சாவூர் மாவட்டத்தில் பொது இடங்களில் முகக்கவசம் அணியாதவர்களுக்கு கரோனா பரிசோதனை செய்யப்பட்டு அபராதம் விதிக்கப்படும் என மாவட்ட ஆட்சித் தலைவர் ம.கோவிந்த ராவ் எச்சரிக்கை விடுத்துள்ளார்.

இதுகுறித்து மாவட்ட ஆட்சித் தலைவர் தெரிவித்ததாவது:-
தஞ்சாவூர் மாவட்டத்திலுள்ள அனைத்து வட்டாரத்திலும் கண்காணிப்பு அலுவலர்களாக மாவட்ட நிலை அலுவலர்கள் நியமிக்கப்பட்டு அவர்கள் தொடர்ந்து ஆய்வு மேற்கொண்டு வருகின்றனர். கொரோனா நோய்த்தொற்று ஏற்பட்டால் அச்சப்படாமல்ää அரசின் வழிகாட்டுதல்களையும் மருத்துவர்களின் அறிவுரைகளையும் பொதுமக்கள் பின்பற்ற வேண்டும். அறிகுறி இல்லாமல் கொரோனா நோய்த்தொற்று உறுதி செய்யப்படுபவர்கள் தங்களின் வீடுகளிலேயே தனிமைப்படுத்திக் கொள்ள மாவட்ட நிர்வாகத்தின் சார்பில் அனுமதி அளிக்கப்பட்டு வருகிறது. 

மேலும், தஞ்சாவூர் மாவட்டத்திலுள்ள மூன்று கொரோனா சிகிச்சை மையங்களில் நல்ல முறையில் சிகிச்சை அளிக்கப்பட்டு வருகிறது. தஞ்சாவூர் மாவட்டத்தில் 87 சதவீத நபர்கள் கொரோனா நோய்த்தொற்றிலிருந்து குணமடைந்து வீடு திரும்பியுள்ளனர். அனைவரும் முககவசம் அணிவதன் மூலம் கொரோனா பரவுதலை முழுமையாக கட்டுப்படுத்த முடியும். வீட்டைவிட்டு வெளியே வரும்போது கட்டாயம் முகக்கவசம் அணிய வேண்டும். தஞ்சாவூர் மாவட்டத்தில் முககவசம் அணியாத காரணத்திற்காக இதுவரை 8945 நபர்களிடமிருந்து ரூபாய் 19.32 லட்சம் அபராதம் வசூலிக்கப்பட்டுள்ளது.

தஞ்சாவூர் மாவட்டத்தில் மீண்டும் கொரோனா நோய்த்தொற்று அதிகரித்து வருகிறது. இதைத் தடுப்பதற்கு மாவட்ட நிர்வாகத்தின் சார்பில் பல்வேறு நடவடிக்கைகள் மேற்கொள்ளப்பட்டு வருகிறது. இதற்கு பொதுமக்கள் முழு ஒத்துழைப்பு அளித்தாலும், ஆங்காங்கே சில நபர்கள் முகக்கவசம் அணியாமல் இருப்பது தெரியவந்துள்ளது. பிறரிடம் பேசும்போது முகக்கவசத்தை இறக்கி விட்டு பேசுவதை தவிர்க்க வேண்டும். முகக்கவசம்  அணிவதை இயல்பு வாழ்க்கையின் ஒரு பகுதியாக கடைபிடிக்க வேண்டும். முகக்கவசம் அணியாதவர்களுக்கு கொரோனா பரிசோதனை செய்யப்பட்டு அபராதம் விதிக்கப்பட்டும் மற்றும் காவல்துறை மூலம் வழக்கு பதிவு செய்யப்படும். அபராதம் விதிக்கப்பட்டு வழக்கு பதிவு செய்யப்படும். எனவேää பொதுமக்கள் மாவட்ட நிர்வாகத்திற்கு முழு ஒத்துழைப்பு அளிக்குமாறு கேட்டுக்கொள்ளப்படுகிறது. இவ்வாறு மாவட்ட ஆட்சித் தலைவர் தெரிவித்துள்ளார்.

மரண அறிவிப்பு ~ முகமது ரபீக் (வயது 55)

அதிரை நியூஸ்: செப்.29
அதிராம்பட்டினம், புதுத்தெருவை சேர்ந்த மர்ஹூம் அகமது ஹாஜா அவர்களின் மகனும், அகமது ஹனிபா அவர்களின் மருமகனும், மர்ஹூம் ஜெஹபர் சாதிக் அவர்களின் சகோதரரும், அமீன், அசரஃப், அன்வர் உசேன் ஆகியோரின் தகப்பனாருமாகிய முகமது ரபீக் (வயது 55) அவர்கள் இன்று காலை சென்னையில் வஃபாத்தாகி விட்டார்கள்.

இன்னா லில்லாஹி வ இன்னா இலைஹி ராஜி'ஊன்.

அன்னாரின் ஜனாஸா அதிராம்பட்டினம் எம்.எஸ்.எம் நகர் இல்லத்தில் இருந்து எடுத்துச்செல்லப்பட்டு தக்வா பள்ளிவாசல் மையவாடியில் நல்லடக்கம் செய்யப்படும். (நேரம் பின்னர் அறிவிக்கப்படும்)

அன்னாரின் மறுமை வாழ்வு சிறக்க துஆ செய்வோம்.

Monday, September 28, 2020

'கல்விமாமணி' விருது பெற்ற காதிர் முகைதீன் ஆண்கள் மேல்நிலைப்பள்ளி ஆசிரியர்!

அதிரை நியூஸ், செப்.28
அதிராம்பட்டினம் காதிர் முகைதீன் ஆண்கள் மேல்நிலைப்பள்ளி முதுகலை ஆசிரியர் எஸ்.நாகராஜனுக்கு அரிமா சங்க ஆசிரியர் தினவிழாவில் 'கல்விமாமணி' விருது வழங்கி பாராட்டு தெரிவிக்கப்பட்டது.

அதிராம்பட்டினம் அரிமா சங்கம் சார்பில், ஆசிரியர் தின விழா 27.09.2020 அன்று ஞாயிற்றுக்கிழமை சாரா திருமண மஹாலில் நடைபெற்றது.

விழாவிற்கு, சங்கத் தலைவர் எம். அப்துல் ஜலீல் தலைமை வகித்து வரவேற்றார். செயலாளர் எம்.நிஜாமுதீன், பொருளாளர் எஸ்.எம் முகமது முகைதீன், நிர்வாக அலுவலர் எம்.நெய்னா முகமது ஆகியோர் முன்னிலை வகித்தனர்.  

சிறப்பு விருந்தினராக, அரிமா சங்க மாவட்டத் தலைவர் எஸ்.விஜயலட்சுமி சண்முகவேல் கலந்துகொண்டு, காதிர் முகைதீன் ஆண்கள் மேல்நிலைப்பள்ளி முதுகலை ஆசிரியர் எஸ்.நாகராசன் அவர்களுக்கு 'தமிழ்மாமணி' விருது வழங்கி பாராட்டுத் தெரிவித்தார்.

இந்நிகழ்வில், சிறப்பு அழைப்பாளராக காதிர் முகைதீன் மேல்நிலைப்பள்ளி தலைமை ஆசிரியர்கள் அஸ்ரப் அலி, சுராஜ் ஆகியோர் கலந்துகொண்டனர்.

முதுகலை ஆசிரியர் எஸ்.நாகராசன் அவர்களைப் பற்றிய சிறு குறிப்பு:
அதிராம்பட்டினம் காதிர் முகைதீன் ஆண்கள் மேல்நிலைப்பள்ளி முதுகலை ஆசிரியராக கடந்த 31 ஆண்டுகளாக கல்விச் சேவை ஆற்றி வருகிறார்.
தாவரவியல் பாடப்பிரிவில் பல ஆண்டுகளாகத் தொடர்ந்து 100 சதவித தேர்ச்சி.  கடந்த 25 ஆண்டுகளாக பள்ளியின் நாட்டு நலப்பணி திட்ட அலுவலராக பொறுப்பில் உள்ளார். சுமார் 20 க்கும் மேற்பட்ட சிறப்பு முகாம்களை நடத்தி மாவட்ட முதன்மை கல்வி அலுவலரின் பாராட்டைப்பெற்றவர். 

கடந்த 15 ஆண்டுகளாக பள்ளியின் தேசிய பசுமைப்படை ஒருங்கிணைப்பாளராக பொறுப்பில் இருந்து வருகிறார். பள்ளி வளாகத்தை பசுமை வளாகமாக மாற்றும் முயற்சியில் தொடர்ந்து ஈடுபட்டு வருகிறார். மாநில அளவில் நடத்தப்பட்ட தாவரவியல் ஆசிரியர்களுக்கான பயிற்சியில் மாவட்ட அளவில் தேர்வுபெற்று கருத்தாளராக பணியாற்றியவர் ஆவார்.

மாணவர்கள் நல மேம்பாட்டிற்காக தன்னை முழுமையாக அர்ப்பணித்து ஆசிரியர் பணியில் சிறப்பாக செயல்பட்டு வருவதை பாராட்டும் விதத்தில் அதிராம்பட்டினம் அரிமா சங்கம் சார்பில், கல்விமாமணி விருது வழங்கி கெளரவிக்கப்பட்டது குறிப்பிடத்தக்கது. 





அதிராம்பட்டினம் அரிமா சங்க ஆசிரியர் தின விழாவில் 'தமிழ்மாமணி' விருது வழங்கி கெளரவிப்பு (படங்கள்)

அதிராம்பட்டினம், செப்.26
அதிராம்பட்டினம் அரிமா சங்கம் சார்பில், ஆசிரியர் தின விழா 27.09.2020 அன்று ஞாயிற்றுக்கிழமை சாரா திருமண மஹாலில் நடைபெற்றது.

விழாவிற்கு, சங்கத் தலைவர் எம். அப்துல் ஜலீல் தலைமை வகித்து வரவேற்றார். செயலாளர் எம்.நிஜாமுதீன், பொருளாளர் எஸ்.எம் முகமது முகைதீன் ஆகியோர் முன்னிலை வகித்தனர். நிர்வாக அலுவலர் எம்.நெய்னா முகமது சிறப்பு விருந்தினர் அறிமுக உரை நிகழ்த்தினார்.

சிறப்பு விருந்தினராக, அரிமா சங்க மாவட்டத் தலைவர் எஸ்.விஜயலட்சுமி சண்முகவேல் கலந்துகொண்டு, ஆசிரியர் தின விழா பேருரை நிகழ்த்தி, காதிர் முகைதீன் ஆண்கள் மேல்நிலைப்பள்ளி முதுகலை ஆசிரியர் எஸ்.நாகராசன் அவர்களுக்கு 'தமிழ்மாமணி' விருது வழங்கி பாராட்டுத் தெரிவித்தார். மேலும், பேராசிரியர்கள் எம்.ஏ முகமது அப்துல் காதர், பி.கணபதி, கே.முருகானந்தம், கே.செய்யது அகமது கபீர், என்.உதயகுமார் ஆகியோருக்கு சால்வை அணிவித்து வாழ்த்து தெரிவித்தார். 

விழாவில், தமிழக அரசின் டாக்டர் இராதாகிருஷ்ணன் நல்லாசிரியர் விருது பெற்ற அதிராம்பட்டினம் காதிர் முகைதீன் பெண்கள் மேல்நிலைப்பள்ளி ஆசிரியை கே.அனுராதா மற்றும் சிறந்த சேவைக்காக விருது பெற்ற சங்கத்தலைவர் எம். அப்துல் ஜலீல், செயலாளர் எம்.நிஜாமுதீன் ஆகியோருக்கு சால்வை அணித்து பாராட்டுத் தெரிவிக்கப்பட்டது.

விழாவில், சங்கத்தில் புதிய உறுப்பினராக இணைந்த ஹாஜா நசுருதீன், அயூப்கான் ஆகியோருக்கு, அரிமா சங்க மாவட்ட ஒரியண்டேஷன் பிரிவுத் தலைவர் பேராசிரியர் கே.செய்யது அகமது கபீர், பதவி பிரமாணம் செய்து வைத்தார். முன்னாள் தலைவர் பேராசிரியர் எம்.ஏ முகமது அப்துல் காதர் வாழ்த்துரை வழங்கினார். நிகழ்வினை, மாவட்டத் தலைவர் எம். கஜாலி முகமது தொகுத்தளித்தார். நிறைவில், செயலாளர் எம்.நிஜாமுதீன்  நன்றி கூறினார். முன்னதாக, கரோனா பாதிப்பில் உயிர் நீத்தவர்களுக்கு ஒரு நிமிடம் மவுனம் கடைபிடிக்கப்பட்டது. 

விழாவில், சிறப்பு அழைப்பாளர்களாக காதிர் முகைதீன் மேல்நிலைப்பள்ளி தலைமை ஆசிரியர்கள் அஸ்ரப் அலி, சுராஜ், ஷிஃபா மருத்துவமனை நிர்வாக இயக்குநர் இம்தியாஸ் அகமது, அரிமா சங்க மாவட்டத் தலைவர்கள் எம்.அகமது, எம்.சாகுல் ஹமீது, டி.பி.கே ராஜேந்திரன், அதிராம்பட்டினம் அரிமா சங்க இயக்குநர்கள் எஸ்.ஏ அப்துல் ஹமீது, ஆர். செல்வராஜ், அரிமா சங்க நிர்வாகிகள் பி.பிச்சமுத்து, என்.யூ ராமமூர்த்தி, எம்.முகமது அபூபக்கர், எம். அப்துல் ரஹ்மான், எம்.நெய்னா முகமது, சி.சார்லஸ், முல்லை ஆர்.மதி, குப்பாஷா எம்.அகமது கபீர், எம்.கே.எம் முகமது அபூபக்கர், பி.உமா சங்கர், கலையரசன், எம்.ஏ முகமது அபூபக்கர், ஏ.வி.எம் வரிசை முகமது, ஏ.முகமது ஆரிப், ஒய்.முகமது அபூபக்கர், எச் அப்துல் ரெஜாக்  உள்ளிட்ட நிர்வாகிகள், உறுப்பினர்கள் கலந்துகொண்டனர்.

செய்திகளை உடனுக்குடன் மின்னஞ்சலில் பெற...